Read Kilivila YOBI 37 Bible Online

YOBI 37 - Kilivila bible

YOBI 37

¹Utuyagila ivigaki ibulukukolaigu e kukugu gala wala ibodi bitobu.

²Komwaidomi - ka, kunakaigalaisi Yaubada kaigala, matauna kaigala pilapala butula.

³Matauna ivigaki kavikavila ivisigili labuma, metoya kabulotala valu watanawa ila kabuloyuwela.

⁴Oluvi kaigala butula iyoulapula makaigana kaigibumaboma metoya pilapala obutula. E komwaidonaga tuta kavikavila ikavila.

⁵Metoya Yaubada ola karaiwaga vavagi kabokatubau iyoumatilasi, e makwaisina saina kabokatubau gala ibodi bitakatetasi.

⁶Metoya walakaiwa matauna ikaraiwogi sinou bikapusisi ovalu watanawa, deli iwitali kuna saina kunoveka ivigaki valu idadoya.

⁷Tomota si paisewa matauna ivigaki bisaimwaisi; matauna iyomitali titoulela metoya ola paisewa.

⁸Mauna nabubolodila isuvisi okasi lagi.

⁹Utuyagila iuu metoya opilibolimila e numla saina tula ima metoya opiliyavata.

¹⁰Metoya Yaubada ola yagisa ivigaki bolita itula, e ikivili ivigaki sopi kwekulokula.

¹¹Makawala Yaubada nanola, kavikavila ikavilasi metoya olowalowa, e makawala Yaubada la karaiwaga ibubeusi, ambaisa ambaisa ovalu watanawa komwaidona.

¹³Yaubada iwitali kuna paila bivinumli pwaipwaia. Mimilisi tuta bivigaki kasi mipuki tomota, e mimilisiga tuta biyomitali la mitakwai baisa matausina.

¹⁴Mwa Yobi, kwapiekwati, e kunakaigalaigu ibodi bukuninamsi vavagi saina kabokatubau avaka avaka Yaubada bogwa leivagi.

¹⁵Ki bogwa kunikoli ammakawala Yaubada eikaraiwogi kavikavila ikavila, metoya olowalowa?

¹⁶Ki bogwa kunikoli ammakawala lowalowa ibubeu wa labuma, baisa goli Yaubada la kimidagi saina kabokatubau?

¹⁷Adoki gala wala kadai! Mesinaku wala yoku bukulumkoli kam mmayuyu metoya yuviyavila bolimila bipeididi e biyogagi valu.

¹⁸Ki ibodi bukupilasi Yaubada bukukwatuvakai labuma e bukuvigaki bipeula makawala tanumnumta kwevivivila kala peula?

¹⁹Mwa kulakasi ma bigatonasi ammakawala bakalivalasi baisa Yaubada; paila yakamaisi ninamaisi bogwa eitaboda e gala wala kayosisi avaka bakalivalaisi.

²⁰Gala paila bakatuwasa mwada kamataiyu Yaubada bakabigatona. Avaka uula bayomituli agu pakula e bikatumataigu?

²¹Ka, tuta baisa lumalama wa labuma saina guyugwayu, saina visigala ikalipoki matila gala ibodi bitagisi, e labuma yagila eikatumigileu.

²²E metoya opiliyavata lumalama visigala saina guyugwayu iuvisigili kala vau digadegila, e baisa Yaubada la guyugwayu ivigaki da katubausi goli.

²³Yaubada la peula saina vakaigaga gala ibodi bitalokaiasi katitaikinela matauna. Matauna tomitakwai deli la karaiwaga duwosisia avaka avaka bivigaki mina watanawa.

²⁴E ka, baisa goli uulela komwaidodasi isim da katubausi paila matauna, e baisa uula matauna bitakainau availa availa matausina ikamitulaisi titoulesi mwada tokabitam.