Read Kilivila SAM 135 Bible Online

SAM 135 - Kilivila bible

SAM 135

¹Kala yakaula Guyau! Yokomi la towotetila Guyau kuyakawolaisi matauna,

²yokomi lokutotusi olumoulela Guyau la bwala, ola Bwala Kwebumaboma da Yaubadasi.

³Kuyakawolaisi Guyau, paila matauna giyoubwaila. Kuwosisi kala yakaula matauna, paila matauna toninabwaila.

⁴Matauna inagi Yekobe paila titoulela, e inagi mina Isireli paila la vavagi tatoula.

⁵Bogwa lanikoli da Guyausi matauna toveka, ikalisuwoli komwaidosi ituwoli yaubada.

⁶Matauna biuvagi avaka wala magila bivagi, wa labuma, deli ovalu watanawa, obolita, deli otukutaku.

⁷Matauna bimai utuyagila deli kala bwau metoya obusibusila valu. Matauna ivigaki utuyagila isim kala kavikavila, deli isunupuloi yagila imai metoya ola kabosakaila.[279]

⁸Mapilana Itipita matauna ikatumati komwaidona kuluta, tomota deli mauna makawala wala.

⁹E metoya mapilana, matauna iuvagi kabutuvatusi deli kabokatubau, mwada bimipuki matauna guyau deli komwaidona la tosikwawa.

¹⁰Matauna ikodidaimi bidubadu boda ituwoli ituwoli, deli ikatumati gweguya saina mina papeula.

¹¹Yagasi Siyoni, matauna mina Amora si guyau, Ogi matauna guyoula Basani, deli goli komwaidosi guyousi Kenani.[280]

¹²Matauna ikau si pwaipwaia isaiki la tomota, e isaiki baisa mina Isireli.

¹³Mwa Guyau! Yoku tuta komwaidona bakakamitulaimsi wala yoku Yaubada, e tubwa komwaidona bogwa biluluwaimsi.

¹⁴Guyau bitabodi la tomota, deli binokapisi la towotetila.

¹⁵Boda ituwoli ituwoli si yaubada minasina eibubulokaisi metoya wa siliba deli goula, e metoya oyumasi wala eiyoudulaisi minasina.

¹⁶Minasina isim udosi, mitaga gala gagabila bilivalasi e isim mitasi, mitaga gala gagabila bigisasi.

¹⁷Isim taigasi, mitaga gala gagabila bilegasi, deli minasina gala wala igagabila biyagisasi.

¹⁸Ibodi komwaidosi availa availa eibubulaisi e eidubumaisi minasina, bidavilasi wala bimila tokolusi, makawala minasina bogwa eibubulaisi.

¹⁹Kuyakawolaisi Guyau yokomi mina Isireli! Kuyakawolaisi matauna, yokomi la tolula Yaubada!

²⁰Kuyakawolaisi Guyau, yokomi mina Libai![281] Kuyakawolaisi matauna, komwaidomi yokomi totapwaroru!

²¹Kuyakawolaisi Guyau mapilana Saiyoni, e mapilana Yerusalem, makwaina la valu tatoula. Kala yakaula Guyau!