Read Kilivila SUNAPULA 15 Bible Online

SUNAPULA 15 - Kilivila bible

SUNAPULA 15

¹Tuta baisa Mosese deli mina Isireli iwosisi mapilana wosi baisa Guyau, kawasi. “Bawosi baisa Guyau, paila matauna la tomgwaga saina kabokatubau. Paila bogwa ikatudoum tomota deli si wosa olumoulela bolita.

²Guyau matauna agu tokwala topeula wala. Matauwena wala eikatumovaigu. Matauna goli ulo Yaubada, e bayakawoli matauna. E matauna tamagu la Yaubada, e bawosi paila matauna Tovakaigaga.

³Guyau matauna kumatoula. Matauna goli yagala Guyau.

⁴“E mina Itipita si tokwabilia deli si waga kaibibiu eilavi ilosi olumoulela bolita. Dabala si wota eidoumsi oBolita Pilabweyani.

⁵Tulubwabwau ikuboli matausina, e isabwabulasi isalilisi watanawa makawala dakuna.

⁶“E Guyau, yamam kweyakakata saina kweyapapeula, e itutuvakau nanogu. Lokukwatudoum matausina tilaula.

⁷Kutomgwaga odubasi kam tilaula, e yoku goli giyouveka. Kam leiya ilululu saina nanakwa igibumkulovi matausina, makawala kovasupa nanakwa bigabu susupa.

⁸Kuyuvisau bolita e sopi ila walakaiwa. Sopi ivigaki papala makawala kali, e sopi olopola bolita imili dakuna.

⁹Tilaula matausina ikaibigasi kawasi, ‘Babokavili ayosi matausina. Bogwa bavili si veiguwa e bakau komwaidona avaka magigu. Babiigili ulo puluta e bakau komwaidona avaka avaka iyosisi.’

¹⁰Mitaga ka, Guyau - sivatala wala kuyagisa, e mina Itipita ikanopulasi. Isalilisi makawala tanumnumta ilosi olopola bolita katuposilagi.

¹¹“Mwa, Guyau! Avai yaubada isisu makawala yoku? Availa goli makawala yoku Tobumaboma deli Towalakaiwa? Availaga gagabila bivagi kabutuvatusi deli kaboyowalula, makawala yoku m vavagi?

¹²Lokuyosali yamam kweyakakata e valu watanawa ilupoli kama tilaulasi.

¹³Lokukugwai matausina availa availa lokukoli, paila lokukwatotila makawala, e tokimadagi yoku! E metoya om peula lokuvakadi matausina eimaisi baisa om valu viloubumaboma.[15]

¹⁴Boda ituwoli ituwoli ilagaisi e itatatuvasi deli kasi kokola. Mina Pilisitia ibulukukoli sainela.

¹⁵Tokugwala Edom tuvaila kasi kokola sainela. Mina Mowabi si topapeula bogwa itatatuvasi wala, e mina Kenani ikitumouwaisi si tuvaluwa.

¹⁶Saina kasi kokola eimitaki uwosi, paila bogwa eigisaisi yoku Guyau m peula, e imitaki uwosi gala gagabila bivagaisi avaka, igau tutala m tomota eidadelisi eilosi. Tomota matausina goli lokutaneku metoya okasi katupipi.

¹⁷E lokumai matausina e lokubudi si valu om koya. Paila yoku Guyau lokunigibogwi makwaina paila m valu, baisa goli Bwala Kwebumaboma yoku titoulem lokukwaliai.

¹⁸Mwa, Guyau! Yoku m guyau gala kala vigimkovila, bikanuvagasi wala.”

¹⁹E mina Isireli ililoulasi olumoulela bolita baisa oyabala. Mitaga tutala mina Itipita si waga kaibibiu deli si wosa deli tokwabikuliga bogwa leimaisi obolita, e Guyau ikaimilivau sopi ikuboli matausina.

²⁰E minana navitoubobuta, minawena Eroni luleta yagala Miriam, ikau la sasani, deli komwaidosi vivila ibokulaisi minana, ikatugoregorasi si sasani, deli kaiwosisi.

²¹E minawena Miriam iusiwosi paila minasina, kawala. “Kuwosisi baisa Guyau, paila matauna la tomgwaga saina kabokatubau. Paila matauna bogwa ilavi minasina wosa deli kala tosisila ilosi obolita.”

²²E Mosese ikugwai mina Isireli bisilavaisi Bolita Pilabweyani e bilosiga oviloupakala Sura. Kwaitolu yam ililoulasi oviloupakala, mitaga gala sitana sopi ibanaisi.

²³Oluvi iviloubusisi kwaitala valu yagala Mara, mitaga sopi saina yayana gala gagabila bimomsi. Baisa uula idokaisi Mara.[16]

²⁴E tomota ikavilavilasi ikatupoiyaisi Mosese, kawasi, “Avaka sitana bakamomsi?”

²⁵Mosese inigada peula baisa Guyau, e Guyau ivituloki matauna bubotala kai. E imai mabubona ilavi wa sopi, e sopi ikivili isumokainia. Mapilana valu Guyau isaiki mimilisi karaiwaga baisa matausina kidamwa bipilasi si sisu. E baisa tuvaila iwakoli matausina.

²⁶Yaubada ikaibiga kawala, “Kidamwa bukukwabikuwolaigusi mokwita, e bukuvagaisi avaka duwosisia, deli bukukwabikaulasi ulo karaiwaga, e gala bamipukwaimi metoya wa lelia makwaisina avaka lamai baisa mina Itipita. Yeigu goli Guyau, kami tokatumova yeigu.”

²⁷Oluvi imaisi Elim, e baisa isisuaisi kweluwotala kwaiyu utuwotu deli kailuwolima kailuwoyu pulopola. E baisa ibudaisi si kabosikaiwa opapala sopi.