Read Kilivila SAM 119 Bible Online

SAM 119 - Kilivila bible

SAM 119

¹Availa availa matausina gala isim pikolela uwosi, matausina goli imwasawasi. Matausina ibubunasi makawala Guyau la Karaiwaga.[254]

²Availa availa matausina ibokulaisi la karaiwaga makwaisina matausina goli imwasawasi. Matausina ikabikuwolaisi matauna deli ninasi komwaidona.

³Matausina gala avai tuta iuvagaisi sula, e ililoulasi ola keda Guyau.

⁴Mwa Guyau! Lokusakaimasi makwaisina m kwaraiwaga e lokulukwaimasi bakakabikuwolaisi makwaisina deli ma kimadagisi.

⁵Saina apikwaku mwada bakimadagi avai tuta bauvagi makawala m kwatuloluta.

⁶Kidamwa banakaigali komwaidona m kwaraiwaga makwaisina e yeigu gala wala bammosila.

⁷Avai tuta kidikedala m kwaraiwaga duwosisia bikabitutukwaigu, e bogwa bayakawolaim deli nanogu kala migileu.

⁸Bogwa bakabikuwoli m kwaraiwaga makwaisina. Gala avai tuta bukusilavaigu.

⁹Ammakawala taitala totubovau ibodi biyamati la bubunela bimigileu wala? E ibodi bikabikuwoli makwaisina m kwaraiwaga.

¹⁰Avigikoni bawotitalaim metoya onanogu komwaidona. Kukolaigu mwada taga bakoulovi m kwatuloluta.

¹¹Ayamati m Kwaraiwaga onanogu wala, kidamwa gala bamitugaga baisa yoku.

¹²Mwa Guyau! Aiyakawolaim. Anigadaim bukukwatululutaigu.

¹³Yeigu balivilivau komwaidona karaiwaga makwaisina lokusaiki m tomota.

¹⁴Kaina bamwasawa kidamwa bayosi ulo guguwa bidubadu, mitaga ulo mwasawa bisiligaga sainela kidamwa babokuli makwaisina m kwaraiwaga!

¹⁵Atitakutu makwaisina m kwatuloluta e avitusi m vituloki.

¹⁶M kwaraiwaga makwaisina ivigaki ulo mwasawa, e gala wala balumwelavi makwaisina.

¹⁷Kumitukwaibwailigu yeigu m touwata, mapaila baisa basisu tomomova e bakabikuwoli m biga.

¹⁸Kuulaim matagu, kidamwa goli bagisibwailaki avaka kala kamokwita m Kwaraiwaga.

¹⁹Yeigu asisu baisa odabala pwaipwaia tuta pikekita wala, e taga bukukwatupwani makwaisina m kwaraiwaga baisa yeigu.

²⁰Saina iyovi nanogu sainela, paila magigu banikoli m kwaraiwaga tuta komwaidona.

²¹Kukwamitilaki availa availa matausina ninasi walakaiwa, e kubuloti availa availa matausina ikoulovaisi makwaisina m kwaraiwaga.

²²Kutanekwaigu metoya osi bigigaga deli osi yousokana, paila uula auvagi makawala makwaisina m kwaraiwaga.

²³Tokwaraiwaga isigugulasi e ikeiwalaigusi, mitaga yeigu batitakutu m kwatuloluta.

²⁴M kwatuloluta ivigaki ulo kabomwasawa, e makwaisina makawala goli agu tokatayuvisa.

²⁵Yeigu ikalisauwaigusi e akanukwenu opwaipwaia. Mapaila kuyomovivauwaigu makawala avaka bogwa lokukwatotila.

²⁶Yeigu akamituli komwaidona avaka bogwa lavagi, e yoku kuvitakaulokaigu. Mapaila kukwatululutaigu.

²⁷Kupilasaigu e gagabila bitapuloki nanogu makwaisina m kwaraiwaga, e iluyelu nanogu paila m vituloki saina kabokatubau.

²⁸Yeigu ninamwau wala iyomami wowogu. Mapaila kukwatupewolaigu makawala avaka bogwa lokukwatotila.

²⁹Kukolaigu mwada taga basula ogu keda, e om bobwailila kuvitulokaigu m Kwaraiwaga.

³⁰Yeigu bogwa lanagi paila bakabikaula, deli bogwa laligimlili m kwaraiwaga.

³¹Mwa Guyau! Yeigu bogwa labokuli m kwatuloluta, e taga kutagwala availa biyomsilaigu.

