Read Kilivila YOBI 41 Bible Online

YOBI 41 - Kilivila bible

YOBI 41

¹Ki, kudoki bukubia minana Dokanikani[26] metoya wa bani ke? Kaina bukulisikoli mayela oyuwoyoula?

²Ki, kudoki bukukovisuvi yuwoyoula oponanela kabulula kaina bukutaginouli bani owodola ke?

³Ki, kaina minana binigadaim mwada bukukilavi bila? Ki, kudoki bikayubabai baisa yoku paila nokapisi ke?

⁴Ki, kudoki bivagi bukuninatalasi kamitaiyu e bilivala biga katotila kidamwa biwotitalaim tuta gala biwokuva ke?

⁵Kaina bukusikoli minana makawala natana kanem mauna nayoyowa? Kainaga makawala kwaitala vavagi biyomwasali minasina m nawotetila ke?

⁶Ki, kudoki topwapoula bilagasi paila minana? Kaina togigimwala biyalaisi minana e bigimolaisi ke?

⁷Ki, kudoki bukubasi kanuvinela ogimala, kaina bukukwalivi pwanetala okailatala ke?

⁸Ka, bukukwabikoni sivatala wala, e gala goli tuvaila bukuvigikoni makawala. E yoku gala bukulumwelavi makwaina pogudu.

⁹Kidamwa availa bigisi minana Dokanikani, bimata wowola e bikapusi wala bila opwaipwaia.

¹⁰Paila avai tuta takatumwali minana, saina wala nagigasisi. Gala wala availa ibodi bituvaluwa bitotu omatala minana.

¹¹Kaina availa ibodi biyowaisi kasitaiyu, e oluvi bisisu wala tomomova? Mitaga ovalu watanawa komwaidona gala availa igagabila bivagi makawala.

¹²E ka, ibodaigu wala balukwaim paila minana dokanikani kaikela, e bakamitububuli minana kala vakaila e deli goli la peula.

¹³Gala availa gagabila bitanini minana Dokanikani kanuvinela, e gala availa gagabila bibasi kanuvinela saina kukubadu.

¹⁴E availa ibodi bikalikaki kimwala minana kidamwa bikapogega? Olumoulela goli, kudula saina kabovitukokola!

¹⁵E otapwala ivitodeilisi vayoula itogugulasi gulitinidesi, e peulesi makawala dakuna.

¹⁶Kasatala ila iluvisosu baisa kasayuwela saina kikita, mapaila yagisa gala gagabila bisunapula.

¹⁷E komwaidona wala makaisina ivakikitaisi gulitinidesi wala, e gala wala avai tuta bitabisikili makaisina.

¹⁸E kidamwa avai tuta bibolasi, deli wala lumalama ivivivila, e matala lumalamela makawala kalasia biyuwoula.

¹⁹E metoya owodola isusunapulasi makawala kova ilululu, deli owodola ipeipelasi mlimwali.

²⁰Mseu ibobwau metoya okabulula, mseula makawala wawa igigabu osikowala kulia.

²¹Metoya ola yagisa yuviyavila kova ikata goli, e kova ilululu metoya owodola.

²²Minana kaiyola saina peuligaga e komwaidosi availa bibodaisi minana saina bikokolasi.

²³E gala katupotala kanuvinela katupomama, mitaga kala kasai makawala tanumnumta aiyani kasaila.

²⁴Minana nanola makawala dakuna e gala isim kala kokola, e kala kasai nanola makawala kwaitala binabina.

²⁵Avai tuta minana bilakau, e matausina availa availa saina topapeula bikukolaisi wala minana. Matausina kasi kokola wala biyomami uwosi.

²⁶Gala avai kema ibodi biteya minana, kaina avai gimala, silamata, kaina avai kailatala ibodi biyogagi minana.

²⁷E minana bidoki aiyani kala mama makawala goli wawa, e barasi bidoki saina pwapwasa makawala kaimilapwasa.

²⁸Gala avai silamata ibodi bivigaki minana bisakaula, e dakuna bilavaisi bilokaia minana makawala goli msomsa.

²⁹Minana bidoki bubotala lewa makawala yatala lei wala, deli biyosokani tomota avai tuta bilavaisi kaiyala bilokaia minana.

³⁰Kanuvinela lopola makawala seniseni kaipitupitu. Makaisina bikelisasaisi pwaipwaia makawala bunukwa si loluwa bikelisauwaisi valu.

³¹Minana bikatuluwi bolita makawala sopi bigigibwabula, e ivigaki bipolu makawala bulami polula.

³²Minana saipolula obolita ivivivila otuboulola, e ikiviliga bolita imila polu.

³³Gala avai vavagi ovalu watanawa ibodi bitavitoupati makawala minana, e minana gala wala isim kala kokola.

³⁴Minana bikululuki minasina mauna saina nakaluvalova, e minana goli si guyau buludililama komwaidona.