Read Kilivila YOBI 24 Bible Online

YOBI 24 - Kilivila bible

YOBI 24

¹Avaka paila Yaubada gala inagi tutala kaboyakala; kaina inagi yamla kasi kabwaila matausina eiwotitalaisi matauna?

²Tomota isisaibibilasi kaligei paila biyoulisi tuvaila si pwaipwaia; matausina iveilauwaisi sipi e ilauwaisi isegolaisi deli si yawa.

³Matausina tuvaila iveilauwaisi si ase magudisina weilova, deli kwabuya la bulumakau biyosikikitaisi wala tatoula minana bimapumkulovi kala wasi, oluvi bikaimalaisi.

⁴Matausina isilibodaisi tonamakava gala bikauwaisi avaka si vavagi tatousi, deli ikaliyabaisi matausina ilosi wala iwowausi.

⁵E mapaila tonamakava binainevisi wala kʹasi oviloupakala, makawala wala ase nabubolodila, e gala wala ambaisa tuvaila ibodi bibanaisi kaula paila bivakomasi litusia.

⁶Matausina bititayoyuwasi osi bagula ituwoli tomota, deli bikikauwaisi kaiuwala waini osi bagula tomitugaga bigulesi waini.

⁷E wa bogi bimasisisi bikanumakavasi wala tomdumwadu; deli gala wala avai vavagi paila tabodala kasi numla.

⁸Kuna wa koya bikunumati wala matausina, e bikanapitukwaisi raibwaga mwada bisipepunisi.

⁹Tomitugaga ikatulebwaisi magudisina gudikubukwabuya metoya okasi nunu e ilauwaisi ivigakaisi si ula; deli ikauwaisi tonamakava litusia e ivigakaisi mapula kasi wasi.

¹⁰E tonamakava bililoulasi tomdumwadu wala gala avaka bikapolaisi uwosi; matausina deli wala kasi molu bititayoyuwasi witi.

¹¹Matausina bipulopolasi olibe paila bulami, deli kaiuwala waini paila waini tovala, mitaga daka ipakalaki wala kaiyasi.

¹²Olopola valu vilouveka matausina isim kasi kalibwaga deli makateki bikaligasi idoudousi paila pilasi, mitaga Yaubada gala wala inakaigali si nigada.

¹³Mimilisi tomota ipakaisi lumalama; paila gala itapuloki ninasi avaka lumalama, kaina gala ibokulaisi ambaisa eivisigili.

¹⁴Tutala ikikivi visiga tokatumata bitokaia wala bisunapula bikatumati tonamakava, e wa bogi matauna biveilau.

¹⁵E tokailasi biuwayausa wala momwaila wala bidudubali matala; matauna bikatuduvidavi wala mwada gala availa bivitoki tolosila.

¹⁶E wa bogi toveilau bikikopwalasi wala bwala, mitaga avai tuta biyam bisikubwalasi wala gala magisi availa bigisi matausina.

¹⁷Matausina ikukolaisi yam mitaga dubilikitakita ituviluwaisi kala loula.

¹⁸[13]Tau matauna tomitugaga sakala bidumyelu bilau, e la pwaipwaia eiligaim Yaubada bibuloti; matauna gala tuvaila bila ibigubagula ola bagula bigulesi waini.

¹⁹Makawala sopi bimada metoya yuviyavila waigigi, e makawala goli tomitugaga bitamwausi metoya ovalu watanawa.

²⁰Ilagoli inala tatoula gala wala biluluwai matauna; mwatemwata bisomasi wowola, bitumigeyai makawala kaimilapwasa.

²¹Baisa makawala bikaloubusi paila uula iyomiyuyu kwabuya, deli gala inokapisi minasina kʹaliga.

²²Yaubada metoya ola peula ikatudoum availa availa matausina topapeula. Tutala Yaubada bivitakaula - e matauna tomitugaga bikaliga.

²³Kidamwa Yaubada bitagwala bikoli matauna, mitaga tuta komwaidona biiyausi wala matauna.

²⁴Tomitugaga la kaisisu bikobaluluva tuta pikekita wala, e oluvi bimwailela makawala mnumonu; kaina makawala taitu bitakapituni otutala tayoyuwa.

²⁵Ki, availa ibodi bikamitulaisi kidamwa gala bikaloubusisi makawala? Availa idoki ulo biga sopawokuva wala?