³²Yeigu bapwaitukula paila babokuli makwaisina m kwaraiwaga, paila yoku bukukwatumkulovi ulo nikoli.

³³Mwa Guyau! Kuvitulokaigu uulotoula makwaisina m kwaraiwaga, kidamwa bakabikuwoli makwaisina tuta komwaidona.

³⁴Kukwatumiki m Kwaraiwaga baisa yeigu, e bakabikuwoli wala, e bavagi makwaisina deli nanogu komwaidona.

³⁵Kuvigakaigu bakabikuwoli m kwatuloluta, uula wala metoya makwaisina abani ulo mwasawa.

³⁶Gala magigu bidubadu ulo guguwa. Kuvigaki nanogu komwaidona kidamwa bakabikuwoli makwaisina m kwaraiwaga.

³⁷Kuyamataigu mwada taga bikau nanogu avai vavagi makwaisina gala isim dimlesi. Kuvagi bwaina baisa yeigu makawala goli m biga katotila.[255]

³⁸Kuvagi makawala m biga katotila baisa yeigu m touwata - biga katotila makwaina lokuvagi baisa matausina availa availa ikabikuwolaimsi.

³⁹Kukolaigu metoya bigigaga makwaisina lakukoli. Isa bwainigaga m kwaraiwaga.

⁴⁰Magigu bakabikuwoli m karaiwaga makwaisina, e bukusakaigu ulo momova kwaivau, paila yoku tomitukwaibwaila.

⁴¹Mwa Guyau! Kuvitulokaigu kala vakaila m yebwaili paila yeigu, e bukukwatumovaigu makawala goli m biga katotila.

⁴²Oluvi yeigu ibodi bamapu si biga matausina ibigigagaigusi, paila uula bogwa ladubumi m biga.

⁴³Kupilasaigu mwada tuta komwaidona balivala biga mokwita wala, paila uula ulo pikwaku baisa wala m kwaraiwaga.

⁴⁴Yeigu tuta komwaidona bakabikuwoli m Kwaraiwaga, tuta gala biwokuva, gala biwokuva.

⁴⁵Yeigu gala avaka biyomi wowogu, paila uula bogwa lavigikoni kidamwa bakabikuwoli makwaisina m kwaraiwaga.

⁴⁶Yeigu bakamituli m kwaraiwaga makwaisina baisa gweguya, e gala wala bammosila.

⁴⁷Kala kabikaula m kwaraiwaga makwaisina ivigaki ulo kabomwasawa, paila uula yeigu ayebwaili makwaisina.

⁴⁸Yeigu akamiabi deli ayebwaili m kwatuloluta. Mapaila bogwa biiluyelu nanogu paila m kwatuloluta.

⁴⁹Kululuwai m biga katotila baisa yeigu m touwata. Makwaina goli isakaigu ulo pikwaku.

⁵⁰Deli goli ogu tuta mwau kuvisimolaigu, paila m biga katotila eisakaigu ulo momova.

⁵¹Matausina ninasi walakaiwa tuta komwaidona iyosokanaigusi, mitaga m Kwaraiwaga gala wala asilavi.

⁵²E Guyau aluluwai m kwaraiwaga makwaisina omitibogwa, e tuta baisa makwaisina ivisimolaigu.

⁵³Avai tuta agisi tomitugaga iyogwalaisi m Kwaraiwaga, e saina agu leiya goli.

⁵⁴Ogu tuta baisa odabala pwaipwaia, yeigu abutubutu wosi paila wala makwaisina m kwaraiwaga.

⁵⁵E wa bogi aluluwaim, e Guyau aninanamsa paila m Kwaraiwaga.

⁵⁶Ulo kabomwasawa wala, baisa bakabikuwoli m kwaraiwaga makwaisina.

⁵⁷Mwa Guyau! Kammwaleta wala yoku magigu, Yeigu bogwa lakatotila mwada bakabikuwoli m biga.

⁵⁸Ayokakapisi baisa yoku kidamwa bukunokapisaigu, makawala goli m biga katotila.

⁵⁹Bogwa lavitoki tolosila ulo bubunela. e deli goli akatotila babokuli m kwatuloluta.

⁶⁰Bananakwa goli, galaga baluvatuta, e bakabikuwoli makwaisina m kwaraiwaga.

⁶¹Tomitugaga bogwa eileiyasi agu sikula mitaga gala balumwelavi m Kwaraiwaga.

