Read Kilivila SUNAPULA 40 Bible Online

SUNAPULA 40 - Kilivila bible

SUNAPULA 40

¹E Guyau iluki Mosese kawala,

²“Tubukona namatala oyamla kwematala yoku bukukwaliaiya Guyau la Buliyoyova.

³Kukwau Kabutu Didawogala lokusewoya makwaina goli Karaiwaga Kwailuwotala eikikanaki olumoulela e kutapapi makwaina.

⁴Tebeli makwaina kusewoya e odabala kusaili guguwala wotetila. Tuvaila kaitapa la kabototu kusewoya e kuvitau kaitapa odabala makaina.

⁵E kabogwabu lula makwaina eibubulokaisi goula paila bigubugabusi lula maiina simasimina kuvitau omatala Kabutu Didawogala. E kutabodi lulula Buliyoyova.

⁶E omatala Buliyoyova kusaili makwaina kabogwabu paila bigibugabusi lula.

⁷E kailuya makaina kusaili bitowalai Buliyoyova deli kabogwabu lula e kutavikoti sopi olumoulela makaina.

⁸Kutapapi Buliyoyova bitavini bitapatu, e kutabodi lulula.

⁹“Oluvi bukukwabomi Buliyoyova deli goli komwaidona guguwala metoya bulami kaibumaboma bukubulami bivigaki kwebumaboma.

¹⁰Tuvaila bukukwabomi kabogwabu lula makwaina deli komwaidona guguwala metoya bukubulami makwaisina bivigaki komwaidona wala kwebumaboma.

¹¹Deli goli bukukwabomi kailuya makaina toyo la kabototu makawala wala avaka lokuvigibogwi.

¹²“Oluvi bukuvakouli Eroni deli litula bukumai omatala Buliyoyova e bukuluki bikakayasi.

¹³Kuvisikoma Eroni tolula kwamela e kubulami matauna, e baisa bivigaki bogwa lokukwabomi matauna, e matauna bibodi bimila tolula paila biwotitalaigu.

¹⁴E litula kuvisikoma kasi kwama.

¹⁵Oluvi kubulami matausina makawala lokubulami tumasi, e matausina ibodi bimila tolulasi paila biwotitalaigusi. Bulami makwaina bivigaki tolula wotitalela bikanuvagasi odalesi matausina tuta gala biwokuva.”

¹⁶E Mosese ivagi komwaidona avaka Guyau leikaraiwogi matauna.

¹⁷Kwaiyuwela taitu avai tuta bogwa leisilavaisi Itipita, otubukona minana eikalimatala wa yam ikugwa, e Guyau la Buliyoyova ikaliaiisi.

¹⁸Mosese itomiliwoli kokola e ilavi kaitaula, pou deli kaivalapu, e bisiboda. E ibisibodi olumoulela e oluvi ikau kanivisi ipapi Buliyoyova makwaina, makawala Guyau eikaraiwogi.

²⁰E ikau mapilasina pilayu dakuna pilapupatata isewoya olumoulela Kabutu Didawogala. Ikovisuvi kaitakewa oponanesi didawaga e ikatubukoli makwaina.

²¹Oluvi isewoya oBuliyoyova e isagi kala taboda paila bitabodi. E baisa makawala itabodi Yaubada la Kabutu Didawogala, makawala Guyau eikaraiwogi.

²²Isaili tebeli olumoulela Buliyoyova mapilana piliyavata otuboulola taboda,

²³e odabala isaili beredi makwaisina eisemakavaisi baisa Guyau, makawala Guyau eikaraiwogi.

²⁴Isaili kaitapa la kabototu olumoulela Buliyoyova, mapilana opilibolimila omatala tebeli.

²⁵E baisa omatala Guyau ivakanoti kaitapa, makawala Guyau eikaraiwogi.

²⁶Isaili kabolula goula oBuliyoyova omatala taboda,

²⁷deli igabu maiina simasimina, makawala Guyau eikaraiwogi.

²⁸Ilasoya taboda wa lulu oBuliyoyova,

²⁹e baisa opapala taboda isaili kabogwabu lula. Odabala kabolula igabu mauna deli witi ivigaki lula, makawala Guyau bogwa eikaraiwogi.

³⁰Isaili kailuya kabowina oluwalaisi Buliyoyova deli kabolula e ivigogu sopi olumoulela.

³¹Kidamwa avai tuta bisuvisi oBuliyoyova kaina bilokaiasi kabolula, e Mosese, Eroni deli litula tauwau biwinaisi yumasi deli kaikesi baisa kailuya makaina, makawala Guyau eikaraiwogi.

³³E Mosese ididali Buliyoyova deli kabolula, e deli itabodi taboda wa lulu e ikatubodi. E makawala wala bogwa ivinaku youdila komwaidona.

³⁴E tuta matutona mapilana lowalowa ikuboli Buliyoyova e Guyau migila lumalamela ivivivila deli guyugwayula ivakasau makwaina.

³⁵Mauula Mosese gala igagabila bisuvi olumoulela Buliyoyova.

³⁶Tuta makwaina lowalowa bogwa bikaka metoya oBuliyoyova, e mina Isireli bisoguguwasi, e bisupelasi tuwoli kabosikaiwa.

³⁷Mitaga kidamwa lowalowa bisisu baisa, gala goli bisupelasi.

³⁸Tuta komwaidona osi tavina, gagabila bigisaisi mapilana lowalowa baisa Guyau migila odabala Buliyoyova otutala yam, e kova ilululu odabala makwaina Buliyoyova otutala bogi.