Read Kilivila YOBI 39 Bible Online

YOBI 39 - Kilivila bible

YOBI 39

¹Ki kunikoli minasina gota wa koya avai tuta bivalulusi ke? Bogwa kuvitusi dia nabubolodila eivalulusi, kaina?

²Ki kunikoli navila tubukona minasina eisumasi ke? Ki, sitana kunikoli avai tuta bibodi tutala bivalulusi?

³Ki, kunikoli avai tuta bisitotusi paila bivalulusi, e litusia bikaloubusisi?

⁴Olumoulela udila minasina nagugugwadi bogwa bipeula uwosi, bilosi wala, e gala tuvaila bikaimilavausi.

⁵Ki, availaga eitaneku minasina ase nabubolodila ke? E availa eikilavi minasina leilosi ililoulasi?

⁶Yeigu lasaiki minasina si valu oviloupakala, deli latugwali minasina bisisuaisi oitayatila kwaiyayana.

⁷Minasina gala bivakatitaikinasi ovalu kwenininisi, deli gala availa igagabila bituuyaiya minasina bitouwosisi e biwotetilasi.

⁸Minasina bikikabubunasi wa koya, e baisa goli binainevisi avai vavagi semitamata paila bikamsi.

⁹Ki, ibodi natana bulumakau nabolodila biwotitalaim ke? Ki, kudoki bitagwala bikanam om sikwawa ke?

¹⁰Ki, ibodi bukusikoli natana oyuwoyoula e bukuvigaki minana bitakaiwa ke? Kaina bukuvigaki minana bikeli om bagula ke?

¹¹Ki, kudoki bukudubumi minana ola peuligaga, e bukunakusi mwada minana bivagi m paisewa kwemomwau?

¹²Ki, kuninakusi mwada minana bitaiyau m bagula, e bikouguguli kʹam e bididagi om bwaima ke?

¹³Ka, saina nanakwa natana kasuwari pinupanela bikatupapapasi, mitaga gala wala natana minasina biyowa makawala boituwa.

¹⁴Kasuwari bipoupou poula opwaipwaia wala, paila uula yuviyavila pwaipwaia bivigaki bikaniyabu makwaisina.

¹⁵Minana gala ininamsi paila avai tuta kweyatala kwai bivagunugunu makwaisina, kaina natana bolodila bikagunugunu makwaisina.

¹⁶E minana biuvagi la bubunela makawala makwaisina pou gala poula titoulela. Kaina goli la peula bogwa leiyomadi, mitaga gala wala bikaiki wowola minana.

¹⁷E yeigula lavigaki minana einagowa, e gala wala asaiki la kabitam.

¹⁸Mitaga kidamwa bivitouula bisakaula, minana biyosokani wala avai wosa deli kala tosisila.

¹⁹Mwa Yobi! Ki, yokula lokuvigaki wosa saina napapeula, e kusaiki minasina kasi siyai yauwonaku?

²⁰Ki, yokula lokuvigaki minasina biyuweitaulasi makawala nipawa, deli bivitukukolaisi tomota metoya osi nugwasa?

²¹Minasina gala itoutau uwosi oitayatila. E deli si peula komwaidona, minasina bikomtilasi bilosi okabilia.

²²Minasina gala wala inikolaisi kokola, e deli gala ibodi puluta bitovili bikeiitasi.

²³Guguwala kabilia makwaisina kasi tosisila eiyosisi eikogoregorasi deli eivivivilasi okalasia.

²⁴Itatatuvasi deli si mwasawa minasina ikomtilasi ikugwasi, e kidamwa avai tuta tauya biyuvaisi, minasina gala wala ibodi bitolisi.

²⁵Avai tuta biyuvaisi yuvitala tauya, minasina binugwasisi, deli minasina ibodi wala bisikonaisi maiinela kabilia e oluviga bilokaiasi katitaikina, e bilagaisi kumatoula bibisisaiwausi karaiwogala kabilia.

²⁶Avai tuta kilakila biyosokanaisi pinupanesi biyowasi bilosi opilibolimila - ki, yokula lokuvituloki minasina ammakawala biyowasi ke?

²⁷Ki, natana mluveka bitulotula paila bukukwaraiwogi e oluvi biyoula kala nigwa odubiliwotala koya?

²⁸Minana bimili valu odubiliwotala raibwaga, e sananela raibwaga bivigaki kala kali.

²⁹E metoya baisa minana bimmitakavati katitaikina deli kaduwonaku paila avaka bikatumati bikam.

³⁰Avai vavagi wala bikaliga mluveka bitoulaisi, e nagugugwadi bimomwaisi buyavila.