⁶²Olubulotoula yeigu amamata e asimalaula mwada bayakawolaim, paila kidikedala m kwaraiwaga duwosisia.

⁶³Komwaidosi matausina iuwotitalaimsi, deli goli komwaidosi matausina ikabikuwolaisi makwaisina m kwaraiwaga, e mabudona goli lavigaki lubaigwa.

⁶⁴Mwa Guyau! M mitakwai ivakasuwoki wala valu watanawa. E magigu wala bukuvitulokaigu m kwatuloluta.

⁶⁵Mwa Guyau! Bogwa lokuvagi makawala m biga katotila, e bogwa lokuvagi bwaina baisa yeigu m touwata.

⁶⁶Kusakaigu kabitam deli ninitalapula, paila adubumi wala m kwaraiwaga makwaisina.

⁶⁷Omitibogwa lavagi sula, e yoku lokumipukwaigu, mitaga baisa tuta bogwa lakabikuwoli m biga.

⁶⁸Yoku saina bwaina e saina toninabwaila yoku, e bukukwatululutaigu makwaisina m kwaraiwaga!

⁶⁹Matausina ninasi walakaiwa bogwa eisipulokaigusi, mitaga onanogu komwaidona akabikuwoli m kwatuloluta.

⁷⁰Matausina tomota gala wala avaka itapuloki ninasi, mitaga yeigu abani m Kwaraiwaga ulo kabomwasawa.

⁷¹E agu mipuki makwaina eipilasaigu wala, paila ivigakaigu batakutu m kwaraiwaga makwaisina.

⁷²Makwaina Karaiwaga bogwa lokusakaigu kala nanamsa saina wala isiligaga baisa yeigu, e ikalisau komwaidona veiguwala valu watanawa.

⁷³Yoku kububulaigu, deli kukolaigu.[256] Mapaila kusakaigu kabitam, kidamwa batakutu m kwaraiwaga makwaisina.

⁷⁴Matausina availa availa itemmalaimsi bigigisaigusi deli si mwasawa,[257] paila uula adubumi avaka m biga katotila.

⁷⁵Mwa Guyau! Bogwa anikoli m kwaraiwaga duwosisia, e lokumipukwaigu, paila yoku tokimadagi.

⁷⁶Kutugwali m mitakwai bivisimolaigu, makawala bogwa lokukwatotila baisa yeigu m touwata.

⁷⁷Kunokapisaigu, e yeigu basisu tomomova, paila uula m Kwaraiwaga iyomwasali nanogu.

⁷⁸Ibodi matausina ninasi walakaiwa bimmosilasi paila si tabinona sasopa baisa yeigu. Mitaga yeigu aiyenona wala m kwatuloluta.

⁷⁹Ibodi matausina ititemmalaimsi bimakaiagusi, komwaidosi matausina availa availa ikatetasi makwaina m kwaraiwaga.

⁸⁰Ibodi yeigu bakabikuwoli m kwatuloluta, e gala bisim pikolela wowogu, mapaila gala bibodi bamama e bivigaki agu mmosila.

⁸¹Mwa Guyau! Bogwa lasomata latutulaim paila bukukwatumovaigu, paila yeigu adubumi wala m biga.

⁸²Matagu bogwa isomata vatoi paila avaka bogwa lokukwatotila, e tuta tuta anigadaim kawagu, “Ki, avai tutaga bukupilasaigu?”

⁸³Yeigu makawala wawa wala, gala isim dimlegu, mitaga gala wala alumwelavi makwaisina m kwaraiwaga.

⁸⁴Ammakawala kala kaduwonaku batulotula tuvaila? E avai tuta bukumipuki matausina eilamidadaigusi?

⁸⁵Tauwau tokaluvalova matausina gala ikabikuwolaisi m Kwaraiwaga. Bogwa eileiyasi agu sikula metoya nobwala eikelaisi.

⁸⁶Komwaidona m kwatuloluta ibodi wala bakadubumaisi. Mwa! Kupilasaigu metoya tomota matausina eilamidadaigusi metoya osi sopa.

⁸⁷Matausina bogwa wala makateki bipeulasi e bikatumataigusi. Mitaga yeigu gala wala basim pwaitukula paila m kwaraiwaga makwaisina.

⁸⁸Paila uula yoku tomitakwai kumitukwaibwailigu, e gagabila yeigu bakabikuwoli makwaisina m kwaraiwaga.

⁸⁹Mwa Guyau! M biga gala biwokuva, bikanigaga goli, e baisa ikanigaga wala wa labuma.

