Read Kilivila SAM 107 Bible Online

SAM 107 - Kilivila bible

SAM 107

¹“Bitanokagutokisi baisa Guyau, paila matauna tomitakwai. La yebwaili gala wala biwokuva, bikanigaga goli.”

²E komwaidomi availa availa Guyau eikatumovi, ibodaimi bukutakutusi biga makwaisina e bukuvigakaisi kala yakaula Guyau. Bogwa eikolaimi metoya kami tilaula.

³e leimaiyaimi metoya osi valu togilagala, metoya opilibomatu deli opilikwaibwaga, metoya opiliyavata deli opilibolimila.

⁴Mimilisi iwowausi oviloupakala, e gala avai keda ambaisa. Gala gagabila bibanaisi avai valu kidamwa bimili valusi.

⁵Ikamolusi ikadakasi, e si pikwaku komwaidona iwokuva wala.

⁶E oluvi metoya osi tuta mwau idousi baisa Guyau, e ikoli matausina metoya okasi mmayuyu.

⁷Ivakadi matausina wa keda duwosisia, e iviloubusisi ambaisa gagabila bimili valusi,

⁸Mapaila ibodi binokagutokisi baisa Guyau paila la mitakwai, paila vavagi makwaisina saina kabokatubau avaka eivagi paila matausina.

⁹E Guyau ivimom matausina ikadakasi, e isaiki vavagi bwaina baisa tokamolu e ikomatasi goli.

¹⁰Mimilisiga tomota isigagasi odudubila saina dubilikitakita, tokatupipi goli, e kasi katupipi iyomiyuyu matausina,

¹¹paila uula eikosomapwaisi Yaubada Topeuligaga la karaiwaga makwaisina, e gala wala bilagaisi la katuloluta.

¹²Eisomatasi osi paisewa mwau. Bikapusisi opwaipwaia, e gala availa bipilasi matausina.

¹³E oluvi metoya osi tuta mwau idousi baisa Guyau, e ikoli matausina metoya okasi mmayuyu.

¹⁴Ikatusunupuloi matausina metoya odudubila, saina dubilikitakita, e kasi katupipi tanumnumta ikatumkumku.

¹⁵Mapaila ibodi binokagutokisi baisa Guyau paila la mitakwai, paila vavagi makwaisina saina kabokatubau avaka eivagi paila matausina.

¹⁶Ikodidaimi kala lulu bwala barasiwokuva wala deli ikomtumtu makaisina tanumnumta.

¹⁷Mimilisiga toninagowa eibodaisi mmayuyu mapula si sula, e tuvaila mapula si mitugaga.

¹⁸Igisaisi kaula iminineiki ninasi paila bogwa eiyayayasi wa laka.

¹⁹E oluvi metoya osi tuta mwau idousi baisa Guyau, e ikoli matausina metoya okasi mmayuyu.

²⁰Iyomovi matausina metoya ola karaiwaga, e ikaliduboli kasi laka.

²¹Mapaila ibodi binokagutokisi baisa Guyau paila la mitakwai, paila vavagi makwaisina saina kabokatubau avaka eivagi paila matausina.

²²Ibodi bigabwaisi lula bivigakaisi si nokagutoki baisa Yaubada, e deli wosila mwasawa bikamitulaisi komwaidona avaka eivagi paila matausina.

²³Mimilisiga ikokewasi osi waga ikwaidadinasi e ititakunasi kʹasi metoya toluguta la paisewa.

²⁴Igisaisi avaka Guyau gagabila bivagi, avaka avaka eivagi obolita saina kabokatubau.

²⁵Karaiwaga e utuyagila itokaia e kaisai saina ikaipolu.

²⁶Kaisai ilupi waga ilau walakaiwa, e iyosilisali ilau watanawa. Toluguta ibodaisi mwau sainela e iwokuva wala si tuvaluwa.

²⁷Ikatupupeili deli isilibeibeusi makawala matausina eimomsi kabotutu e si luguta komwaidona gala avaka dimlela.

²⁸E oluvi metoya osi tuta mwau idousi baisa Guyau, e ikoli matausina metoya okasi mmayuyu.

²⁹Ivigaki utuyagila biniwavila, deli kaisai iluvitaitaia wala.

³⁰Toluguta imwasawasi paila niwavila, e imai matausina biwoulasi okabokota makwaina ambaisa magisi.

³¹Mapaila ibodi binokagutokisi baisa Guyau paila la mitakwai, paila vavagi makwaisina saina kabokatubau avaka eivagi paila matausina.

³²Ibodi bikamitulaisi matauna Tovakaigaga osi sigugula[238] tomota e biyakawolaisi matauna omitasi kaidadala si valu.

³³Guyau ivigaki waya bimada, e sakala bisimwaisi titayelu.

³⁴Ivigaki kwabila kubilumalala bimila kubiliyayana wala, paila uula mapilana valu kala tosisu saina tomitugaga.

³⁵Ivigaki viloupakala bidavila bimila katuwotu e ambaisa pwaipwaia obidapakala ivigaki sopi igigibwabula.

³⁶Itagwala tonamakava bimili valusi mapilana e ibudaisi si valu paila bisisuaisi baisa,

³⁷Ibigubagulasi e ivalaisi matamna waini, e oluvi itayoyuwasi saina kabinai.

³⁸Guyau imitukwai la tomota e iunigeyaisi litusia bidubadu e ivigaki si bulutuvalu bibidubadu e gala bibusi kasi bawa.

³⁹Tutala Yaubada la tomota imamasi deli kasi mmosila metoya lamadada saina mwau deli mmayuyu,

⁴⁰e Yaubada ikaluwou matausina tolamadada e ivaleili biwowausi wala oviloupakala ambaisa gala isim keda.

⁴¹Mitaga ikoli tonamakava metoya osi ninamwau, e ivigaki osi kaukweda biunigeyaisi litusia bidubadu makawala si yawa bulutuvalu.

⁴²Tomitukwaibwaila igisaisi baisa e imwasawasi, mitaga komwaidosi tomitugaga ikapatu wala udosi.

⁴³Ibodi tokabitam bininamsaisi vavagi makwaisina, e ibodi bisimokwitasi Guyau la mitakwai.