Read Kilivila YOBI 6 Bible Online

YOBI 6 - Kilivila bible

YOBI 6

¹Kidamwa agu mwau deli ulo ninamwau bitavisaikoli okabovisaikola,

³mokaisi bikalisau mokaila kanakenuva komwaidona obolita, mapaila gala biyowa lupomi metoya ulo biga minimanila.

⁴Yaubada Topeuligaga bogwa eibasaigu okaiyala, e yayanela la kaiyala bogwa eilukuwoli wowogu komwaidona. Yaubada tuta komwaidona iuvitukukolaigu wala.

⁵Natana ase bikamkwam mnumonu bikomata, deli natana bulumakau bimanum bikamkwam mnumonu yammatutila.

⁶Mitaga availa ibodi bikoma kaula gala deli yona? Ammakawala pou olumoulela pupwakaula kakamwenala?

⁷Yeigu gala wala ibodi bakoma kaula makawala, avai kaula akamkoma ibulokatuwolaigu wala.

⁸Avaka paila Yaubada gala bisakaigu avai vavagi banigadi? Avaka paila gala imapu ulo nigada?

⁹Ibodi wala matauna bikatumataigu!

¹⁰Kidamwa bogwa lanikoli bivagi makawala, yeigu bamwasawa sainela e gala wala baluluwai ammakawala agu mmayuyu kala vakaila. Bogwa lanikoli Yaubada matauna tobumaboma; e yeigu gala kwaitala tuta akoulovi la karaiwaga.

¹¹Ammakawala ulo peula vakaila bibodi basaitaulaga tomomova? Avaka paila bibodi bamova kidamwa ulo pikwaku bogwa leiwokuva?

¹²Ki, ammakawala? Yeigu wowogu dakunawokuva kaina? Kaina wowogu kala peula makawala barasi?

¹³Yeigu ulo peula bogwa leiwokuva e gala avaka ikesa paila bakolaigu titoulegu; e gala wala ambaisa ibodi babani pilasi.

¹⁴Kidamwa baboda vavagi mwau makawala baisa, ibodi wala banevi lubaigwa tokamokwita - ilagoli kaina bogwa lasilavi Yaubada kaina gala.

¹⁵Mitaga yokomi lubaigwa, kusipulokaigusi makawala waya makaduyosina pakalela avai tuta gala kuna.

¹⁶Makaduyosina goli ikasuwoki sinou deli sopi kwekulokula,

¹⁷mitaga avai tuta waigigi bilova isosusi wala itamwausi, e lubulabu wala ikanukwenu.

¹⁸Yuwotala kameli itamwausi avai tuta inainevisi kasi sopi bimomsi. Iwowausi e bidoumlabasi wala oviloupakala.

¹⁹Mayuwona kamelila Seba deli Tema inainevisi mitaga gala wala ibanaisi,

²⁰mapaila si pikwaku ikaliga wala opapala makaduyosina waya kadapakapakala.

²¹Yokomi mi sopa kala bidubadu baisa yeigu kala lumkola makawala makaduyosina waya tutala kugisaisi agu mwau kuvayaitasi wala deli kami kokola.

²²Ki, avai tuta anigadaimi bukusakaigusi bobwailila kaina bakabiki availa yamala veiguwa paila bipilasaigu

²³kaina goli mwada bikolaigu metoya agu tilaula deli agu tolamadada?

²⁴O bwaina, kuvitulokaigusi; kulukwaigusi avaka ulo sula. Yeigu bamanum wala baligalega.

²⁵Bigatona kamokwita lutula saina peula; mitaga yokomi mi bigatona gala wala dimlela.

²⁶Yokomi kudokaisi ulo bigatona gala dimlela makawala wala yagila, kadai! E avaka uula kummapwaisi ulo biga alilivala metoya okala mwau nanogu?

²⁷Yokomi bukukowobobutasi paila magudisina weilova bukuvigakaisi mi ula e bukuvigakaisi mi kaisisu bipeula metoya semia wala otalimi!

²⁸Ka, kugisaigusi! Yeigu gala wala basopa.

²⁹Yokomi bogwa eivakasauwaimi sopa. Mapaila desi taga kukididogaimi titoulemi. E gala bukukwamogaigusi. Yeigu goli tokamokwita.

³⁰Mitaga yokomi kudokaisi tosasopa wala yeigu, kadai! Mi nanamsa gala wala gagabila bavitububoti avaka duwosisia e avaka doudoga.