Read Kilivila SAM 10 Bible Online

SAM 10 - Kilivila bible

SAM 10

¹Mwa Guyau! Avaka paila saina kusikaduwonaku? Avaka paila kukwatupwanaim titoulem avai tuta lakabodasi mwau?

²Tomitugaga deli ninasi walakaiwa ilamidadaisi tonamakava. Ibodi matausina biwaisi metoya makaisina sikula leilaleiyasi.

³Tomitugaga la nanamsa gaga ivigaki la kamnomwana, e togugoveka ibigigagi Guyau deli ikoulovi matauna.

⁴Tomitugaga gala ikamiabi Guyau. Metoya onanola walakaiwa matauna idoki Yaubada gala isim dimlela.[26]

⁵Tomitugaga iyubwaila ola vavagi komwaidona.[27] Matauna gala ikikateta paila Yaubada la yakala. Ivakaluwou komwaidosi kala tilaula.

⁶E ininamsi titoulela kawala, “Galaga bakapusi. Yeigu gala avai tuta baboda mwau.”

⁷Kala livala ivakasau bigigaga, sopa deli vitukokola. Matauna saina nanakwa bikatilaka deli bimmatowa.

⁸Matauna isupepuni wala ovalu, iuwayausa mwada bikatumati tobubwaila. E ikuukwauta paila matausina availa availa mwada biyogagi.

⁹Matauna isupepuni iuwayausa makawala laiyoni. Matauna ikanapwala itutuli tonamakava, e bisikoli matausina metoya okala sikula e bibia bilau.

¹⁰Tobubwaila ikaligasi paila gala availa bipilasi, paila ola tumolaula ikalisau matausina.

¹¹Tomitugaga ininamsi titoulela kawala, “Yaubada gala wala bikaiki wowola avaka! Matauna bogwa itabodi matala e gala wala avai tuta bigisaigu!”

¹²Mwa Guyau! Kumipuki matausina tomitugaga, e kululuwaiga matausina leibodasi mmayuyu.

¹³Ammakawala tomitugaga bikaluwou Yaubada e bininamsi titoulela kawala, “Matauna galaga bimipukwaigu”?

¹⁴Mitaga yoku bogwa lokugigisi goli, e kululuwai matausina eibodasi mwau deli mmayuyu, e yoku kutitobogwa wala paila bukupilasi. Tomama ikatilavi titoulela baisa yoku. Yoku tuta komwaidona kupilasi matausina gumalawa.

¹⁵Ibodi bukukwatudidaimi si peula tomitugaga. Ibodi bukumipuki paila avai sula bogwa eivagaisi, tatoula wala bipakaisi sula makwaina.

¹⁶Yaubada matauna Guyau Tosivagasi. Matausina ititapwarorusi baisa ituwoli yaubada igau bitamwausi metoya ola valu.[28]

¹⁷Mwa Guyau! Ibodi bukunakaigali si nigada matausina tommanum, e bukukwatupewoli matausina.

¹⁸Yoku bukulagi si dou matausina eibodasi lamadada deli matausina weilova, e bukukwabwaili matausina oyakala. Mapaila mina watanawa gala tuvaila bivitukokolasi.