Read Kilivila YOBI 9 Bible Online

YOBI 9 - Kilivila bible

YOBI 9

¹Mwa, bogwa wala laligilabi vavagi makwaisina. Mitaga availa ibodi bitomgaga yakala baisa Yaubada?

³Availa ibodi bisevitai Yaubada? Matauna ibodi wala bikatupoiyaidasi lakatuluwotala katupoi, e gala availa ibodi bimapu makwaisina.

⁴Yaubada saina tokabitam deli topeuligaga; e gala availa ibodi bisevitai matauna.

⁵Matauna gala biyolibiga bikatupaili wala koya e deli kala leiya ikosikili makwaisina.

⁶Yaubada imotitani valu watanawa metoya likuliku; e kokolela valu watanawa iiyagi e iyegasi.

⁷Matauna ibodi bikaraiwogi kalasia e gala biyuwoula, deli utuyam gala bipisisi wa bogi.

⁸Gala availa ipilasi Yaubada avai tuta eisaili bubuli wa labuma okabasi, kaina ipilasi matauna wa tuta matutona ivapupoi tapwala minana dokanikani obolita.

⁹Yaubada ibubuli utuyam wa labuma - madalasina yagasi Silubomatu, Tonabwaga, deli Uluwa, deli madalasina opilibolimila utuyamla.

¹⁰Gala ibodi bitanikolaisi vavagi kabokatubau matauna iuvagi, deli la kabotuvatusi komwaidona gala kala kalitutila.

¹¹Yaubada bililoula wala omatagu, mitaga gala wala agigisi matauna.

¹²E avaka magila bikau gala wala availa ibodi bisilibodi matauna; gala availa ituvaluwa bikatupoi matauna kawala, “Avakaga kuuvagi?”

¹³Yaubada kala leiya gala isim kala kalitutila. Matauna eikatumati kala tilaula komwaidona availa availa ipilasaisi minana dokanikanila bolita yagala Reyabi, minana goli eikoulovi matauna.

¹⁴Mapaila ammakawala bavigaki bavitakauloki Yaubada?

¹⁵Ilagoli yeigu tobwaila mitaga ibodaigu wala bakayubabai baisa Yaubada matauna agu toyakala mwada binokapisaigu.

¹⁶E mitaga tuta baisa kidamwa bitugwalaigu babigatona, e adoki matauna gala wala binakaigali ulo biga.

¹⁷Matauna ilogomsisaigu metoya utuyagila, e tuvaila wala ikatupwaili wowogu, ilagoli gala wala avaka uula.

¹⁸E olumoulegu bogwa wala eivakasau mmayuyu; mapaila gala wala ibodi bayagisa.

¹⁹Ki ibodi bayokoli matauna? Ibodi bayokoli Yaubada metoya ogu peula? Ki ibodi bayakali matauna mwada deli bakala okaboyakala? Availa ibodi biwitali matauna bila?

²⁰Yeigu tobwaila wala deli tokimadagi, mitaga ulo biga kala lega sulawokuva wala, e babani agu kwamwaga metoya avaka avaka lalilivali.

²¹Yeigu tobwaila wala, mitaga adoki gala wala isim dimlela. Yeigu bogwa eisomitaki wowogu kala sisu watanawa. Desi wala! Kaina tobwaila kaina tomitugaga yakidasi, gala wala avaka. Yaubada bogwa wala bikatudoumwaidasi.

²³Kidamwa taitala tobwaila biyokopita wala kala kaliga, Yaubada bivigaki wala kala gigila.

²⁴Yaubada isaiki tomitugaga valu watanawa si valu. Matauna ivadudubali mitasi toyakala. E kidamwa gala Yaubada ivagi makawala, ki, availaga leivagi baisa?

²⁵Ulo yam saina wala nanakwa biukuwokuva, e gala kwaitala makwaisina sitana alumkoli bwaina.

²⁶Ulo tuta biukuwokuva kala nanakwa makawala waga saina kaisisakaula, kaina kala nanakwa makawala mluveka eitalakapusi bilupi kala mauna.

²⁷E avai tuta mwada bagigila e bavigikoni balumwelavi agu gidageda, komwaidona agu mmayuyu ikikeiita wala ikikatululuwaigu bidubadu vavagi mwau. Bogwa lanikoli Yaubada eidokaigu tomitugaga.

²⁹E kidamwa bogwa leidokaigu tomitugaga, avaka uula bikaiki wowogu mitugaga makwaisina?

³⁰Gala wala avai vavagi ibodi biwinisau ulo mitugaga.

³¹Yaubada ivisililaigu omlopu makwaina eikasuwoki bulopwasa, e agu kwarekwa okala gigisa iyomsilaigu wala titoulegu.

³²Kidamwa Yaubada taitala guma watanawa, ibodi wala bamapu la biga; e kamataiyu wala bakala okaboyakala bakakiduwosisia ma kominimani.

³³Mitaga gala wala availa isisu bitotu oluwalaima okaboyakala, gala availa ibodi bivagi ma yakala sogu Yaubada.

³⁴O ulo Yaubada, mwa! desi taga kumipukwaigu! Desi taga kuvitukukolaigu.

³⁵Yeigu gala wala bakokola. Ibodi wala balivala paila bogwa lanikoli avaka balivali onanogu.