Read Kilivila SUNAPULA 1 Bible Online

SUNAPULA 1 - Kilivila bible

SUNAPULA 1

¹Yekobe litula eigalasi eilosi mapilana Itipita deli matauna, e matausina taitala taitala deli wala litusia. E matausina yagasi

²Rubeni, Simioni, Libai, Yuda,

³Isaka, Sebuloni, Beniamina,

⁴Dani, Napitalai, Gada, deli Asera.

⁵E matausina Yekobe dalela kasi bawa tailuwolima tailuwoyu.[1] E latulaga Yosepa bogwa wala eisibogwa mapilana Itipita.

⁶E igau matubona Yosepa deli tuwala ikaligasi, e tuvaila kesala tubwa matubona.

⁷Taga tubusia iunigeyaisi bidubadu gugwadi, e mabudona mina Isireli dalela saina budoveka, e matausina ivakasauwaisi Itipita.

⁸E oluvi taitala giyouvau ikaraiwogi Itipita. E matauna gala wala inikoli Yosepa livalela.

⁹Iluki la tomota kawala, “Ka! Mina Isireli saina bidugaga deli saina budoveka, e bogwa bikaiyoulaidasi.

¹⁰E gala tagigisi kidamwa kabilia bima, e kaina bikommolaisi boda kwaitala deli kada tilaulasi, e bikabiliasi deli yakidasi, e baisa makawala bisakaulasi metoya oda valusi. Mapaila ibodi bitanevisi avai nanamsa bitavagaisi bitasilibodaisi mwada taga tuvaila kasi bawa bibidubadu.”

¹¹Mapaila mina Itipita isailisi kasi tokaraiwaga odubasi, kidamwa mina Isireli bivigaki bipupaisewasi mwau sainela paila bilamamsi komwaidosi. Mina Isireli eikaliaisi valu mapilasina Pitom deli Ramesa, mwada mapilasina bivigaki guyau la bomileilai.

¹²Taga mayogagela wala mina Itipita iyogagaisi mina Isireli, e mauvagila goli kasi bawa ibidubadu, e tuvaila wala isilomlasi olopola valu. Mapaila mina Itipita ikukolaisi mina Isireli.

¹³Ivigaki si sisu mwau sainela metoya si komikikana baisa matausina olopola paisewa mwau. Ivigakaisi mina Isireli si tokwaliai e deli si tobagula. Deli gala wala sitana si nokapisi baisa matausina.

¹⁵E tuta matutona mina Itipita si guyau ilivala baisa minasina vilesi Iberu tokaivalulu. Natana yagala Sipara, nayuwela yagala Puwa.

¹⁶E guyau matauna ikaibiga kawala, “Ka, kugisaisi. Matutona yokomi kukwavilulaisi vilesi Iberu - ka, kidamwa gwadi tau bikaloubusi, kukwatumati. Kidamwaga magudina vivila wala, e desi wala, bimova.”

¹⁷Mitaga minasina tokaivalulu ikukolaisi Yaubada, e gala wala bikabikuwolaisi guyau. E mapaila gugwadi tauwau iyomovaisi wala.

¹⁸E matauna guyau idou minasina tokaivalulu e ikatupoi kawala, “Avaka uula kuuvagaisi baisa ke? Avaka uula kuyomovaisi magudisina tauwau?”

¹⁹E ivitakaulokaisi kawasi, “Ka, vilesi Iberu gala makawala vilesi Itipita. Paila vilesi Iberu si kaivalulu gagabila, e bogwa bivilulubogwasi oluviga yakama bakasusuvi.”

²⁰E mapaila Yaubada imitukwaii minasina tokaivalulu, paila uula minasina ikukolaisi Yaubada, e itagwala biunaisi litusia titoulesi. E mina Isireli tuvaila iunigeyaisi saina bidugaga, deli saina budoveka goli.

²²E kala vigimkovila, guyau matauna isaiki la tomota komwaidosi kasi karaiwaga. Kawala, “Bukuyosisi magudisina gudipwapwawa tauwau mina Iberu e bukulavaisi bilosi wa Waya Naili. Vivila wala bimovasi.”