Read Kilivila YOBI 5 Bible Online

YOBI 5 - Kilivila bible

YOBI 5

¹Mwa Yobi! Kudou e kutulikoli kidamwa availa bimapu m dou. E kaina goli avai anelosi isisu paila bipilasaim?

²Kidamwa m nokubukubu bikimataim paila m ninamwau, e mokwita goli bidokaimsi yoku tonagowa.

³Yeigu bogwa lavitusi matausina toninagowa availa kasi gigisa saina peula, mitaga saina nanakwa labuloti si valu.

⁴E litusia tauwau gala wala ibanaisi kabokwala, e gala availa bitokaia bipilasi matausina okaboyakala.

⁵Tobigumata bogwa bikamkomasi metoya osi bagula matausina toninagowa, e bikamsi tambubolodila goli, deli tokwakadaka bikewakewa mitasi paila sesia si guguwa bidubadu.

⁶Mitugaga gala bisusina opwaipwaia, kaina kabomwau bitasusilasi metoya obaleku.

⁷Gala goli makawala kadai? Tanikoli mlimwali iyoyowasi metoya wa kova, e makawala goli tomota titoulela biyomituli kala mwau.

⁸E kidamwa yeigu baboda mwau makwaina - ka - yeigu ibodaigu wala batovila baisa Yaubada, e ulo ninamwau bakamituli baisa matauna.

⁹Gala gagabila bitakatetasi makwaisina vavagi siligaga matauna leiuvagi, e la kabutuvatusi gala wala kala vigimkovila.

¹⁰E matauna iwitali kuna ima odabala pwaipwaia. Matauna ivinumli bagula.

¹¹Mokwita goli, Yaubada wala bilupi matausina ninasi manum, e isaiki mwasawa baisa komwaidosi matausina iuvalamsi.

¹²Matauna bisilibodi si nanamsa tokwabitam gaga, deli bivigaki tokabitam biwaisi metoya osi kabitam titoulesi, mapaila matausina gala wala kwaitala si vavagi bivigimkulovaisi.

¹⁴E igau wala yam, mitaga kasi lumkola makawala ivabakwalisi odudubila.

¹⁵Mitaga Yaubada bikoli tonamakava metoya okaliga, e bikoli togumalawa metoya baisa tolamadada.

¹⁶Matauna isaiki pikwaku baisa tonamakava, e bisilibodi tomitugaga si kaninisi.

¹⁷Availa Yaubada bikiduwosisii, matauna bimwasawa! E yoku gala bukugibuluwa tutala matauna bikamitilakaim.

¹⁸Yaubada biwai e tuvaila bikapoli lewa. Biwai metoya oyamala, e oyamala bikatumova.

¹⁹E tuta tuta matauna wala bikolaim metoya avai kabosilagi.

²⁰Avai tuta molusaula bima, matauna goli bikamovaim, deli otutala kabilia matauna wala bikolaim metoya okaliga.

²¹Yaubada bikolaim metoya osi silapulu tomota, e tutala katudoum bima, matauna goli bikolaim.

²²E yoku bukuvigaki kaboyogagi deli molusaula kam gigila wala, deli gala bukukukoli minasina bolodila.

²³E m bagula makwaisina bukusisapu gala wala isim dakuna. e bolodila gala avai tuta bigadaimsi.

²⁴Wa tuta matutona biluva wala wowom bukusisu om bwala, e avai tuta bukuvakawoli m sipi, bukubani minasina ibwabwainasi wala.

²⁵E bukubani bidubadu litumwa, kasi bawa makawala mnumonu osaivau kala bawa.

²⁶E yoku bukutomoya mokwita, makawala witi immatuwa itotu igau otayoyuwa.

²⁷Mwa, Yobi! Yakidasi tuta kaduwonaku tatitakutusi wala paila baisa, e bogwa leitanikolaisi. E baisa mokwita wala, mapaila ibodi bukudubumi baisa.