Read Kilivila YOBI 31 Bible Online

YOBI 31 - Kilivila bible

YOBI 31

¹E bogwa lalivala biga katotila saina peula, kidamwa gala bikewakewa matagu baisa natana vivila mwada bakasaimwali.

²E avaka ivigakaidasi Yaubada Topeuligaga? Ammakawala matauna bimapu tomota avaka avaka eivagaisi?

³E iwitali kabosilagi deli kabommayuyu baisa matausina eimitugagasi.

⁴Yaubada inikoli wala komwaidona avaka lauvagi, e igigisi komwaidona bakwaigu laliloula.

⁵Yeigu alivala biga katotila mwau, yeigu gala avai tuta ladubakasala, deli gala avigikoni basipuloki tomota ituwoli.

⁶Ibodi Yaubada bivisaikolaigu metoya ola kabovisaikola kaikamokwita, e matauna bigisaigu tobwaila wala yeigu.

⁷Ka, kidamwa bogwa latotubuloki metoya okedala bwaina, kaina atugwalaigu bamitugaga, e kidamwa yamagu eikipigatu mitugaga,

⁸ibodi wala ulo bagula bikodeiwaisi, kaina ituwoli tomota bikomasi k ʹagu avaka labiguli.

⁹Kidamwa yeigu bikewakewa matagu la kwava sogu, e basipepuni ola kaukweda atutuli minawena opapala la lulu,

¹⁰e oluvi bibodi batugwali ulo kwava bisulu k ʹala taitala ituwoli tomota, e bimasisisi kasitaiyu tuta tuta.

¹¹Ka! Kidamwa bamitugaga makawala baisa, ibodi agu mipuki kaliga wala.

¹²Mipuki makwaina bivigaki makawala kova bigibumkulovi wala e gala avaka kesa bisisu, bivakammwaisi wala avaka avaka ulo guguwa.

¹³Kidamwa taitala ulo touwata bitakulukulu baisa yeigu, yeigu banakaigali e bakiduwosisii kala mwau.

¹⁴Kidamwa gala avagi makawala, ki, ammakawalaga gagabila batotu omatala Yaubada? Ki, avakaga ibodi balivala avai tuta Yaubada bima biyakalaigu?

¹⁵Ka, matauwena Yaubada eibubulaigu, e deli goli matauwena eibubuli ulo touwata.

¹⁶Yeigu gala avai tuta akatuloki tonamakava, e galaga avai tuta atagwala kwabuya bisigagasi olumoulela ninamwau,

¹⁷kaina atagwala gumalawa bikamolusi avai tuta yeigu lakamkwam.

¹⁸Ka, ogu tuta komwaidona yeigu lavauli matausina.

¹⁹Kidamwa labani avai tonamakava, matauna gala iiyosi avaka paila bigimoli kala kwama,

²⁰e ka, yeigu bogwa basaiki matauna kala kwama labubuloki unuunula sipi, e miyana goli lakapituni metoya ogu yawa. E oluvi matauna biyakawolaigu sainela metoya onanola komwaidona.

²¹Kidamwa avai tuta bakoumakavi avaka metoya baisa gumalawa, e deli banikolibogwi kidamwa bogwa batomgwaga okaboyakala,

²²e ibodi goli yamagu bikouwolaisi, kaina bikolakavaisi makweyasina metoya ovilavagu.

²³Gala avai tuta gagabila bavagi makawala baisa, paila uula akukoli wala Yaubada la mipuki.

²⁴E gala avai tuta adubumi guguwa bidubadu,

²⁵kaina akamnomwana paila ulo veiguwa.

²⁶Gala avai tuta atapwaroru baisa minana kalasia saina guyugwayu, kaina goli baisa tubukona minana saina namitabwaila.

²⁷Gala availa bitavili nanogu mwada batemmali minasina, e baviyuwoli yamagu paila kasi taimamila.

²⁸Ka, kidamwa bamitugaga makawala baisa ibodi agu mipuki kaliga wala, e mitugaga makwaina ikikaluwou Yaubada Topeuligaga.

²⁹E yeigu gala avai tuta abani nanogu kala mwamwasila avai tuta agu tilaula ibodasi mmayuyu, kaina amwasawa avai tuta isilagisi.

³⁰Yeigu gala avai tuta anigada paila bikaligasi. Gala avai tuta avagi mitugaga makwaina.

³¹Komwaidona matausina ulo towotetila inikolaisi tuta komwaidona adidouvili tomitawasi.

³²Adou tokwaidadina bisuvisi ogu bwala e deli gala avai tuta atagwala matausina bimasisisi otapwakeda.

³³Mimilisi tomota ivigikonaisi mwada bikatupwanaisi si mitugaga,[17] mitaga yeigu gala avai tuta akatupwani ulo mitugaga.

³⁴Yeigu gala wala avai tuta akukoli avaka tomota bilivalaisi, e gala avai tuta akapatu kaina asikubwala, paila uula mwada lakukoli si kavilavila.

³⁵Ki gala availa binakaigali avaka lalilivala ke? Ka, lalivala biga katotila mwau omatala Yaubada goli, komwaidona avaka lalivala biga mokwita wala. Ibodi Yaubada Topeuligaga bimipukwaigu kidamwa lasasopa. E kidamwa matausina agu totabinona biginaisi komwaidona agu tabinona, e gagabila bagisi makwaisina,

³⁶e yeigu deli wala ulo gisimnaka basaili okaiyogu makawala agu kuwa, kaina basaili odabagu makawala agu kulupaipi.

³⁷E yeigu goli baluki Yaubada komwaidona avaka bogwa lavagi, deli bavatoumoi goli omatala Guyau.

³⁸Kidamwa bayouli baleku makwaisina tuta tuta labiguli e bakoumakavi metoya oyamala tolibaleku mokwita -

³⁹e kidamwa bakoma kalagila baleku makwaina, e matausinaga eisopusi bikikamolusi -

⁴⁰e bwaina, kaimapula kuvi deli taitu, ibodi mnumonu deli kaigunigwaini bisusinasi goli. Baisa kala vigimkovila Yobi la biga.