⁹⁰E m kimadagi bisetuwoli goli oluwalaisi tubwa komwaidona. Yoku bogwa kusaibogwi valu watanawa okabala, e makawala goli ikanuvagasi.

⁹¹E vavagi komwaidona eikanuvagasisi omitibogwa e leima lagaila, uula wala makwaisina m kwaraiwaga, paila komwaidona makwaisina iwotitalaimsi goli.

⁹²Ulo mwasawa uulotoula m Kwaraiwaga. Kidamwa gala makawala, e yeigu bogwa bakaliga metoya ogu mmayuyu.

⁹³Yeigu gala avai tuta bakilavi m kwatuloluta, uula metoya baisa makwaisina yoku bogwa lokuyomovaigu.

⁹⁴Yeigu goli m vavagi - e, kukwatumovaigu! Bogwa lavigikoni mwada bakabikuwoli makwaisina m kwaraiwaga.

⁹⁵Tomitugaga eitutulaigusi wala mwada bikatumataigusi, mitaga ibodaigu wala baiyenona m kwaraiwaga makwaisina.

⁹⁶E bogwa eitapuloki nanogu kidamwa vavagi komwaidona isim kalitulesi, mitaga makwaisina m kwaraiwaga bwainawokuva wala.

⁹⁷Saina ayebwaili m Kwaraiwaga. Yam kwemwaidona aiyenona wala paila makwaina.

⁹⁸Makwaisina m kwaraiwaga isisu onanogu tuta komwaidona. Ipilasaigu e ulo kabitam ikalisau si kabitam agu tilaula.

⁹⁹Ulo kateta ikalisau komwaidosi agu tovituloki, uula aiyenona wala m kwatuloluta.

¹⁰⁰Ulo kabitam ikalisuwoli tommoya si kabitam, uula akabikuwoli makwaisina m kwaraiwaga.

¹⁰¹Bogwa lapaiki komwaidona mitugaga, uula mwada bakabikuwoli m biga.

¹⁰²Gala goli akilavi m kwatuloluta, uula yoku titoulem wala agu tovituloki.

¹⁰³Kakamwenala m kwatuloluta saina simokainia, ikalisau kitorina kala simokainia.

¹⁰⁴Abani kabitam metoya om kwaraiwaga makwaisina e mapaila bogwa lapaiki mitugaga komwaidona.

¹⁰⁵M biga ikugwaiyaigu makawala kaitapa omatagu, e ivakadaigu makawala lumalama ititapi ulo keda.

¹⁰⁶Bogwa bavagi makawala ulo biga katotila saina mwau, kidamwa bakabikuwoli m kwatuloluta duwosisia.

¹⁰⁷E Guyau, laboda mmayuyu saina mwaugaga. Kukwatumovaigu, makawala lokukwatotila bukuvagi.

¹⁰⁸Mwa Guyau! Bukulagi ulo nigada nokagutoki, e bukuvitulokaigu makwaisina m kwaraiwaga.

¹⁰⁹Tuta komwaidona abudoboda kabosilagi,[258] mitaga gala wala alumwelavi m Kwaraiwaga.

¹¹⁰Tomitugaga ileiyasi agu sikula, mitaga gala wala akoulovi makwaisina m kwaraiwaga.

¹¹¹M kwatuloluta baisa ulo kaikeya. Makwaisina goli kaiyomwasalela nanogu.

¹¹²Bogwa lanagi mwada bakabikuwoli makwaisina m kwaraiwaga, bila kala kalitutila wala bakaliga.

¹¹³Yeigu mina kukologu wala matausina gala ininatotilasi baisa yoku, mitaga ayebwaili wala m Kwaraiwaga.

¹¹⁴Yoku wala agu taboda deli agu tokwala, mapaila apikwaku wala m biga katotila.

¹¹⁵Yokomi tomitugaga kusilavaigusi wala. Yeigu bogwa bakabikuwoli ulo Yaubada la karaiwaga makwaisina.

¹¹⁶Bukusakaigu peula, makawala m biga katotila, e bamova goli, e taga kutagwala ulo pikwaku biyomwau nanogu.

¹¹⁷Mwa! Kuyosaigu e bogwa bakwala, e yeigu tuta komwaidona banakaigali m kwaraiwaga makwaisina.

¹¹⁸Yoku kupaiki availa availa matausina ikoulovaisi makwaisina m kwaraiwaga. Si katuduvidavi gala wala isim dimlela.

