Read Kilivila YOBI 40 Bible Online

YOBI 40 - Kilivila bible

YOBI 40

¹Mwa Yobi! Bogwa lokusevataisi som Yaubada Topeuligaga. Ki, ammakawala? Bukumapu ulo biga kaina bukukwapatu?

³Mwa Guyau! Ka, bogwa lanagowa. E gala ibodaigu bamapu m biga! Adoki gala avai biga tuvaila balivali.

⁵Paila bogwa lakapeili bigatona.

⁶E metoya outuyagila Guyau ilivilavau baisa Yobi.

⁷Mwa! Kutuvaluwa kutokaia, e bukumapu ulo katupoi.

⁸Ki, magim bukusimokwita mwada avaka lavigakaim baisa gala duwosisia? Kaina magim bukutabinakaigu mwada yeigu tovagigu sula e yokugwa toduwosisia kadai?

⁹Ki yoku m peula makawala ulo peula kaina? E gagabila okaigam bukubutupilapala makawala yeigu?

¹⁰Kidamwa makawala, e bwaina wala kusikam kam kwatububula saina guyugwayu, e bukutokaia deli kam taimamila e deli kam kwamnomwana.

¹¹Bukumitakavati tokamnomwana. Kukwasau kam leiya baisa matausina, e bukuvabu goli bilosi watanawa.

¹²E mokwita goli, bukumitakavati matausina e bukuvabu bilosi watanawa, deli bukuvamkumku tomitugaga okabasi.

¹³Kubaku komwaidosi matausina opwaipwaia. Kukwatupipi matausina bisigagasi wa Tuma.

¹⁴Kidamwaga yoku bukuvagi makawala, yeigu goli tovitouula kam yakaula, e bakamitulaim yoku goli totomgwaga.

¹⁵Ka! Kugisi minana Biemota.[25] Yeigu labubuli minana, e deli goli yoku labubulaim. Kʹala minana mnumonu goli makawala bulumakau.

¹⁶Mitaga wowola saina peuligaga, deli lopola pewolela gala wala bitakaibiga!

¹⁷Yeyunela bikatuponini makawala makaina kai kweisila, e kaikela kweyapapeula goli.

¹⁸Tutuwanela saina kaipapeula makawala barasi, e kaikela makawala koroba.

¹⁹Minana saina kabokatubau, ikalisau komwaidona avaka avaka labubuli! Agumwaleta wala yeigu kala tobubuli gagabila bakalisau minana.

²⁰Kala mnumonu isususinasi wa koya goli, baisaga bolodila si kabomwasawa.

²¹Bikenu okaigunigwaini osikowasi, deli bikanupepuni wa dumia oluwalaisi kivikivi.

²²Makaisina kaigunigwaini deli guvagava opapala waya ivigaki kala kaikwau.

²³Minana gala wala bikukoli sakala yelula. E kidamwa yelula Waya Yoridani bikatusoki migila, gala wala bimwaiki wowola.

²⁴Availaga ibodi bigibu matala minana e biyosiga? Kaina bikatupwi kabulula wa sikula ke?