Read Kilivila YOBI 38 Bible Online

YOBI 38 - Kilivila bible

YOBI 38

¹E olumoulela utuyagila[18] Guyau ilivala baisa Yobi.

²Availa yoku kukwatukoyai ulo kabitam metoya om biga takainowa deli bigimakava?

³Mwa! Kutuvaluwa kutokaia e kumapu katupoi makwaisina bakatupoiyaim.

⁴Ki, yoku kusisu avai tuta labubuli valu watanawa? E kidamwa yoku saina tokabitam, ibodi bukulukwaigu paila baisa.

⁵Availa inagi kala vakaila ke? Kaina availa eiuvi ke? Ki, bogwa kunikoli komwaidona mapula ke?

⁶Ki, avakaga kala daga kokolela valu watanawa,[19] e availa eisaili lipumatala ke?

⁷Ka, eikikivi visiga yam makwaina labubuli valu, utuyam iusiwosisi gulitinidesi e mina labuma[20] igougovasi deli si mwasawa.

⁸Tuta matutona valu watanawa eiuni bolita, ki, availaga eisaili kala taboda sopi?[21]

⁹Ka, mayeigula, lowalowa lavigaki bolita kala kwama, e dudubila lavigaki kapolela.

¹⁰Akalituli bolita kaligeila e oluvi akatukikiti kala taboda.

¹¹E aluki kawagu, “Ka, baisa kam kwaligei! Baisa goli kaisaim si paisaga bikalituli.”

¹²Mwa, Yobi! Ki, om tuta tomomova, avai tuta yoku lokukwaraiwogi valu biyam?

¹³Kaina lokuluki visiga bisimitali valu e biiyagi tomitugaga metoya osi kabosipepuni?

¹⁴Yam lumalamela bivigaki dubakaila deli itayatila biyoumatilasi wala, makawala katubilila kakapula, kaina makawala bakwai tagisimlili wala omlomwaluva.

¹⁵Lumalamela yam bivigaki saina migileu paila tomitugaga, deli bisilibodi matausina taga bivagaisi vavagi gaga.

¹⁶Ki, sitana kuliloutala makaduyosina sakala olopola tukutaku ke? Kaina sitana kulilouki tukutaku omilaveta ke?

¹⁷Ki, sitana availa ivitulokaim kalapisilela Tuma, makadana itabodi valu makwaina kwedudubila?

¹⁸E kudoki ammakawala kala vakaila valu watanawa ke? Mwa! Kidamwa kunikoli, ibodi bukumapu ulo biga.

¹⁹E kaina sitana kunikoli lumalama ammetitoya leimaima? Kaina ambaisa uulotoula dudubila ke?

²⁰Ki, igagabila bukuluki lumalama deli dudubila bilosi osi keda okala vigimkovila, kaina bukuwitalivau bikaimilavausi osi bwala ke?

²¹Adoki ibodaim wala, paila yoku saina tomoyabogwa, kadai! E avai tuta labubuli valu watanawa, yoku kusibogwa wala kadai? Woo!!

²²Ki, yoku sitana kula kuvakawoli ulo bwaima makwaina bwaimala numla pilapupwakau deli kuna kwekulokula?

²³Lakatubiasi makwaisina paila tutala mwau, paila yamla yowai deli kabilia.

²⁴Ki, yoku kulokaia valu mapilana kalasia la kaboyuwoula kaina mapilana valu bomatu eiuuu ke?

²⁵Availa ikelisasi la keda kuna kunoveka, e itakeiu la keda kavikavila ke?

²⁶Availa ikaraiwogi kuna bikuni mapilana valu vilouwokuva wala ke?

²⁷Availa ivinumli valu otutala waigigi, kidamwa mnumonu bisusinasi ke?

²⁸Ki, kuna deli numla isim tumasi kaina?

²⁹E availaga inasi sopi kwekulokula deli numla pilapupwakau ke?

³⁰Makwaina ivigaki sopi imila dakuna, e makawala goli gorina ikuli makawala dakuna.

³¹Ki, igagabila bukusailavi gulitinidesi maladana Uluwa, kaina bukutaneku kala sipu maladana Tonabwaga avaka leisipwaisi?

³²Ki, gagabila bukuvakadi minasina utuyam bilokaiasi okasi kweluva, e bukuvituloki si keda maladasina utuyam[22] ituwoli?

³³E kaina bogwa kunikoli uvagila walakaiwa kasi karaiwaga. Ki, gagabila bukukwau makwaisina karaiwaga bukuvigaki kasi karaiwaga uvagila watanawa?

³⁴Gagabila bukudou mapilasina lowalowa e bukukwaraiwogi mwada kuna bima bikunaim ke?

³⁵E kidamwa bukukwaraiwogi kavikavila mwada bikavila, ki, igau bimakaiam bikaibiga kawala, “Mwa! Mayeigu ka!”

³⁶E availaga biluki minana dauta[23] mwada bogwa la tuta niwavila, kaina availa biluki minana kabwaku[24] mwada bogwa bikuna?

³⁷Availa isim la kabitam ibodi bikalau mapilasina lowalowa, e bikivili mapilasina mwada biligabu kuna bikapusi,

³⁸e bisigoli tubumyou bivigaki bimila bidakavava?

³⁹Ki, ibodi bukunevi laiyoni kʹasi paila bikamsi, kaina bukuvakoma minasina laiyoni natutubovau bikomatasi

⁴⁰avai tuta ikanupepunisi okasi lagi, kaina ikanukwenusi okasi nobwala itulotulasi ke?

⁴¹Ki, availaga bivakoma minasina bulibuli avai tuta ititavinasi deli kasi molu, e avai tuta minasina nagugugwadi ikikayayasi baisa yeigu paila kʹasi?