Read Kilivila SUNAPULA 37 Bible Online

SUNAPULA 37 - Kilivila bible

SUNAPULA 37

¹E Besaleli iyouduli Kabutu Didawogala metoya meku, kala woloula tomwaidona e kala beiyaya yumatala, e lomla yumatala.

²Matauna ipaki goulatoula e ikuboli kai olopola deli otapwala, deli ivigaki kaidadela goulawokuva wala itavina itapatu.

³Matauna iyouduli kwaivasi kala nonoita metoya goula wala, e ikatuvilatu makwaisina okaikela makweyasina kweyavasi, e ivigaki kwaiyu pilatala kwaiyu piliyuwela.

⁴Matauna iyouduli katikewala metoya meku, e ipaki goula ikuboli makaisina katakewa,

⁵e ikaluvisuvi makaisina ononoita makwaisina leikatuvilatu okaipagala didawaga.

⁶E iyouduli katubukolela makwaina metoya goulatoula, kala woloula tomwaidona, e kala beiyaya yumatala.

⁷Itutu goula e ibubuli nayu mauna isim pinupanesi,

⁸e ivitau natana kabulotala katukwabula, e nayuwela kabuloyuwela. Ikatupituki minasina okatukwabula e ivigaki bitovagasisi wala baisa.

⁹E matauna isimapu mauna minasina, matala sola matala sola igisamapusi, e pinupanesi ivakanunuvi katukwabula.

¹⁰Matauna ikatuvilatu tebeli kwaitala metoya meku, kala woloula isividoga, e kala beiyaya okatupoi, e kaikela kala woloula yumatala.

¹¹Odabala makwaina matauna ipaki goulatoula, e kaidadela ipaki goula wala itavina itapatu.

¹²Iyouduli kala kaidada beiyayela kweyatala sikwekula; e ipaki goula wala itavina itapatu.

¹³E iyouduli kwaivasi nonoita paila katakewa, e ikatuvilatu okaikela tebeli owokulula kwaivasi.

¹⁴Nonoita makwaisina paila katakewa, e ikatuvilatu opapala kaidadela tebeli.

¹⁵Iyouduli katakewa metoya meku, e ipaki goula wala otupwasi makaisina.

¹⁶Iyouduli kaboma, viga, kwaibolu, deli kailuya; paila guguwala waini semakavila. E komwaidona guguwa makwaisina iyouduli metoya goulatoula wala.

¹⁷Matauna iyouduli kaitapa kaikela metoya goulatoula. Itutu goula e ibubuli la kabototu deli kaila; e katububulela makaisina lala, luwai, deli lalela. Matauna ibubuligoli kaitinidesila wala.

¹⁸Ibubuli sisilima sisitala sisila opapala, sisitolu pilatala sisitolu piliyuwela.

¹⁹E masisisina sisi, sisitala sisitala kala katububula kaitolu lala kasi gigisa makawala parani iluwaisi e ilalasi.

²⁰E kaila makaina kaitapa la kabototu kala katububula kaivasi lala kala gigisa makawala parani, iluwai e ilala.

²¹Sisitala sisitala lalesi itakasasi kasatinidesila wala ila itobu okaila.

²²Metoya kwaitala wala goulatoula matauna itutu e ibubuli lalela, sisila deli kaila.

²³Ibubuli kailima kaiyu kaitapa paila makaina kaitapa la kabototu, deli ibubuli kaivila kekarisigila kova deli kabomala metoya goulatoula.

²⁴Matauna iyosi goulatoula kala mokaila makawala lima yuwa petala kaula (35 kg), e iyouduli makaina kaitapa la kabototu deli goli komwaidona guguwala.

²⁵Matauna iyouduli kwaitala kabogwabu lula metoya meku, paila bigibugabu lula maiina simasimina. E kala beiyaya deli kala wonaku ibodasi wala pilayu wala imaisi oyumakwasi. E kaikela kala woloula ima okuvilu. E odabala owokulula makwaisina kwaivasi kala sukusaku ivigaki kwetinidesila wala kabogwabu lula.

²⁶Matauna ipaki goulatoula odabala, opapala pilavasi wala deli okala sukusaku, e kaipagala iyouduli goulawokuva wala.

²⁷Iyouduli kwaiyu nonoita okaipagala pilayu wala paila bisuvi katikewala.

²⁸Iyouduli katakewala metoya meku, e ipaki goula otupwasi.

²⁹Matauna igabu vaputuma bulamila kebumaboma, deli bulamila lula maiina simasimina, e maiina bikaipuyuma makawala bulami kaisimasimina.