Read Kilivila SAM 116 Bible Online

SAM 116 - Kilivila bible

SAM 116

¹Yeigu ayebwaili Guyau, paila ililagaigu. Inakaigali ulo nigada.

²Avai tuta badou baisa matauna e tuta tuta inakaigalaigu goli.

³Kabosilagi mwau itoulaigusi, kala kakayuwa laka iyosaigu e agu kokola sainela iwouwouya nanogu.

⁴E mapaila ayokakapisi baisa Guyau, kawagu, “Mwa Guyau! Anigadaim bukukolaigu.”

⁵Matauna Guyau tonokapisi deli giyoubwaila Da Yaubadasi matauna kada kwabusi oda tutasi mwau.

⁶Guyau ikoli tomamama. Avai tuta laboda kabosilagi e matauna ikolaigu.

⁷Gala wala ibodi baninayuwa, paila Guyau bogwa eimitukwaibwailigu.

⁸Guyau ikolaigu metoya kaliga ikatupewolaigu e gala basilibeibeu, e baisa ivigaki waisala mitilagigu.

⁹E mapaila aliloula wala omatala Guyau baisa osi valu tommomova.

¹⁰Yeigu kawagu, “Ka, bogwa laboda saina mwaugaga,” mitaga adubumi wala Guyau.

¹¹Kalubikoya akokola e kawagu, “Gala badubumi availa!” mitaga gala wala asim kala dubumi Guyau.

¹²Avai vavagi ibodi basaiki Guyau mwada bamapu la bobwailila baisa yeigu?

¹³Bogwa basemakavi waini bavigaki lula baisa Guyau, e makawala banokagutoki baisa matauna paila eikolaigu,

¹⁴e baisa osi sigugula[252] la tomota bogwa goli basaiki matauna makawala ulo biga katotila.

¹⁵Kidamwa taitala Guyau la tomota bikaliga, bogwa goli bimmayuyu nanola Guyau.

¹⁶E Guyau, yeigu m towotetila, e awotitalaim makawala inagu eivigakaim. Yoku goli lokukolaigu metoya kaliga.

¹⁷Bogwa basakaim ulo lula lulela nokagutoki, e banigada baisa yoku.

¹⁸Baisa osi sigugula komwaidosi m tomota e olumoulela m Bwala Kwebumaboma mapilana Yerusalem, bogwa goli basakaim makawala ulo biga katotila. Kala yakaula Guyau!