Read Kilivila YOBI 34 Bible Online

YOBI 34 - Kilivila bible

YOBI 34

¹Tauwau, yokomi saina tokabitam deli saina toninitalapula; kunakaigalaisi avaka alilivali tuta baisa.

³Ka, yokomi kunikolaisi wala kaula kalagitoula kala kamkwam. Mitaga gala kunikolaisi bigala kabitam avai tuta kuligalegasi.

⁴Ibodi yakidasi wala bitakibubotaisi pakula makwaina.

⁵Yobi eilivala mwada matauna tobwaila, e kawala Yaubada ipaiki gala bisaiki matauna karaiwaga duwosisia.

⁶Matauna ikatupoi kawala, “Ammakawala ibodi basopa e balivala bogwa lasula? Yeigu isim agu kalibwaga saina mwau, mitaga gala avai mitugaga avagi.”

⁷Tauwau, avai tuta sitana kugisaisi avai tau makawala Yobi? Matauna goli gala ikamiabi Yaubada.

⁸Matauna biuvakatu tomitugaga e bititainamakava wala deli matausina.

⁹Matauna eikaibiga kidamwa bitavigikoni bitabokuli Yaubada nanola, gala wala avaka kala bwaina bitabani.

¹⁰Tauwau, yokomi toninitalapula, ka, kunakaigalaigusi! Ki, kudokaisi Yaubada Topeuligaga ibodi bivagi mitugaga?

¹¹Ka, matauna imitukwaii tomota paila avaka avaka iuvagaisi e binagi avaka bibodi taitala taitala la bubunela.

¹²Yaubada Topeuligaga gala wala immitugaga; matauna gala avai tuta biyogagi availa.

¹³Ki Yaubada eibubani la peula metoya baisa availa kaina? Kaina availa inagi Yaubada paila bikaraiwogi valu watanawa?

¹⁴Ka, kidamwa Yaubada bikau da momova yagisela,

¹⁵e komwaidodasi mwada tammwamovasi, bitakaligasi, e bitamili pwaipwaiasi tuvaila.

¹⁶Kidamwa yokomi tokabitam ibodi bukunakaigalaigusi.

¹⁷Ki yokomi kukwamogaisi Yaubada tomitakwai ke? Ki kudokaisi matauna gala iyebwaili karaiwaga duwosisia?

¹⁸Yaubada wala ikamogi gweguya deli tokaraiwogala valu, kidamwa matausina gala dimlesi kaina tomitugaga.

¹⁹Matauna gala ipilasi tokaraiwaga kaina ipii matausina bidubadu si guguwa e bilamidadiga tonamakava, paila uula matoulela wala eibubuli komwaidosi matausina.

²⁰Taitala tau kaina bitakainau wala la kaliga wa bogi. Yaubada iwaiya tomota e ikaligasi, matauna gala wala bikabi peula bikatumati topapeula.

²¹Matauna imitakavati tomota da loulasi.

²²Dubilikitakita dudubalela mitaga gala ibodi taitala tomitugaga bisipepuni metoya baisa Yaubada.

²³Yaubada gala bikaiki wowola paila biluvituti tomota si tuta paila bilokaiasi e biyakali matausina.

²⁴Matauna gala ikaiki wowola paila biyolibiga bikugwa e oluviga bivabu availa matausina tokaraiwaga e bikaimapuga towovau.

²⁵Paila matauna bogwa wala einikoli avaka avaka eiuvagaisi; matauna ilisilai matausina metoya osi kabosisu e wa bogi ikatudoum matausina.

²⁶Matauna imipuki tomitugaga omitasi komwaidona tomota,

²⁷paila uula matausina ipakaisi bibokulaisi nanola; deli ikoulovaisi komwaidona la karaiwaga.

²⁸Matausina ikominimanaisi tonamakava bidousi baisa Yaubada, e matauna inakaigali si nigada paila pilasi.

²⁹Kidamwa Yaubada gala biwonana bivagi avaka, e gala taitala ibodi bikamogi matauna. Kidamwa Yaubada bitotubuloki tomota, matausina biwaki wala neuya.

³⁰E boda ituwoli ituwoli gala wala avai keda ibodi bivagaisi paila bisilibodaisi tolamadada matausina gala inikolaisi Yaubada mwada bikaraiwogaisi matausina.

³¹Mwa Yobi, ki bogwa kukwamituli m mitugaga baisa Yaubada; e lokukwatotila gala tuvaila bukumitugaga ke?

³²Ki bogwa kukwatupoi Yaubada paila bivitulokaim m sula, deli bogwa kuvitobu nanom gala tuvaila bukumitugaga?

³³Bogwa lokupaiki avaka Yaubada iuvagi. Ki kudoki ibodi bukunakusi paila bivagi avaka magim? Ibodi yoku bukunagi, galaga yeigu, mapaila kulukwaimasi baisa tuta avaka m nanamsa.

³⁴Availa toninitalapula bogwa bikabwailigu! Kidamwa taitala tokabitam binakaigalaigu, bilivala kawala,

³⁵“Yobi la bigatona ililivala metoya ola nagowa. Komwaidona la bigatona gala wala ibodi nona.”

³⁶Kidamwa bukuninamsi komwaidona Yobi la bigatona; e bukubani matauna eililivala makawala taitala tomitugaga.

³⁷Matauna ola mitugaga ikatumkulovi tuvaila kosomapu; e omatadasi goli matauna ikatudeu Yaubada.