Read Kilivila YOBI 30 Bible Online

YOBI 30 - Kilivila bible

YOBI 30

¹Mitaga baisa tuta tubovau bikikatudeuwaigusi wala! Matausina tumisia tuta komwaidona gala wala dimlesi, e yeigu gala wala ibodi batugwali matausina bipilasaisi ulo kaukwa paila biyamatasi sipi.

²Matausina budotala tomamama saina mama uwosi gala gagabila bipilasaigusi.

³Matausina saina tonamakava, deli bigigadi wala molu avai tuta bibogi ovilouwokuva, e mwada kailawalisi kai bivigakaisi kʹasi.

⁴E avai vavagi wala bisususinasi oviloupakala matausina ivigakaisi kʹasi, deli goli avai vavagi gala takamkoma matausina bikomasi wala!

⁵E tomota komwaidona ikawotasi ikaliyabaisi matausina, makawala wala kasi kavilaki toveilau.

⁶Matausina isipepunisi wa lagi kaina onobwala eikelaisi opapala dibodebula.

⁷Olumoulela udila matausina bigougwausi makawala mauna bigougwausi, e bikanapitukwaisi wala gulitinidesi olawodila.

⁸Matausina gweiluva deli gala wala dimlesi gala bitadoki tauwau, bogwa eikaliyabaisi matausina.

⁹Mitaga baisa tuta matausina imaisi e igigilaigusi wala; ivigakaigusi si kaboyousokana wala.

¹⁰Matausina ikayuwaigusi; si nanamsa mwada avaka si lamamada baisa yeigu ivigakaisi si kabomwasawa sainela, deli goli imaisi igiuwaisi migigu.

¹¹Paila Yaubada bogwa eiyomami wowogu mamawokuva wala, mauula deli kasi leiya ilamidadaigusi.

¹²Tomota mabudona ikabiliaigusi e ikalisalaigusi; matausina ikatuliloiyaigusi wala; e ikatubaiasasiga avaka si nanamsa kala vigimkovila paila yeigu.

¹³Matausina ivabodaisi ulo keda mwada bikatumataigusi; e gala wala availa bisibodi matausina.

¹⁴Ambaisa lavigaki ulo kabokwala matausina ikodidaimsi, e iwokaiagusi wala ikanakailagusi;

¹⁵e kokola wala ikatumataigu; yeigu ulo sisu walakaiwa iwokuva makawala myala yagila, bimya wala bima, bimyeia; deli goli ulo kaisisu kala bwaina eitamwau makawala lowalowa, bibeu wala bimai e bilau.

¹⁶Mapaila makateki wala bakaliga; paila gala wala sitana abani agu yovaiwasi metoya agu mmayuyu.

¹⁷Avai tuta bibogi totuwanegu komwaidona bikamkumku wala biwokuva metoya gidageda makwaina, gala iukuwokuva, tuta komwaidona bigweimilaigu wala.

¹⁸Yaubada ilitaki agu kwarekwa okaigadugu; e ikodidaimi wala dadaimiwokuva miyasina.

¹⁹Matauna ilavaigu ala opwadidiweta; e agu gigisa gala tagiligali makawala wala pwadidiweta.

²⁰O Yaubada, adou baisa yoku, mitaga gala wala avai tuta kuvitakaulokaigu; e avai tuta banigada gala wala kulilagi ulo nigada.

²¹Yoku kuvakatutukwaigu saina mmayuyu; deli kulamidadaigu metoya om peula komwaidona.

²²Yoku kutugwali yagila biyuvisauwaigu; deli kukwatuvivilaigu wala metoya outuyagila.

²³Bogwa lanikoli makateki bukuvakaligaigu, e balokaia oviluwela kaliga, baisa goli lokukwatubiasi paila tomota komwaidona.

²⁴Mwa, avaka paila kuyomiyuyu tau matauna togweiluva, matauna goli gala kali yeiwau mesinaku binigada wala baisa yoku paila bukunokapisi matauna?

²⁵Ki kudoki gala auvilam tomota matausina eibudobodasi mwau, deli anokapisi tonamakava?

²⁶Yeigu lapikwaku babani ulo mwasawa deli babani lumalama mitaga kaimapula abani mwau deli dudubila.

²⁷Ninamwau deli mmayuyu bogwa wala eiyogagaigu, yam kwaitala kwaitala agu mmayuyu isisiniveka wala.

²⁸Yeigu baliloula todubiyou wala, gala sitana subusobula wowogu; yeigu batowala omitasi e bakayubabai paila pilasi.

²⁹Kaigagu butula saina kakapisi lula makawala kaigala natana ugiwagi bigougwau; kaina makawala kasuwari bigilagela.

³⁰Kanuvinegu bogwa eivabwau; e kuluyuviyavi eilulu wala olumoulegu.

³¹Igau otobwailagu ulo kaisisu saina bwaina, e gita deli loloni butusi kabomwasawa, mitaga baisa tuta ninamwau deli valam eiyogibwaigu tuta komwaidona.