Read Kilivila YOBI 20 Bible Online

YOBI 20 - Kilivila bible

YOBI 20

¹Mwa Yobi, yoku bogwa kuyomwau nanogu! Mapaila magigu nani bamapu m biga.

³Baisa avaka lokulilivali baisa kubigigagaigu wala; mitaga bogwa lanikoli ammakawala bamapu m bigatona.

⁴Mwa bogwa kunikoli tuta omitibogwa, avai tuta tomota eisibogwa ovalu watanawa,

⁵gala taitala tomitugaga ibani la mwasawa bisisu tuta kaduwonaku.

⁶Matauna ibodi wala bikaitubwa e saina bitoveka, kaina bila isakaila labuma saina towonaku dabala bila ikabikoni lowalowa;

⁷mitaga tutala yagila biuu biyuvisau wala matauna makawala tubumyou. E availa availa bogwa einikolaisi matauna bitakainowaisi ambaisa eila.

⁸Matauna bitamwau makawala mimi, kaina makawala kilisala wa bogi bitagigisi, e gala wala ibodi bitagisivau tuvaila.

⁹Matauna ola bwala wala bitamwauki kala pikowau;

¹⁰e avaka si guguwa tonamakava leiveilau litula biyosasi bikaimilivauwaisi.

¹¹Matauna omitibogwa topeula deli tokaitubwa mitaga makateki wala bimila pwaipwaia.

¹²Mitugaga leikamkoni idoki saina bwainigaga e kwaivilesi ikikapatu wala owodola paila kakamwenasi biyomwasali nanola.

¹⁴Mitaga avai tuta bisalili bila olopola kaula makwaina bidavila biyayana kala yayana ikalisau wala tuva.

¹⁵Tomitugaga matauna igau bilagobi avai veiguwa leiveilau; Yaubada ikikaimali makwaina kaina metoya olopola goli.

¹⁶Avaka tomitugaga bilupoli baisa makawala tuva e bikatumati matauna makawala keiyuna naiyayana.

¹⁷E matauna gala wala bigisi olibe bulamila bititayelu makawala waya, kaina waya makadasina bititayelusi makawala nunu deli kitorina.

¹⁸E komwaidona guguwa leipaisau metoya baisa sala ibodi bikaimilivau, e gala wala avai guguwa bisisu paila biyomwasali nanola,

¹⁹paila uula ilamidadi tonamakava deli gala wala inokapisi matausina deli iyouli si bwala tuwoli tomota eikaliaisi.

²⁰Matauna la gugoveka gala avai tuta bivakomati titoulela.

²¹Avai tuta bikam, bitakopwi wala kaboma, mitaga baisa tuta la sisu bwaina bogwa eitobu.

²²Vakaila la karaiwaga kala peula mitaga baisa tuta mokaila kabomwau komwaidona bikaimapu.

²³Mapaila avai vavagi magila bikam desi wala bikamkwam, paila Yaubada igau bimipuki matauna metoya ola gibuluwa tigininila.

²⁴E avai tuta matauna mwada bivigikoni bisakauligili makaina puluta eiyoudulokaisi tanumnumta aiyani, e kaiyalaga makaina iyoudulokaisi tanumnumta barasi bikaliyau wala bila ikanawa.

²⁵E kaiyala makaina bisuvi bila isunapula; matala kaiyala makaina ibubusi wala buyavila matauna e kokola wala ikatumati matauna.

²⁶La guguwa komwaidona eiyamati bivakadoum wala biwokuva; kova bivakamati matauna deli veyala, mitaga kova makovana availa eivakanoti, gala goli tomota.

²⁷Labuma baisa biyomitali tau matauna la mitugaga, e valu watanawa biyakali matauna.

²⁸Yaubada kala leiya makawala sakala e komwaidona la guguwa bikodidaimi wala biwokuva.

²⁹Baisa makawala tomitugaga kasi mipuki bibodaisi, mipuki makwaina Yaubada bogwa leinagi paila matausina.