Read Kilivila YOBI 22 Bible Online

YOBI 22 - Kilivila bible

YOBI 22

¹Ki kudoki avai tau matauna saina tokabitamgaga matauna ibodi biyovitavatasi kasitaiyu Yaubada?

³Ki kudoki avaka lokuuvagi duwosisia bibodi bisaiki vavagi bwaina baisa Yaubada, kaina kudoki m kwamaiaba bibodi bipilasi matauna?

⁴Yaubada eikavilakaim e isailim okaboyakala, gala paila uula kukwabikuwoli matauna.

⁵Mwa, gala makawala, ka, paila uula saina mokuvavagi mitugaga; deli uula saina mokuvavagi sula.

⁶Kidamwa bukuluki tuwam bimapu m mani avaka leiwasi, yoku bogwa wala lokukwau kala karekwa e gala kuligaiwa avaka paila bisikam.

⁷Yoku gala kutagwala bukuvimom sopi availa matausina isomatasi, deli gala kutagwala bukuvakoma tokamolu.

⁸Yoku m kwaraiwaga saina peula deli gala isim kam kokola mapaila lokuyouli pwaipwaia komwaidona.

⁹Mokwita kwabuya kasi pilasi lokupaiki, mitaga tuvaila kukopatu deli kuyomiyuyu magudisina weilova.

¹⁰Mapaila kabosilagi eitavinaim wala eitapataim, e bukutakainau kokola wala bikatumataim.

¹¹Bivigaki saina dubilikitakita e gala wala ibodi bukugisi avaka, e dadoya bikubolaim.

¹²Ka, Yaubada isisu wa labuma mapilana saina walakaiwa, e ikululukiga utuyam osikowala ilagoli minasina deli wala walakaiwa!

¹³E kukwatupoiga kawam, “Avai vavagi sitana Yaubada einikoli? Matauna bogwa eitobodi lowalowa - e ammakawala bivigaki biyakalaidasi?”

¹⁴Ki kudoki lowalowa saina poupou gala ibodi bigisaidasi avai tuta bililoula okaligeila labuma deli valu watanawa?

¹⁵Ki, bogwa eitobu nanom bukulouya si keda tomitugaga makadasina tuta komwaidona bilalouyasi?

¹⁶Igau gala bibudoki si tuta kaliga dadoya idumyelu wala matausina.

¹⁷Matausina goli kala tokowolova Yaubada, e idubumaisi mwada Yaubada gala wala avaka bivigaki matausina.

¹⁸Mitaga Yaubada wala leivigaki si kaisisu eipeula - ka, gala wala itapuloki nanogu avaka tomitugaga si nanamsa.

¹⁹Tomitukwaibwaila imwasawasi deli tobubwaila igigilasi avai tuta bigisaisi tomitugaga bibodaisi kasi mipuki.

²⁰Komwaidona si guguwa tomitugaga bidadaimisi wala e avaka kesala bisisu kova bivakamtumtu wala biwokuva.

²¹Mapaila Yobi, tuta baisa ibodi bukuvasosusi som Yaubada e desi taga tuvaila kutilaula baisa matauna. Ka, kidamwa bukuvagi makawala, matauna bimitukwaiyaim.

²²Ibodi bukukwabikuwoli la vituloki isisaiki deli kwatukikiti la biga onanom.

²³Ibodi deli nanom watanawa bukukwaimilavau baisa Yaubada, deli komwaidona mitugaga lokuuvagi om bwala kwatuyouli kuligaim.

²⁴M goula komwaidona kuligaim; m goula goulatoula kubaku otukutakula waya.

²⁵E kaimapula, Yaubada Topeuligaga bukuvigaki m goula, deli matauna m siliba gulovakaigaga goli.

²⁶E tuta komwaidona bukudubumi wala Yaubada, e bukubani matauna wala uulela m mwasawa.

²⁷Avai tuta bukunigada baisa matauna bimapwaim goli, e avaka m biga katotila bogwa wala bukuvagi.

²⁸E avaka komwaidona bukuvagi bogwa wala bukupeula; e lumalama bivisigili m keda.

²⁹Yaubada ivabu matausina ninasi walakaiwa, mitaga ikoli matausina ninasi watanawa.

³⁰Kidamwa yoku tobwaila deli bukuvagi avaka duwosisia, matauna bogwa bikolaim.