Read Kilivila SAM 106 Bible Online

SAM 106 - Kilivila bible

SAM 106

¹Kala yakaula Guyau. Bitanokagutokisi baisa Guyau, paila matauna tomitakwai. La yebwaili ikanuvagasi.

²Availa gagabila bikamituli komwaidona vavagi topilaveka bogwa leivagi? Availa gagabila bisaiki kala yakaula avaka bibudoki matauna?

³Bimwasawasi availa availa matausina ikabikaulasi la karaiwaga duwosisia, deli tuta komwaidona imitukwaibwailasi.

⁴E Guyau, kululuwaigu avai tuta bukupilasi m tomota. Kusegulikaigu avai tuta bukukwatumovi matausina.

⁵Kutugwalaigu bagisi si sibwabwaila m tomota, e bamwasawa deli mabudona m tomota, e gulitinidesi yakamaisi m tomota bakayakawolaimsi.

⁶Bogwa kamitugagasi makawala tubumaiasi leivagaisi. Bogwa kataugagasi deli kamitugagasi.

⁷Tubumaiasi mapilana Itipita gala ikatetasi avaka Yaubada eivagi kabokatubau. Tuta bidubadu ivituloki matausina la yebwaili, mitaga bogwa eilumwelavaisi, deli bogwa ikosomapwaisi Topeuligaga mapilana Bolita Pilabweyani.

⁸Mitaga bogwa ikoli matausina, makawala bogwa leikatotila, paila mwada bivituloki la peuligaga.

⁹Bogwa eikaraiwogi mapilana Bolita Pilabweyani e imada, e ikugwai la tomota iluvapelasi opwaipwaia lubulabu.

¹⁰Bogwa ikoli la tomota metoya baisa matausina mina kukolosi. Bogwa ikoli matausina metoya kasi tilaula.

¹¹Mitaga sopi ivigipulu kasi tilaula. Gala taitala matausina ikesa.

¹²Oluvi la tomota bogwa idubumaisi la biga katotila, deli iwosisi yakaula baisa matauna.

¹³Mitaga saina nanakwa ilumwelavaisi avaka bogwa leivagi, deli ivagaisi avaka ninasi e gala itulotulasi paila la katuloluta.

¹⁴Matausina bogwa ikatumati vikeiya oviloupakala, deli iwakolaisi Yaubada.

¹⁵Mapaila isaiki matausina avaka einigadaisi, mitaga tuvaila iwitali lelia gaga baisa matausina.

¹⁶Baisa oviloupakala matausina ipogaisi Mosese, deli ipogaisi Eroni, matauna Guyau la touwata tobumaboma.

¹⁷Oluvi pwaipwaia bogwa ikapogega e ilupoli Datani, deli ibaku Abiram deli litula.

¹⁸Kova bogwa ikapusi baisa kasi tobwakuli, e igabu matausina tomota tomitugaga.

¹⁹Matausina bogwa eibubulaisi bulumakau goula makwaina Koya Sinai, deli itapwarorusi baisa minana tokolu.

²⁰Bogwa ikatumapwaisi Yaubada Toguyugwayu, e kaimapula iyosisi kaikobula natana mauna minana nakamkwam mnumonu.

²¹Bogwa eilumwelavaisi Yaubada matauna eikatumovi matausina metoya ola vavagi topilaveka eivagi mapilana Itipita.

²²Saina kabokatubau vavagi makwaisina bogwa eivagi mapilana! Saina kaboyowalula vavagi makwaisina mapilana Bolita Pilabweyani!

²³Avai tuta Yaubada ikaibiga mwada bikatudoum la tomota, e Mosese, matauna la touwata isim kala naga, itokaia, kayubabai baisa Yaubada, deli isilibodi la gibuluwa taga bikatudoum matausina.

²⁴Oluvi matausina ipakaisi valu bwaina, paila gala idubumaisi Yaubada la biga katotila.

²⁵Matausina isisuaisi wala olumoulela si buliyoyova e itakulukulusi, deli gala binakaigalaisi Guyau.

²⁶Mapaila ikamitilaki matausina mwada bidoumsi oviloupakala,

²⁷deli bivabutu tubusia bilosi oluwalaisi tomota matausina gala inikolaisi Yaubada, e bitugwali matausina bikaligasi osi valu togilagala.

²⁸Mapilana Piori Yaubada la tomota itokailasi paila Beali[233] kala tapwaroru, deli ikamsi lula bogwa eisakaisi minasina yaubada gala isim si momova.

²⁹Ikatumwalaisi Guyau la gibuluwa metoya baisa avaka eivagaisi, mapaila lelia kwemigaga ikaloubusi oluwalaisi.

³⁰Mitaga Piniasi itokaia imipuki matausina isim kasi pakula, e lelia iwokuva.

³¹Tomota ikabwailisi Piniasi paila baisa avaka eivagi e leima lagaila, e biluluwaisi goli tuta komwaidona, tuta gala wala biwokuva.

³²Mapilana outuwotu Meriba tomota iyogibuluwaisi Guyau, deli Mosese iboda mwau[234] paila matausina.

³³Matausina saina iyomiyuyaisi nanola Mosese, mapaila isetuwoli wala lilivala gala deli la nanamsa.

³⁴Gala ikatumataisi tomota matausina gala inikolaisi Yaubada, makawala Guyau eikaraiwogi matausina bivagaisi,

³⁵mitaga ivaipelasi deli matausina, deli ibokulaisi makawala si kidakeda tapwaroru doudoga.

³⁶Ka, Yaubada la tomota itapwarorusi baisa tokolu, e baisa iyomituli kasi kaliga.

³⁷Ikasalaisi litusia titoulesi tauwau deli vivila, ivigakaisi lula baisa si tokolu mina Kenani.

³⁸Bogwa ikatumataisi magudisina gudibubwaila gugwadi, e ivakagalaisi valu metoya makwaisina katumata.

³⁹Bogwa eiyogwalaisi titoulesi metoya osi vavagi, deli ipakaisi wala Yaubada.

⁴⁰Mapaila Guyau igibuluwa baisa la tomota. Matauna ikasilali matausina.

⁴¹Matauna isilavi matausina ilosi oyumasi tomota matausina gala inikolaisi Yaubada, deli kasi tilaula ikaraiwogaisi matausina.

⁴²Matausina ibodasi kasi lamadada metoya kasi tilaula, deli itugwalaisi tomwaidosi baisa matausina.

⁴³Tuta bidubadu Guyau ikoli la tomota, mitaga inagaisi bikosomapwaisi matauna, deli isubounusi ilosi olumoulela mitugaga.

⁴⁴Mitaga Guyau bogwa eilagi matausina avai tuta eidousi, deli bogwa ivitusi kasi mmayuyu.

⁴⁵Magila bipilasi matausina e mauula iluluwai la kabutu,[235] e nanola ikivili, paila uula la yebwaili saina vakaigaga.

⁴⁶Bogwa ivigaki kasi tolamadada komwaidona binokapisaisi matausina.

⁴⁷Mwa! Guyau ma Yaubadasi, kukolaimasi, e kukwaimilivauwaimasi[236] metoya oluwalaisi boda ituwoli ituwoli, e igagabila bakanokagutokisi deli bakayakawolaimsi yoku Tobumaboma.

⁴⁸Kala yakaula Guyau, matauna mina Isireli si Yaubada. Kuyakawolaisi matauna tuta baisa deli tuta gala biwokuva! Ibodi taitala taitala bilivala kawala “Emeni!” Kala yakaula Guyau![237]