Read Kilivila YOBI 28 Bible Online

YOBI 28 - Kilivila bible

YOBI 28

¹[16] Mimilisi valu ikikelaisi siliba metoya opwaipwaia; mimilisi valu goula kala kabokatumigileu isisu.

²Tomota ikelaisi tanumnumta aiyani metoya opwaipwaia. e ikaliulaisi tanumnumta kopa metoya odakuna.

³Tomota bogwa eisisavalaisi ambaisa saina dubilikitakita. Matausina inainevisi ambaisa tikutakula valu watanawa e ikikelaisi dakuna ambaisa saina dubilikitakita.

⁴Saina kaduwonaku olumoulela pwaipwaia tomota gala isisikaisi, kaina tomota ililokaisi, tomota ikelaisi nobwala paila si keda bibubusi bilolosi ambaisa osikowala pwaipwaia, e baisa ipupaisewasi wala kasimwaleta, gala wala sesia. E metoya oyuwoyoula imwemwenasi ibubusisi onobwala.

⁵Kaula tabigulaisi odabala wala pwaipwaia, e pwaipwaiaga makwaina wala, mitaga osikowala ikelisasaisi wala imoiyaisi iligaimwaisi.

⁶Dakuna makwaisina olumoulela pwaipwaia ikalumoli deli dakuna sapaya. E dakuna makwaina tubumyoula olumoulela isisu goula.

⁷Kilakila gala ibodi bigisi kedala bila ambaisa eikilikelisi, deli gala avai tuta natana mluveka ikukwaiyoba odubasi matausina.

⁸Gala avai tuta laiyoni kaina avai mauna minasina nagigasisi bisukwaisi keda makadasina tuta komwaidona kadaukuwokuva wala.

⁹Tomota ikusovaisi dukumaga, tuvaila koya ikusovaisi wala ikelisauwaisi.

¹⁰Avai tuta bikilikelisi oluwalaisi dakuna, matausina ibubanaisi dakuna makwaisina kwaivivivila saina mwau mipusi.

¹¹Matausina ikilikelisi wala ilosi isakailasi ambaisa waya eivitouula e matausina ivisunupuloiyaisi vavagi makwaisina kwekatupwana omilakatila.

¹²Mitaga kabitam ambaisa ibodi bitabanaisi? Availa ibodi bivitulokaidasi gagabila bitakatetasi?

¹³Kabitam gala bitabani metoya baisa tomota; gala availa inikoli kabitam mapula mokwita.

¹⁴Tilibwabwau deli bolita komwaidona iyakalibwabwailasi wala, kawasi, “Kabitam gala kasisiaisi.”

¹⁵Kabitam gala ibodi bitagimloki metoya siliba kaina goula.

¹⁶Goula saina kwevivivila deli soulava mapusi gala wala ibudoki mapula kabitam.

¹⁷Kabitam saina vavagi kwaiveka, ikalisau goula. Ikalisau kwelatala bolu eibubulokaisi metoya goula deli kwelatala viga kwelavivivila.

¹⁸Kabitam mapula ikalisau mapusi lada, dakuna yasipa, deli dakuna kwevivivila yagala rubi.

¹⁹Dakuna yagala topasi saina kwevivivila deli goulatoula mapusi gala wala ibodi kabitam mapula.

²⁰E mitaga kabitam uulotoula ambaisa ibodi bitabani? Ambaisa ibodi bitakeulasi da nikolaisi gagabila bitapuloki ninadaisi?

²¹Bubuli kwemmomova gala kwaitala ibodi bigisi kabitam, ilagoli mauna biyoyowa mitaga gala wala bigisi.

²²Makawala goli kaliga deli kabomwau si kamatula, bulogala wala ilagaisi.

²³Yaubada wala kalamwaleta inikoli kedala. Matauna inikoli ambaisa kabitam eikikanaki.

²⁴Paila matauna matala la gigisa bilai bila wala obusibusila valu watanawa. Bubuli komwaidona osikowala labuma igigisi wala iwokuva.

²⁵Avai tuta Yaubada isaiki yagila la peula deli ivitobu bolita kala vakaila;

²⁶avai tuta Yaubada leinagi ammakatupona kuna bikuna, deli lowalowa si keda mapilasina pilapala biwawai;

²⁷e metoya baisa matauna igisi kabitam e iwakoli ammakawala la peula - e matauna ikabwaili makwaina.

²⁸Yaubada iluki tomota kawala, “Kidamwa magimi bukukwabitamsi, e ibodi wala bukutemmalaigusi yeigu Guyau. Kidamwa magimi bitalapula ninami e ibodi wala bukusivilasi metoya omi mitugaga.”