Read Kilivila YOBI 19 Bible Online

YOBI 19 - Kilivila bible

YOBI 19

¹Avaka paila kuyomiyuyaigusi metoya omi biga?

³Tuta tuta kukwaluwouwaigusi, e gala kami mmosila paila kubigigagaigusi.

⁴Ka, kidamwa yeigu avagi sula, ammakawala ulo sula biyogagaimi?

⁵Kudokaisi yokomi tobubwaila, e yeiguga sitana wala, deli kudokaisi agu mwau baisa kabosimokwita paila agu pakula.

⁶Ki, gala kugisaisi Yaubada eivagi baisa? Matauna ileiya sikula biyosaigusi.

⁷Adoudou kawagu, “Bogwa laboda lamadada!” mitaga gala taitala inakaigalaigu. Gala taitala ilagi ulo dou paila karaiwaga duwosisia.

⁸Yaubada bogwa eipilibodi keda, e gala gagabila baluvapela, e ikatupwani ulo keda odudubila.

⁹Matauna bogwa eikau komwaidona ulo guguwa, deli bogwa eikatudidaimi komwaidona agu kwamaiaba.

¹⁰Matauna iwogigai wowogu. Matauna ilulu ulo pikwaku, deli iligaimwaigu bayagi deli bamata.

¹¹Yaubada igibuluwa deli kala leiya baisa yeigu. Matauna ivigakaigu makawala kala tilaula mokwita.

¹²Matauna iwitali la tokwabilia biwaigusi. Matausina ikelaisi nobwala deli isiulaisi isipataisi ulo bwala.

¹³Yaubada ivigaki budagwa ileiligusi. Yeigu makawala taitala tomitawasi baisa matausina inikolaigusi.

¹⁴Veyagwa deli lubaigwa ibutusi.

¹⁵Matausina lavauli ogu bwala eilumwelavaigusi. Minasina ulo nawotetila eivigakaigusi makawala taitala tomitawasi deli togilagala.

¹⁶Avai tuta badou taitala towotetila, matauna gala bitama, ilagoli avai tuta akayubabai mwada bipilasaigu.

¹⁷Ulo kwava gala magila maiinela wodogu, deli budagwa tatougu gala magisi bimaisi katitaikinegu.

¹⁸Gugwadi ikaluwouwaigusi, deli avai tuta bigisaigusi bigigilaigusi wala.

¹⁹Lubaigwa mokwita bikasilalaigusi. Matausina saina ayebwaili bogwa eitotubulokaigusi.

²⁰Yeigu bogwa lamila totuwana wala, e wowogu bogwa eideli, e makateki wala bakaliga.

²¹Yokomi segwaia goli! Kunokapisaigusi! Yaubada yamala eikatukululaigu.

²²Avaka paila yokomi kuwaigusi makawala Yaubada leivigakaigu? Ki gala kugisaisi agu mmayuyu bogwa eibodaigu?

²³Magigu sainela taitala biluluwai ulo biga, deli bigini makwaisina wa buki!

²⁴Kaina deli kaitala kaiwawa biteyasi ulo biga odakuna, e biginaisi mabigasina bikanuvagasi.

²⁵Mitaga anikoli taitala guma labuma isisu, matauna igau bima mwada bikabwailigu.

²⁶Kaina goli lelia bogwa eikapwasi wowogu, mitaga makagu gigisa wala bagisi Yaubada.

²⁷Yeigu bagisi matauna omatagu, deli gala badoki matauna tomitawasi. Ulo tuvaluwa bogwa eimama paila kukwaibigasi, kawami,

²⁸“Ammakawala bitavigakaisi bitayomiyuyaisi matauna?” Bogwa lokunainevisi mi vitoki paila bukuwaigusi.

²⁹Mitaga ka, tuta baisa bukukukolaisi puluta, paila puluta makaina bimai Yaubada la gibuluwa paila mitugaga, mapaila bukunikolaisi taitala toyakala[12] isisu.