Read Kilivila YOBI 17 Bible Online

YOBI 17 - Kilivila bible

YOBI 17

¹Ulo tuta kaliga bogwa eivakatitaikina e ulo yagisa eikusokusa wala; gala wala avai nanamsa aninanamsi mesinaku wala kaliga.

²Yeigu agigisi wala ammakawala tomota si katudewa baisa yeigu saina mmayuyugaga.

³Mwa Yaubada kukwabwaili ulo biga. Paila yeigu tokamokwita, e gala wala availa ituwoli bikabwaili avaka ulo bigatona.

⁴Yoku bogwa lokukwatubodi ninasi, taga bikatetasi avaka bilivalaisi. Gala bukutagwala matausina bitavilaisi nanogu.

⁵Paila bigivakalela valu ikaibiga tau matauna biuwabu sala paila veiguwa mwada bisakaisi, e paila ola wabu bigidakiga litula.

⁶E baisa tuta tomota iuvisakaisi wala makwaina bigivakala baisa yeigu; e matausina bigiusailigusi omigigu wala.

⁷Ulo valam ivigaki makateki bakau. Yamagu deli kaikegu totuwanawokuva wala.

⁸E matausina availa availa eilivalasi mwada tomitukwaibwaila itutu uwosi paila agu gigisa, e komwaidosi wala ikamogaigusi mwada gala anikoli Yaubada.

⁹E matausina availa availa ilivalasi mwada tokamaiaba matausina bogwa wala eikakikitasi titoulesi tokamokwita.

¹⁰Mitaga kidamwa komwaidosi wala bimaisi itolisi omatagu, yeigu gala wala babani taitala matausina tokabitam.

¹¹Ulo tuta bogwa eikalisau; ulo nanamsa bogwa eimama; deli ulo pikwaku bogwa leiwokuva.

¹²Mitaga lubaigwa eilukwaigusi bogi eidokaisiga yam; matausina eilivalasi mwada makateki biyam, mitaga bogwa lanikoli yeigu igau wala lasisu odudubila.

¹³E ulo pikwaku mesinaku wala pikwakula Tuma, mapilana goli viluwela dudubila bakenu bamasisi.

¹⁴Yeigu laka badoki tamagu, e mwatemwata minasina eikamkomasi wowogu badoki inagu deli luguta.

¹⁵Ki, ibodi bapikwaku avai vavagi tuvaila? Kaina availa ibodi bilukwaigu avai vavagi bapikwaku tuvaila?

¹⁶Avai tuta bakaliga bala wa Tuma e ulo pikwaku komwaidona gala wala bakaligai balau.