Read Kilivila YOBI 42 Bible Online

YOBI 42 - Kilivila bible

YOBI 42

¹E oluvi Yobi imapu Guyau, kawala.

²Mwa Guyau! Bogwa lanikolaim komwaidona m peuligaga lokuuvagi. Vavagi komwaidona avaka magim gagabila goli bukuvagi.

³E lokukwatupoiyaigu ammakawala yeigu latuvaluwa e lakatukoyai m kwabitam. Paila yeigu saina tobubeikam. Alivalimakavi wala makwaisina vavagi gala wala anikoli, makwaisinaga kabokatubau saina vakaigaga gala ibodaigu bakateta.

⁴E bogwa lokulukwaigu banakaigali avai tuta okubigatona, kidamwa bavigikoni mwada bamapu m kwatupoi.

⁵Omitibogwa lalagi wala avaka segwaia leilukwaigusi paila yoku. Mitaga tuta baisa bogwa lagisimlilaim goli.

⁶Baisa ivigaki agu mmosila komwaidona avaka bogwa lalilivali. Mapaila asili opwaipwaia deli akum agu koula, e baisa bikibuboti ulo ninavila omatam.

⁷Avai tuta Guyau ivenoku bigatona baisa Yobi, ikaibiga baisa Elipasa kawala, “Yeigu saina agibuluwa baisa yoku deli kasitaiyu samwa,[27] paila gala kukwamokwitasi paila yeigu makawala matauna ulo touwata Yobi eiuvagi.

⁸Baisa tuta kukwauwaisi nalima nayu bulumakau nammwala deli nalima nayu sipi nammwala e bukuuyokaisi Yobi bukugibukwaisi lula paila yokomi titoulemi. Yobi binigada paila yokomi, e yeigulaga bamapu la nigada, e gala wala bayomsilaimi makawala avaka ibodi bavigakaimi. Yokomi gala kukwamokwitasi paila yeigu makawala matauna eiuvagi.”

⁹Elipasa, Bilidadi deli Sopara ivagaisi avaka Guyau bogwa eiluki bivagaisi, e Guyau imapu Yobi la nigada.

¹⁰E avai tuta Yobi inigada paila sala kasitaitolu e Guyau imitukwaii Yobi e ikaimilivau la guguwa saina ikalisau avaka eiyosibogwi omitibogwa.

¹¹Komwaidosi Yobi budala deli luleta e deli tobubogwa sala imaisi ivakawolaisi matauna e ikamkwamsi deli matauna ola bwala. Komwaidosi inokapisaisi matauna e ivisimolaisi matauna paila komwaidona vavagi mwau Guyau leimiaki matauna. Taitala taitala isakaisi matauna sitana mani deli kwaitala kakalougwa goula.

¹²Yobi la kaisisu kala vigimkovila Guyau ikabwaili saina vakaigaga, gala makawala eikabwailibogwi okala vitouula. E Yobi la yayosa titoulela iboda 14,000 sipi, lakatuluwolima lakatuluwotala kameli, lakatuluwoyu bulumakau, deli goli lakatuluwotala ase.

¹³E litula kasi bawa tailima taiyu tauwau deli natolu vivila.

¹⁴Idoki vilitomoya latula yagala Yemaima, viluluwala Kesia, e vilagwadi Kereni Apuki.

¹⁵Ovalu watanawa komwaidona vilesi gala natana makawala minasina Yobi litula, saina wala naminibwaita.[28] E tumasi isaiki minasina natana natana kala bigukeya makawala lusitaia.

¹⁶Yobi isisu lakatutala kweluwovasi kala taitu, e igisi tubula deli goli tubula litusia.

¹⁷E oluvi ikaliga e saina tomoyabogwa.