Read Kilivila SAM 104 Bible Online

SAM 104 - Kilivila bible

SAM 104

¹Bilomagu, kuyakawoli Guyau. E Guyau ulo Yaubada, saina tovakaigaga yoku. Lokusikam kam kwalugologusa saina guyugwayu.

²Kuvakanunuvaim lumalamawokuva wala. Valu walakaiwa kukwatuvakai makawala laya

³e kumili valu odabala sopi walakaiwa.[225] Lowalowa kuvigaki m waga, e kukoukewa odabala yagila.

⁴Yagila lokuvigaki m touwata, e kavikavila kuvigaki m towotetila.

⁵Lokusaili valu watanawa okabala,[226] e makwaina gala avai tuta bimotatina.

⁶Kuvigaki bolita kala kakapula valu watanawa, e sopi ikatukuwosi koya.

⁷Avai tuta kukwamitilaki sopi, itabai wala. Sopi ilagi m kwaraiwaga deli kaigam kaigaveka kulivala, e isakaula.

⁸Ititayelu odubasi koya ibubusi ila wa sakala, bila okabala ambaisa bogwa lokukwatubiasi.

⁹Okusaili kala kalitutila, e gala gagabila biluvapela, e gala gagabila bikatukuwosi valu watanawa tuvaila.

¹⁰Yoku kuvigaki sopi igigibwabula wa sakala, e waya ititayelu metoya oluwalaisi koya.

¹¹E ivigaki kasi sopi mauna nabubolodila. Baisa goli ase nabubolodila ivakapwaisi kasi daka.

¹²Makaisina kai otalila sopi baisa mauna nayoyowa iyoulasi kasi nigwa deli iusiwosi.

¹³Metoya wa labuma kuwitali kuna bikuna wa koya, e valu watanawa ikasuwoki m mitakwai bidubadu.

¹⁴Kuvigaki mnumonu bisusina mwada bikamsi bulutuvalu, e kusaiki avai kai avai kai bipilasi tomota, e gagabila tomota bikaibigulaisi,

¹⁵deli bitaiyauwaisi waini kidamwa bimwasawasi, e bulamila olibe kidamwa biyomwasali ninasi, e kaula kidamwa bikatupewoli uwosi.

¹⁶Mina Lebanoni si kai kweisila[227] ibubanaisi kasi sopi bidubadu, makaisina kai Guyau la kai eivaula titoulela.

¹⁷Baisa mauna iiyoulasi kasi nigwa. Minasina boi iiyoulasi kasi nigwa osisila kaga.

¹⁸Gota nabubolodila isisuaisi wa koya, e minasina kwakwau isim kasi nobwala opwaipwaia.

¹⁹Kububuli tubukona bikibuboti kweluva, e kalasia bogwa inikoli kala tuta salili.

²⁰Kububuli bogi, e otutala dudubila mauna nagigasisi isunapulasi.

²¹Minasina laiyoni nagugwadi iguguvavilasi e inainevisi kʹasi, avaka Yaubada bisaiki.

²²Igau iyuwoula kalasia ikeiitasi e ikenusi okasi nobwala.

²³E oluvi tomota itokaiasi isunapulasi bipaisewasi, e ipupaisewasi wala bila bibogi.

²⁴Mwa Guyau! M bubuli saina bidugaga lokububuli metoya om kwabitam. Valu watanawa ikasewoki m bubuli.

²⁵Ka, milaveta kala maloula kala beiyaya, e m bubuli baisa obolita gala gagabila bitakalau, navakaveka deli goli nakikekita!

²⁶Waga ikokewasi odabala bolita, e minana bosu immwasawa baisa, minawena makawala Dokanikani[228] okububuli goli.

²⁷Komwaidosi minasina ikikanasi baisa yoku, e mwada yoku bukusaiki kʹasi avai tuta magisi.

²⁸Yokugwa kusisaiki e ikamsi. Yoku kutugwali kaula e bogwa ikomatasi.

²⁹Avai tuta yoku kutotubuloki, minasina ikokolasi. Avai tuta kukwau si yagisa ikaligasi wala, e idavilasi imila pwaipwaiasi tuvaila.

³⁰Mitaga avai tuta kusaiki si yagisa,[229] imovavausi, E yoku kuvigaki valu watanawa imovavau.

³¹Ibodi Guyau kala katububula bikanuvagasi, e ibodi bimwasawa paila avaka avaka eibubuli.

³²Imitakavati pwaipwaia, e pwaipwaia iyega. Ikabikoni koya e mseu isusunapula.

³³Ogu momova komwaidona bausiwosi baisa wala Guyau, e ogu tuta tomomova yeigu bawosi kala yakaula Yaubada.

³⁴Saina magigu agu wosi biyomwasali matauna, paila ulo mwasawa eimaima metoya baisa matauna.

³⁵Ibodi Guyau bimtuli komwaidosi tomitugaga, e bidoumlabasi wala. Bilomagu, kuyakawoli Guyau. Kala yakaula Guyau!