Read Kilivila YOBI 33 Bible Online

YOBI 33 - Kilivila bible

YOBI 33

¹Mapaila Yobi, baisa tuta, kunakaigali bibwaina komwaidona ulo biga avaka balukwaim.

²Yeigu ulo bigatona bogwa lakatubiasi onanogu avaka balivali.

³Komwaidona ulo biga kamokwita wala, e yeigu lalilivala biga mokwita.

⁴Yaubada la baloma ibubulaigu e isakaigu ulo momova.

⁵Mwa, avaka m nanamsa kukwatubaiasa, e kidamwa ibodi bukumapu ulo biga, bwaina wala.

⁶Ka, yoku, deli yeigu, makawala wala omatala Yaubada, kadataiyu wala eibubulokaida metoya pwaipwaia.

⁷Mapaila gala wala avaka uula bukukukolaigu, yeigu gala ibodi bakadubalaim.

⁸Ka, baisa makawala lanakaigalaim lokulivala,

⁹kawam, “Yeigu gala wala isim pikolela wowogu; deli gala wala avai sula avagi. Yeigu tobwaila deli gala ayomituli avai mitugaga.

¹⁰Mitaga Yaubada iuvitoki wala ammakawala biyogagaigu deli ivigakaigu makawala kala tilaula yeigu.

¹¹Matauna iyuwoli kaikegu oyuwoyoula e imitakavati ulo motatina komwaidona.”

¹²Mitaga ka, Yobi, biga mokwita alukwaim bogwa lokusula. Yaubada gala makawala tomota, matauna saina walakaiwa sainela.

¹³Avaka paila kutabinaki Yaubada mwada gala avai tuta imapu taitala tau la biga?

¹⁴Ilagoli Yaubada tuta komwaidona bililivala wala mitaga gala wala availa inakaigali avaka la biga.

¹⁵Avai tuta tomota bimasisisi wa bogi, e Yaubada bibigitoni metoya wa mimi deli okilisala.

¹⁶Matauna ivigaki matausina bilagaisi la biga, mitaga matausina ivigaki kasi kokola avaka la katuloluta.

¹⁷Yaubada iluluki matausina bisimwaisi mitugaga, e bikoli matausina taga bikaiveka ninasi.

¹⁸Matauna gala bitagwala bikatumataisi; mitaga ikoli matausina metoya okaliga.

¹⁹Yaubada biyokili matala taitala tau metoya lelia, e ivigaki wowola bikikamkumku wala biwokuva.

²⁰Tokatoula matauna kala kaitubwa bitamwau kidamwa bigisi kaula kalamatabwaila bidoki kala mineina wala.

²¹Wowola bikikisi wala gagainawokuva totuwanela bisisilasi wala biwokuva;

²²e la tuta bogwa eivakatitaikina bikaliga.

²³Kaina taitala anelosi ibodi bima bipilasi matauna - anelosi matauna bima oluwalaisi lakatuluwovila Yaubada la anelosi, matauna goli isim la koni bikatululuwai tomota paila avaka bibodi si wotetila.

²⁴Anelosi matauna deli la nokapisi bilivala kawala, “Kutaneku matauna! Matauna gala bikaliga. Ka, baisa yuvisala yamam e kutaneku matauna.”

²⁵Matauna wowola bitakasa deli bipeula tuvaila;

²⁶e avai tuta binigada, Yaubada bivitakauloki matauna; e matauna deli la mwasawa bitemmali Yaubada. E Yaubada tuvaila bikiduwosisii vavagi komwaidona paila matauna.

²⁷E oluwalaisi tomota matauna bilivala kawala, “Bogwa lamitugaga deli bogwa lasula, mitaga Yaubada ikolaigu.

²⁸Matauna ikolaigu gala akaliga; e tuta baisa asisu wala tomomova.”

²⁹Yaubada tuta komwaidona iuvagi wala makawala;

³⁰matauna ikoli taitala tomota la momova, e ivigaki matauna bimwasawa ola tuta komwaidona.

³¹Mapaila Yobi, kunakaigali avaka lalilivali; kukwapatu e balivalaga.

³²Mitaga kidamwa avaka sitana m nanamsa bukulivala, bwaina kulivala balagi; e yeigu deli ulo mwasawa bakabwailim.

³³Mitaga kidamwa gala, desi wala kukwapatu e kunakaigalaigu, e yeigu bavitulokaim ammakawala bukukwabitam.