Read Kilivila YOBI 29 Bible Online

YOBI 29 - Kilivila bible

YOBI 29

¹Yobi tuvaila ivitouula la bigatona.

²O kidamwa ibodi ulo kaisisu bibwaina makawala omitibogwa Yaubada eiyamataigu.

³Wa tuta matutona Yaubada eisikailigu tuta komwaidona, e tutala aliloula odudubila matauna ititapi ulo keda.

⁴Baisa eikaloubusi tuta matutona ulo kaisisu igau bwaina, e Yaubada la mitakwai ikoli ulo valu.

⁵Yaubada Topeuligaga deli wala yeigu wa yam makwaisina, e komwaidosi litugwa isiulaigusi isipataigusi.

⁶Ulo bulumakau deli ulo gota tuvaila nunusi gala bitakaibiga deli ulo kai olibe isususinasi ambaisa saina kabigaga.

⁷E avai tuta kaidadala valu bisigugulasi yeigu asiwalai wala matausina,

⁸e avai tuta tubovau bigisaigusi bavalapula e bivapalasi wala ulo kedaga, e tommoya itomalaulasi paila bivitulokaisi agu kwamaiaba.

⁹Tokaraiwogala valu ikapatusi;

¹⁰makawala goli matausina todidabala tauwau ikikwatusi wala.

¹¹Availa availa matausina eigisaigusi kaina ilagaisi bulogagu, si bigatona bwaina ililivalaisi paila avaka bogwa lavagi.

¹²Tutala tonamakava idousi paila pilasi yeigu apilasi matausina. Yeigu apilasi weilova magudisina gala si kabosisu.

¹³Tomota matausina bogwa eiyayayasi wa laka iyakawolaigusi. E yeigu apilasi kwabuya paila ambaisa bibanaisi bikwalasi.

¹⁴Yeigu ulo karaiwaga duwosisia deli bwaina.

¹⁵Yeigu tuta komwaidona tokwau idokaigusi mitasi, deli topem idokaigusi kaikesi.

¹⁶Yeigu avigaki tonamakava makawala litugwa, deli apilasi tomitawasi osi tuta mwau.

¹⁷Yeigu akodidaimi si peula todubakasala; e akoliga matausina eilamidadaisi.

¹⁸Tuta komwaidona apikwaku mwada ulo tuta bikaduwonaku ovalu watanawa e manum wala basisu ogu bwala kaligagu bakaliga.

¹⁹Yeigu makawala kaitala kai kailawalila tuta komwaidona sopi biuvinumli; deli sisila tuta komwaidona numla wala biyopwatutu.

²⁰Tuta komwaidona tomota biyakawolaigusi wala, deli ulo peula gala avai tuta ivakapusiaigu.

²¹Avai tuta bakatuloluta, tomota bimanumsi wala biligalegasi avaka balilivali;

²²matausina gala wala avaka bilivalaisi avai tuta bavenoku bigatona. Ulo biga kala bwaina ikau ninasi, makawala kuna la pilasi kala bwaina;

²³komwaidosi wala ikabwailisi ulo bigatona; makawala wala tobigubagula ikabwaili kuna kala bwaina otutala biguvau.

²⁴Yeigu migigu mwamwasila wala baisa matausina avai tuta binokubukubusi, e okala mwamwasila wala migigu bivigaki ninasi bibwabwaina.

²⁵Ulo karaiwaga titoulegu anagi avaka bibodi, e akugwai matausina makawala taitala guyau bikugwai la tokabilia okawakali; yeigu akatigam luposi avai tuta si pikwaku biwokuva.