¹¹⁹Yoku kuvigaki matausina tomitugaga makawala wawa wala. Mapaila baisa, yeigu ayebwaili wala m kwatuloluta.

¹²⁰Yeigu isim agu kokola paila uula wala yoku. Makwaisina m kwaraiwaga wala ibulukukolaigu sainela.

¹²¹Yeigu bogwa lavagi avaka duwosisia deli bwaina. Taga bukusilavaigu mwada agu tilaula biyosaigusi.

¹²²E kukwatotila mwada bukupilasaigu yeigu m touwata, e taga bukutagwala tokaluvalova bilamidadaigusi.

¹²³Matagu bogwa eisomata vatoi paila m kwatumova bipilasaigu, paila m kwatumova makwaisina bogwa lokukwatotila.

¹²⁴Kuvigakaigu makawala m mitakwai, deli bukukwatululutaigu makwaisina m kwaraiwaga.

¹²⁵Yeigu goli m touwata, mapaila kusakaigu ninitalapula, e igagabila banikoli makwaisina m kwaraiwaga.

¹²⁶Mwa Guyau! Baisa tuta m tuta paila bukuvagi avaka, paila tomota ikikoulovaisi m Kwaraiwaga.

¹²⁷Yeigu ayebwaili goula sitana wala, e goula saina mwau mapula ayebwaili, mitaga ulo yebwaili paila makwaisina m kwaraiwaga saina siligaga goli.

¹²⁸E mapaila abokuli komwaidona m kwatuloluta, e apaikiga komwaidona keda kadasulosula.

¹²⁹Makwaisina m kwaraiwaga saina kabokatubau, e akabikuwoli makwaisina metoya onanogu komwaidona.

¹³⁰M biga kala katumiki ivigaki makawala kaitapa, eivigaki tobubeikam bibanaisi si kabitam.

¹³¹Saina magigu balagi makwaisina m kwaraiwaga, e atiliawai wala paila saina magigu sainela makwaisina.

¹³²Kutovilakaigu e bukunokapisaigu, makawala goli kuvigaki komwaidosi matausina iyebwailimsi.

¹³³Makawala m biga katotila, kukolaigu mwada taga bakapusi. Taga bukutagwala mitugaga bikalisauwaigu.

¹³⁴Bukukolaigu metoya matausina ilamidadaigusi, kidamwa bakabikuwoli m kwaraiwaga makwaisina.

¹³⁵Om mitakwai bukusividulaigu e bukukwatululutaigu makwaisina m kwaraiwaga.

¹³⁶Mitilagigu ibubusi makawala waya, paila tomota gala bikabikuwolaisi m Kwaraiwaga.

¹³⁷Mwa Guyau! Yoku tomitukwaibwaila e m kwaraiwaga makwaisina duwosisia goli.

¹³⁸Karaiwaga makwaisina lokusakaimasi kibobuta goli deli duwosisia.

¹³⁹Ulo gibuluwa ilululu olopogu makawala kova, paila agu tilaula eiligaimwaisi m kwaraiwaga makwaisina.

¹⁴⁰Kala kamokwita m biga katotila. Yeigu saina ayebwaili makwaina.

¹⁴¹Yeigu gala avaka agu yeiwau e ikaluwouwaigusi wala, mitaga gala wala akilavi m kwaraiwaga makwaisina.

¹⁴²M mitukwaibwaila bikanigaga goli, e m Kwaraiwaga tuta komwaidona mokwitawokuva wala.

¹⁴³Tuta komwaidona imomwau nanogu deli anokubukubu, mitaga m kwatuloluta iyomwasalaigu goli.

¹⁴⁴M kwatuloluta tuta komwaidona duwosisia. Bukusakaigu ninitalapula, e bogwa basibwabwaila goli.

¹⁴⁵Mwa Guyau! Onanogu komwaidona adou baisa yoku. Kumapu ulo dou e bakabikuwoli makwaisina m kwaraiwaga!

¹⁴⁶Adou baisa yoku. Kukwatumovaigu, e bavagi makawala m kwaraiwaga makwaisina.

¹⁴⁷Igau gala biyamtatoula adou baisa yoku paila pilasi. Apikwaku goli m biga katotila.

¹⁴⁸Bogi komwaidona yeigu ammamata, e aiyenona paila m kwatuloluta.

¹⁴⁹Mwa Guyau! Kunakaigalaigu, kunokapisaigu, kukoli ulo momova, paila m mitakwai gala kala kalitutila.

