Read Kilivila YOBI 10 Bible Online

YOBI 10 - Kilivila bible

YOBI 10

¹Yeigu bogwa eisomitaki wowogu sisu ovalu watanawa. Mwa, kunakaigali ulo kominimani mwau.

²Mwa Yaubada, gala bukukwamogaigu. Mwa, kulukwaigu! Avai vavagi lavagi e lokutabinakaigu agu pakula?

³Ki kudoki baisa bwaina paila bukuvakatutukwaigu makawala? Deli avaka lokububuloki yamam bukuvigaki gala wala dimlela? E oluvi kugigili avaka tomitugaga si nanamsa eininamsaisi.

⁴Yoku m gigisa gala makawala ma gigisa kadai?

⁵E m momova isim kala kalitutila makawala yakamaisi kaina?

⁶E avaka paila bukunainevi wala bukuvinaku komwaidona ulo mitugaga deli bukusisavali wala bukuvinaku komwaidona agu pakula?

⁷Mwa, bogwa kunikoli yeigu gala isim ulo sula, e gala wala availa bikolaigu metoya baisa yoku.

⁸Metoya oyamam kububulaigu deli kusaili katupwaila wowogu, mitaga baisa tuta, mayumalela makweyasina lokububulaigu bukukwatumataigu.

⁹Ka, kululuwai yoku kububulaigu metoya pwaipwaia. Ki baisaga tuta bukukwatumataigu e bakaimilavau bamili pwaipwaia tuvaila ke?

¹⁰Yoku kukwatupewoli tamagu paila biunaigu; e igau wala inagu olopola yoku kuvitubwaigu.

¹¹Yoku kububuli totuwanegu deli wotunula wowogu yavakaveka e kukwapoli totuwanegu metoya viliona deli kanavina.

¹²Yoku bogwa kusakaigu ulo momova, deli m yebwaili ikanuvagasi baisa yeigu, e kuyamataigu asisu wala tomomova.

¹³Mitaga baisa tuta bogwa lanikoli tuta komwaidona yoku kukium wala m nanamsa mwada bukuvisilagaigu.

¹⁴Yoku tuta komwaidona kuiyausaigu wala mwada bukubanaigu bamitugaga, e yoku bukupaiki gala bukuligaiwa ulo mitugaga.

¹⁵Momwela wala bamitugaga, yeigu bogwa lasula baisa yoku, mitaga avai tuta bavagi avaka duwosisia, gala wala sitana agu yakaula. Yeigu saina mmayuyu nanogu e agu mmosila itabodaigu wala.

¹⁶E avai tuta sitana bakamnumonaigu, yoku kuuwaigigu makawala laiyoni eiwawaiga kala mauna. E kuyogagaigu metoya om kabutuvatusi kuuvagi.

¹⁷Yoku tuta komwaidona kubani tosilasola bikamitulaigusi e bikagagaigusi. Kam leiya baisa yeigu tuta komwaidona biyouloveka wala; e tuta komwaidona kunainevi avai keda avai keda paila bukuvisilagaigu.

¹⁸Mwa Yaubada, avaka paila lokutagwala inagu leiunaigu? Ibodi wala bakaligabogwa oluviga tomota bigisaigusi.

¹⁹Kala bwaina gala bagisakola valu, wa sekuya wala basaitaula wa laka.

²⁰Mwa, taga kuyokaikai wowogu. Ki, kaina ulo tuta bogwa eivilalamila ke? Avaka ulo tuta mmwaisala eisisu, ibodi wala bamwasawa.

²¹Yeigu makateki migigu bitamwau e gala wala avai tuta bakaimilavau, balokaia oviluwela dudubila saina dubilikitakita,

²²viluwela dudubila, kaikonigula deli kabotakainowa, mapilana valu kala lumalama ivigaki dudubila wala.