Read Kilivila SAM 102 Bible Online

SAM 102 - Kilivila bible

SAM 102

¹Mwa Guyau! Kunakaigali ulo nigada, deli kulagi ulo dou paila pilasi!

²Avai tuta wala baboda mwau, gala bukutotubulokaigu! Kunakaigalaigu, deli nanakwa kumapwaigu avai tuta badou.

³Ulo momova eititamwau makawala mseu, e wowogu ilululu makawala kova.

⁴Yeigu iwaigusi akapusi makawala mnumonu yamitamata, e kaula kala nanamsa alumwelavi.

⁵Akapiniveka kayagigila. Yeigu eideli wowogu totuwanawokuva wala yeigu.

⁶Yeigu makawala mauna nabubolodila oviloupakala, e makawala kuru itotu oviloububu.

⁷Akanukwenu wala ammamata, e yeigu makawala nagumalawa mauna nayoyowa itotu okulumwala.

⁸Yam kwemwaidona agu tilaula ibigigagaigusi. Matausina iyosokanaigusi, yagagu ivigakaisi si bolata[220] baisa sesia.

⁹Paila wala m gibuluwa deli kam leiya[221] tubwaga avigaki kʹagu, e deli mitilagigu itaguliki agu sopi. Yoku kulupaigu e kulavaigu alʹo.

¹¹Ulo momova makawala dubilikoyavi, e yeigu makawala mnumonu yamitamata.

¹²E yoku Guyau, yoku goli Guyau Tosivagasi. Tubwa komwaidona biluluwaimsi goli.

¹³Yoku igau bukutokaia e bukunokapisi mapilana Saiyoni,[222] paila tuta bogwa leima paila mapilana ibodi bibani kala nokapisi, e baisa tuta kala tuta mokwita.

¹⁴M towotetila komwaidona iyebwailisi wala mapilana, ilagoli kaina bogwa eidadaimi. Matausina inokapisaisi wala mapilana, ilagoli kaina bogwa eiviloububu.

¹⁵Boda ituwoli ituwoli bikukolaisi Guyau, e guyousi watanawa komwaidosi bikukolaisi la peula.

¹⁶E avai tuta Guyau bikaliivau mapilana Saiyoni, e matauna igau biyomitali la tovakaigaga.

¹⁷Matauna igau bilagi la tomota matausina omitibogwa eisilavi e binakaigali si nigada.

¹⁸Ibodi bitagini avaka Guyau bogwa leivagi paila tubwa igau bima bikalawasi, e mapaila baisa tomota matausina igau gala bikaloubusisi ibodi biyakawolaisi matauna.

¹⁹Guyau ikululuki metoya ola kabosisu kwebumaboma walakaiwa, e metoya wa labuma ikululukiga valu watanawa.

²⁰E ilagi si kayagigila tokatupipi, deli itaneku matausina availa availa kasi mipuki kaliga.

²¹E avai tuta boda ituwoli ituwoli deli kabokwaraiwaga ituwoli ituwoli bimaisi gulitinidesi e bitapwarorusi baisa Guyau. E matausina bikamitulaisi yagala mapilana Saiyoni, e deli biyakawolaisi matauna mapilana Yerusalem.

²³Igau otubovaugu Guyau ivigaki wowogu kala mama, e matauna iutupwi ulo momova.

²⁴Mwa Yaubada! Gala bukukwatumataigu, paila igau gala bilokaia agu tomoya. Yokugwa Guyau tosivagasi goli!

²⁵Omitibogwa yoku kububuli watanawa, e yamam titoulem kububuli labuma.

²⁶Komwaidona bitamwausi, mitaga yoku bukusisu wala. Komwaidona bigagasi makawala kakapula yadadaimi. Yoku bukuligaim makawala kakapula, e komwaidona bitamwausi.

²⁷Mitaga yoku tuta komwaidona migim migitinidesi wala, e deli m momova gala kala kalitutila.

²⁸Litumaiasi bisisuaisi luvala wala uwosi, E tubusia bisibwabwailasi metoya om yamata.