¹⁵⁰Agu tolamadada bogwa ivakatitaikinasi wala, matausina gala avai tuta ivagaisi makawala m Kwaraiwaga.

¹⁵¹Mitaga yoku kuvakatitaikina baisa yeigu. Mwa Guyau! Komwaidona m kwaraiwaga makwaisina ikanabogwasi wala.

¹⁵²Tuta omitibogwa atakutu wala m kwatuloluta. Lokuvigaki makwaisina bikanuvagasi tuta gala biwokuva.

¹⁵³Mwa Guyau! Kugisi kagu mmayuyu e kukwatumovaigu, paila yeigu gala wala akilavi m Kwaraiwaga.

¹⁵⁴Kupilasaigu ogu wotetila, deli kutanekwaigu. Kukwatumovaigu makawala bogwa lokukwatotila.

¹⁵⁵E tomitugaga gala wala bukukwatumovi, paila uula gala ikabikuwolaisi makwaisina m kwaraiwaga.

¹⁵⁶Mitaga yoku Guyau m nokapisi saina vakaigaga. Kunokapisaigu e kuyomovaigu.

¹⁵⁷Agu tilaula deli agu tolamadada saina bidugaga, mitaga yeigu gala wala basim kwabikaula baisa makwaisina m kwaraiwaga.

¹⁵⁸Avai tuta bagisi matausina eiyogwalaisi m kwaraiwaga, yeigu saina wala agu leiya, paila uula gala wala ivagaisi makawala makwaisina m kwaraiwaga.

¹⁵⁹Mwa Guyau! Kugisi ammakawala layebwaili m kwatuloluta. Yoku m yebwaili gala avai tuta bukukwatumapu, mapaila kukwatumovaigu.

¹⁶⁰M Kwaraiwaga uulotoula baisa kamokwita, e komwaidona m kwaraiwaga duwosisia, makwaisina kwekanuvagasi goli.

¹⁶¹Topeuligaga gala dimlela iwaigusi goli, mitaga yeigu akamiabi m Kwaraiwaga.

¹⁶²Ulo mwasawa gala bitakaibiga, paila uula goli makwaisina m biga katotila, e ulo mwasawa makawala matauna ibani veiguwa makwaina mapula saina mwaugaga.

¹⁶³Yeigu kukologu deli saina agu leiya paila sasopa komwaidona, mitaga yeigu ayebwaili m Kwaraiwaga.

¹⁶⁴Yam kwaitala kwaitala yeigu asivalima asivayu anokagutoki baisa yoku, paila m kwaraiwaga duwosisia.

¹⁶⁵Matausina availa availa iyebwailisi m Kwaraiwaga bogwa ibanaisi kabokwala mokwita, e gala avai vavagi igagabila bivakapusii matausina.

¹⁶⁶E Guyau latutulaim wala paila bukukwatumovaigu, e auvagi makawala makwaisina m Kwaraiwaga.

¹⁶⁷Yeigu akabikuwoli makwaisina m kwaraiwaga, e ayebwaili metoya onanogu komwaidona.

¹⁶⁸Yeigu akabikuwoli makwaisina m kwaraiwaga deli m kwatuloluta, e yoku kugigisi komwaidona avaka avaka auvagi.

¹⁶⁹Mwa Guyau! Kutagwala bukulagi ulo dou paila pilasi! Kusakaigu ninitalapula makawala bogwa kukwatotila.

¹⁷⁰Mwa! Kunakaigali ulo nigada, e kukwatumovaigu makawala bogwa lokukwatotila.

¹⁷¹Yeigu tuta komwaidona baiyakawolaim wala, paila uula kukwatululutaigu makwaisina m kwaraiwaga.

¹⁷²Yeigu bawosi butula m Kwaraiwaga paila m kwaraiwaga makwaisina duwosisia.

¹⁷³Ibodi tuta komwaidona bukukwatubaiasa paila bukupilasaigu, paila uula abokuli makwaisina m kwaraiwaga.

¹⁷⁴Mwa Guyau! Saina magigu sainela m pilasi bikatumovaigu, paila abani ulo mwasawa metoya om Kwaraiwaga.

¹⁷⁵Mwa! Kusakaigu ulo momova, e gagabila bayakawolaim. Ibodi m kwatuloluta bipilasaigusi.

¹⁷⁶Yeigu awowau makawala natana sipi eitamwau, mapaila kuma kunevaigu yeigu m touwata. Paila yeigu gala wala akilavi makwaisina m kwaraiwaga.