Read Kilivila SAM 111 Bible Online

SAM 111 - Kilivila bible

SAM 111

¹Kala yakaula Guyau! Banokagutoki baisa Guyau deli nanogu komwaidona metoya osi sigugula[244] la tomota.

²Saina kabokatubau vavagi makwaisina Guyau iuvagi! Komwaidona matausina availa availa imwasawasi paila makwaisina magisi wala bikatetasi.

³Komwaidona avaka avaka iuvagi ivakasau kala taimamila deli iyomitali la giyouveka, e la mitukwaibwaila ikanuvagasi.

⁴Guyau gala wala itagwala bitalumwelavaisi makwaisina kabokatubau avaka eiuvagi, e matauna toninabwaila deli tonokapisi.

⁵Isaiki kaula baisa matausina availa availa itemmalaisi matauna. Matauna gala avai tuta bilumwelavi la kabutu.[245]

⁶Matauna iyomitali la peula baisa la tomota, avai tuta isaiki matausina si pwaipwaia togilagala.

⁷Komwaidona avaka avaka eiuvagi matauna tokimadagi deli toduwosisia. Komwaidona makwaisina la karaiwaga ibodi bitadubumaisi.

⁸Makwaisina bisisu tuta gala kala kalitutila, e isaiki makwaisina karaiwaga metoya ola biga kwekamokwita deli la mitukwaibwaila.

⁹Eitaneku la tomota, deli ivagi kabutu kwekanigaga deli matausina. Matauna tobumaboma deli topeuligaga goli.

¹⁰Kidamwa magida bitakabitam ibodi bitatemmali Guyau.[246] Availa availa ikabikuwolaisi makwaisina la karaiwaga, ivigaki matausina bininitalapulasi. Ibodi bitayakawoli Guyau tuta gala biwokuva.