Read Kilivila SAM 118 Bible Online

SAM 118 - Kilivila bible

SAM 118

¹Bitanokagutokisi baisa Guyau, paila matauna giyoubwaila. La yebwaili gala wala biwokuva, bikanigaga goli.

²Ibodi mina Isireli bikaibigasi, “La yebwaili bikanigaga goli.”

³Ibodi Yaubada la tolula bikaibigasi, “La yebwaili bikanigaga goli.”

⁴Ibodi komwaidosi totapwaroru bikaibigasi, “La yebwaili bikanigaga goli.”

⁵Metoya ogu mmayuyu adou baisa Guyau. Imapu ulo dou, e itanekwaigu.

⁶Guyau deli yeigu, e gala wala bakokola. Avakaga gagabila tomota bivigakaigusi?

⁷Paila Guyau goli ipipilasaigu, e bogwa bagisi agu tilaula bimamasi goli.

⁸Ibodi sainela bitadubumaisi Guyau, e gala wala ibodi bitadubumaisi tomota.

⁹Ibodi sainela bitadubumaisi Guyau, e gala wala ibodi bitadubumaisi tokugwala valu watanawa.

¹⁰Agu tilaula bidubadu[253] eitoulaigusi, mitaga akatumtuwoli matausina metoya ola peula Guyau.

¹¹E ititoulaigusi wala itapataigusi, mitaga akatumtuwoli matausina metoya ola peula Guyau.

¹²Ivaulaigusi makawala budotala tubuyusapi, mitaga agabu matausina e saina nanakwa eigibimkulovi, makawala susupa, e metoya ola peula Guyau akatumtuwoli matausina.

¹³Iwawaigusi saina minimani e makateki wala bamama, mitaga Guyau ipilasaigu goli.

¹⁴Guyau bikatupewolaigu e bogwa bapeula. Matauna goli bogwa eikolaigu.

¹⁵Ka, kulegasi govala tomgwaga, ikatugougovasi deli mwasawa osi buliyoyova Yaubada la tomota. Kawasi, “E, tatomgwagasi uula goli Guyau la peuligaga.

¹⁶Bogwa tatomgwagasi paila uula wala Guyau la peula, e la peuligaga tutala takakabiliasi.”

¹⁷Yeigu gala wala bakaliga. Mitaga tomomova yeigu bakamituli Guyau avaka eivagi.

¹⁸Bogwa leimipukwaigu saina mwau, mitaga gala itugwalaigu bakaliga.

¹⁹Kuulaimwaisi kalapisilela Bwala Kwebumaboma e yeigu basuvi e banokagutoki baisa Guyau.

²⁰Ka, baisa Guyau la kalapisila. Tomitukwaibwaila wala bisuvisi baisa.

²¹Mwa Guyau! Ayakawolaim, paila lokulagaigu, e lokusakaigu peula kidamwa batomgwaga.

²²Dakuna itakilaisi tokwaliai bwala, makwaina ivigaki makawala lipumatala.

²³Baisa ivagi Guyau, makwaina kabokatubau omatadasi.

²⁴Yam lagaila goli Guyau eitomgwaga. Ibodi bitamwasawasi e bitapakasi.

²⁵Bukukolaimasi! Mwa Guyau! Bukukolaimasi! E Guyau, bukuvigakaimasi bakapeulasi goli.

²⁶Ibodi Yaubada bimitukwaii matauna imaima metoya baisa Guyau. Kayakawolaimsi metoya Guyau la Bwala Kwebumaboma.

²⁷Guyau matauna Yaubada, e matauna imitukwaibwailidasi. Oyumami bukuyosisi kai sisila bukuvitouulasi paka makwaina, e bukukwatudelisi bukutavinaisi kabolula.

²⁸Yoku ulo Yaubada e anokagutoki baisa yoku. Bogwa bakamitulaim yoku Tovakaigaga.

²⁹Bitanokagutokisi baisa Guyau, paila matauna giyoubwaila. La yebwaili gala wala biwokuva, bikanigaga goli.