Read Kilivila SAM 115 Bible Online

SAM 115 - Kilivila bible

SAM 115

¹Mwa Guyau! Ibodi bakakavisaimsi wala yoku e kammwaleta wala yoku, e galaga yakamaisi, paila uula m mitakwai deli m kimadagi.

²Avaka uula boda ituwoli ituwoli bikatupoiyaidasi, kawasi, “Ambaisaga mi Yaubada?”

³Da Yaubadasi isisu wala wa labuma, e iuvagi avaka avaka magila bivagi.

⁴Matausina eibubulaisi si yaubada metoya siliba deli goula, e oyumasi wala eiyoudulaisi minasina.

⁵Minasina isim udosi, mitaga gala gagabila bilivalasi, e isim mitasi, mitaga gala gagabila bigisasi.

⁶Isim taigasi, mitaga gala gagabila bilegasi, e kabulusi, mitaga gala gagabila bisikonasi.

⁷Isim yumasi, mitaga gala gagabila bikabikonasi, e kaikesi, mitaga gala gagabila biloulasi. Gala gagabila bilivalasi, ikikapatusi wala.

⁸Ibodi goli komwaidosi availa availa eibubulaisi e eidubumaisi minasina, bidavilasi bimila tokolusi makawala wala minasina bogwa eibubulaisi.

⁹E yokomi mina Isireli bukudubumaisi Guyau. Matauna ipilasaimi e ikolaimi.

¹⁰Yokomi la tolula Yaubada, bukudubumaisi Guyau. Matauna ipilasaimi e ikolaimi.

¹¹Komwaidomi yokomi totapwaroru, bukudubumaisi Guyau. Matauna ipilasaimi e ikolaimi.

¹²Guyau iluluwaidasi e bimitukwaiyaidasi. Matauna bimitukwaii mina Isireli deli komwaidosi Yaubada la tolula.

¹³Bogwa bimitukwaii komwaidosi availa availa itemmalaisi matauna, gweguya deli goli tokai.

¹⁴Ibodi Guyau bisakaimi litumia, e yokomi deli litumia bukuunigeyaisi goli.

¹⁵Ibodi Guyau bimitukwaiyaimi, matauna kala tobubuli valu walakaiwa deli watanawa.

¹⁶Labuma baisa Yaubada kalamwaleta wala la vavagi, mitaga valu watanawa bogwa isaiki tomota.

¹⁷Tomata gala wala biyakawolaisi Guyau. Matausina tolesi Tuma gala wala biyakawolaisi matauna.[251]

¹⁸Mitaga yakidasi tommomova bogwa bitanokagutokisi baisa matauna, tuta baisa deli tuta gala biwokuva. Kala yakaula Guyau.