Read Kilivila SAM 109 Bible Online

SAM 109 - Kilivila bible

SAM 109

¹Mwa Yaubada! Ayakawolaim. Gala ibodi bukukwapatu!

²Tomitugaga deli tosisasopa bogwa eiwaigusi. Isilipulaigusi,

³e ililivalasi vavagi gaga paila yeigu, e gala uula iwomakaiyaigusi wala.

⁴Inopakaigusi mitaga ayebwaili wala matausina, deli aninigada paila matausina.

⁵Avagi vavagi bwaina baisa matausina, mitaga imapwaigusi vavagi gaga. E ayebwaili matausina mitaga matausina ipakaigusi.

⁶Kunagi avai toyakala gaga biyakali agu tilaula, e kutugwali taitala tilaulasola wala bitabinaki matauna.

⁷E ibodi matauna bisuvi oyakala e bibanaisi matauna isim kala pakula. E ibodi gala wala bilagaisi la nigada, bidokaisi wala la nigada iyomituli tuvaila kala pakula.

⁸Ibodi la momova nani wala biwokuva, e taitala sola bikaimapu kabala!

⁹Ibodi litula biwaki neuya deli la kwava binakakau.

¹⁰Ibodi litula gala wala si kabosisu e bininigadasi wala paila kʹasi, e bibokavilaisi metoya avai bulusikum eivigakaisi si kabosisu.

¹¹Ibodi matausina eiuwasi si guguwa bikauwaisi wala la guguwa komwaidona, e deli tomitawasi bikauwaisi komwaidona vavagi avaka eipupaisau.

¹²Ibodi gala wala taitala bimitukwaii matauna, kaina bivauli weilova magudisina eiligaim.

¹³Ibodi dalela komwaidona bikaligasi, deli yagala bilumwelavaisi avai tuta tubwa tubovau.

¹⁴Ibodi Guyau biluluwai avaka tubula si mitugaga, deli gala avai tuta biligaiwa inala la mitugaga.

¹⁵Ibodi Guyau tuta komwaidona biluluwai si mitugaga, mitaga sesia bilumwelavaisi tomota matausina.

¹⁶Ka, tau matauna gala wala avai tuta ininanamsi sitana bininabwaila, gala wala! Matauna ilamidadi deli ikatumati tonamakava, togumalawa, deli tomamama.

¹⁷Saina mbwailila bolata - ka, ibodi bibulotaisi matauna! Kukolola wala bibigabwaila - ibodi gala taitala bibigibwaili matauna!

¹⁸Saina tokabulobolata, iwalaki wala kala wosi. Ibodi la bolata titoulela bisuki wowola tomwaidona makawala sopi bimigamaga, e deli bisuki totuwala makawala kevakeva biyogagi avai guguwa.

¹⁹Ibodi la bolata bikuboli matauna makawala kanunuva, e tuta komwaidona bitavini wala bitapatu matauna makawala palitula.

²⁰Mwa Guyau! Kumipuki agu tilaula makawala avaka baisa lalivali. Matausina goli bogwa eitabinakaigusi makawala!

²¹Mitaga Guyau yoku ulo Yaubada, kupilasaigu makawala m biga katotila e kukolaigu paila uula yoku tobobwailila.

²²Yeigu tonamakava deli togumalawa, e alumkoli saina mmayuyu metoya olumoulegu.

²³Makawala kaikobugu odubilikoyavi e yeigu tuta pikekita wala batamwau. Yagila iyuvisauwaigu makawala natana minumauna yeigu.

²⁴E kwaitutugu imama paila uula gala kaula. Yeigu eideli wowogu e totuwanawokuva wala yeigu.

²⁵Avai tuta tomota igisaigusi e igigilaigusi wala. Ikatugougeunasi wala deli si yousokana.

²⁶Mwa! Guyau ulo Yaubada, kupilasaigu. Paila uula m mitakwai kukwatumovaigu.

²⁷Kuvigaki agu tilaula binikolaisi kidamwa yoku wala kukwatumovaigu.

²⁸Kaina matausina bibulotaigusi, mitaga yoku bukubigibwailigu wala. E ibodi agu tolamadada bimamasi, e ibodi yeigu m towotetila bammwasawa wala.

²⁹Ibodi agu tilaula mmosila wala bikatumati matausina. Ibodi kasi mmosila bivigaki makawala kasi kakapula.

³⁰Yeigu bakaigaveka banokagutoki baisa Guyau; e bayakawoli matauna osi sigugula[240] tomota,

³¹paila uula itabodi matauna tonamakava, deli ikoli matauna metoya matausina availa availa ikamogaisi matauna mwada bikaliga.