Read Kilivila SAM 103 Bible Online

SAM 103 - Kilivila bible

SAM 103

¹Bilomagu, kuyakawoli Guyau, e tomwaidogu goli, bayakawoli matauna tobumaboma.

²Bilomagu, kuyakawoli Guyau, e taga kulumwelavi la ninabwaila.

³Iligaiwa komwaidona ulo mitugaga e iyomovaigu metoya agu lelia komwaidona.

⁴Ikaliduboli agu laka e imitukwaiyaigu metoya ola yebwaili deli la nokapisi.

⁵Isemakavi bidubadu vavagi bwaina baisa yeigu, e mapaila agu lumkola totubovau yeigu, deli ulo peula makawala mluveka la peula.

⁶Guyau ipii matausina eibodasi lamadada, e ivagi avaka bibodi matausina si kaisisu.

⁷Eiyomitali nanola baisa Mosese, e itagwala mina Isireli bigisaisi la vavagi topilaveka.

⁸Guyau matauna tonokapisi deli toyebwaili. Matauna la gibuluwa iyobali, e la mitakwai gala avai tuta biwokuva.

⁹Gala bikamitilakaidasi tuta komwaidona paila da mitugagasi, paila la ninamwau isim kala kalitutila.

¹⁰Gala bimipukwaidasi makawala avaka bibudokaidasi, e gala bimipukwaidasi paila da mitugagasi deli da sulasi.

¹¹Labuma isisu saina walakaiwa sainela odabala pwaipwaia, e makawala goli kala vakaila la yebwaili baisa availa availa itemmalaisi matauna.

¹²Kala woloula opilibomatu bila opilikwaibwaga, e makawala goli kala maloula biligaiwa da mitugagasi metoya baisa yakidasi.

¹³Taitala tau la ninabwaila baisa litula saina bwainigaga, e makawala goli Yaubada la ninabwaila baisa availa availa itemmalaisi matauna.

¹⁴Matauna iluluwai ammakawala eibubulaidasi. Inikoli wala kidamwa yakidasi pwaipwaia.

¹⁵Yakidasi goli da momovasi makawala mnumonu.[223] Tatovakavekasi takaitubwasi makawala kai lalela saina nanakwa iluwai e ikatuyawai.

¹⁶E oluvi yagila iuu e bogwa eitamwau makaina, e gala wala bitagisivau tuvaila.

¹⁷Mitaga Guyau la yebwaili bikanuvagasi baisa availa availa itemmalaisi matauna, e la bobwailila bikanigaga baisa avai tubwa avai tubwa

¹⁸paila matausina availa availa itemmalaisi la kabutu,[224] deli ikabikuwolaisi la karaiwaga makwaisina deli si kimadagi tuta komwaidona.

¹⁹Guyau isaili la takaikaia walakaiwa wa labuma, e matauna guyoula vavagi komwaidona.

²⁰Eei, yokomi anelosi topeuligaga, kuyakawolaisi Guyau. Paila yokomi kukwabikuwolaisi la karaiwaga makwaisina deli kunakaigalaisi avaka la biga.

²¹Yokomi towalakaiwa topapeula, kuyakawolaisi Guyau. Paila yokomi la towotetila, e kuuvagaisi nanola.

²²Komwaidomi la bubuli tommomova ambaisa ambaisa iguguyoi goli, kuyakawolaisi Guyau. Bilomagu, kuyakawoli Guyau.