Read Kilivila YOBI 32 Bible Online

YOBI 32 - Kilivila bible

YOBI 32

¹Paila uula Yobi eidubumi titoulela mwada gala wala isim pikolela wowola, mapaila lubaila kasitaitolu ipakaisi gala tuvaila bivitakaulokaisi matauna.

²Mitaga Eliu itotu katitaikinela Yobi, matauna gala ibodi biyosi kala leiya, paila Yobi eikikabwaili titoulela, e eititabinakiga Yaubada. (Eliu matauna Barakeli latula, e Busa tabula, odalela Ram.)

³Tuvaila matauna saina igibuluwi matausina kasitaitolu Yobi lubaila. Paila gala avai keda ibodi bibanaisi paila bimapwaisi Yobi la biga, e baisa eivigaki kala gigisa mwada Yaubada eisula.

⁴Matauna Eliu molagwadi oluwalaisi komwaidosi, mauula matauna itulotula tatoula wala komwaidosi eivenokusi bigatona.

⁵Avai tuta bogwa leigisi kasitaitolu wala gala ibodi bivitakaulokaisi Yobi, e matauna igibuluwa,

⁶mapaila ivitouula wala ibigatona. Tauwau, yeigu gwadi e yokomi tobubogwami valu, e baisa uula akukolaimi wala balukwaimi avaka ulo nanamsa.

⁷Yeigu ulo nanamsa mwada yokomila bukubigatonasi, paila yokomi tobubogwami valu ibodi bukuyomitalaisi mi kabitam.

⁸Mitaga ka, Yaubada Topeuligaga la baloma isikaili tomota e isisaiki matausina si kabitam.

⁹Gala paila bitatomoya wala e bivigaki bitakabitam kaina bipilasaida paila bitanikoli avaka kamokwita.

¹⁰Mapaila baisa tuta magigu bukunakaigalaigusi; ibodi balukwaimi avaka ulo nanamsa.

¹¹Ka, yeigu gala mogega amanum wala e alilagaimiga kulilivalasi, anakaigalaimi kukwalubakakavasi ammakawala bukuvitoubwelakaisi mi bigatona.

¹²Gala abigatona aninakaigila wala e alagi kumamasi metoya omi bigatona; yokomi gala wala kukwagagaisi avaka Yobi la bigatona.

¹³Ammakawala ibodi bukulivalasi mwada yokomi bogwa kubanaisi kabitam? Yaubada ibodi bimapu Yobi la bigatona, pailaga yokomi bogwa lokumamasi.

¹⁴Tauwau, Yobi eibigitonimi wala e gala yeigu, mitaga yeigu gala goli bamapu la biga, makawala yokomi lokumapwaisi. Wo!

¹⁵Mwa Yobi, bogwa wala meitobu si bigatona, gala wala avai biga gagabila bimapwaisi m biga.

¹⁶Ki, ammakawala - kaina bibodaigu bakapatu e batulotula ke? Ka, eitomakavasi wala eitotusi gala avai biga tuvaila bilivalaisi.

¹⁷Gala goli. Mwa, ibodi bamapu m biga baisa tuta e balukwaim avaka ulo nanamsa.

¹⁸Bigatona bogwa eivakasauwaigu, gala ibodi batulotula. Gala ibodi bakiyumali biga mabigasina.

¹⁹Ka, kidamwa gala sasa paila babigatona, yeigu gala wala batulotula bakawota wala balivala, makawala waini kaiuwala bikopusegi e olumoulela ikasuwoki tovala waini.

²⁰Gala ibodi baminumki; ibodi wala balivala.

²¹Olopola bigatona makwaina yeigu gala ibodi bapii availa; kaina bakamwani availa.

²²Yeigu gala anikoli kamwana, e kidamwa bavagi makawala Yaubada saina nanakwa bimipukwaigu.