Read Kilivila SAM 139 Bible Online

SAM 139 - Kilivila bible

SAM 139

¹Mwa Guyau! Lokugisimlilaigu tomwaidogu e kunikolaigu wala.

²Komwaidona avaka avaka lauvagi yoku kunikoli wala. Kusikaduwonaku mitaga kukwateta ulo nanamsa komwaidona.

³Yeigu kaina lauwotetila kainaga lauvaiwasi, mitaga yoku kugigisaigu goli. Kunikoli komwaidona avaka avaka lauvagi.

⁴Igau gala balivala, e yoku kunikolibogwi avaka bakaibigi.

⁵Yokugwa kutoulaigu ambaisa ambaisa, e metoya om peula kukolaigu goli.

⁶Gala gagabila bakateta kala vakaila m nikoli paila yeigu, paila kunikoli tomwaidogu e itutuvakau nanogu m nikoli.

⁷Mwada basakaula metoya baisa yoku, e ambaisaga bam? E ammakawala basakaula metoya omatam?

⁸Kidamwa bamwena bala labuma, yoku bogwa kusisu baisa. Kainaga balokaia Tuma akenu, e yoku bogwa kusisu baisa.

⁹Kidamwa balokaia mapilana opilibomatu kainaga bamili valu mapilana opilikwaibwaga,

¹⁰ka, yoku kusibogwa paila bukuvakadaigu, e mapilawena kusisu paila bukupilasaigu.

¹¹kaina gagabila baluki dudubila bikubolaigu, kaina lumalama ititapaigu baluki bidavila bimila bogi.

¹²Mitaga dudubila yoku gala wala bukudoki dudubila, e yoku kudoki bogi saina lumalama makawala yam. Dudubila deli lumalama kudoki makawala wala.

¹³Yoku bogwa kububuli katuputupwaila wowogu e kuvisosaigu olopola inagu.

¹⁴Aiyakawolaim, paila ibodi kam kokola bisisu. Komwaidona avaka avaka kuuvagi saina kabokatubau, e baisa bogwa anikoli deli nanogu komwaidona.

¹⁵Tutala tutuwanegu ibububulasi, e kububulaigu goli olopola inagu. Akanupepuni baisa akakaitubwa, e yokugwa kunikolibogwi makanakila baisa.

¹⁶Igau gala akaloubusi yoku bogwa kugisibogwaigu. Tutala ulo yam gala bivitouula, yoku bogwa lokuginibogwi om buki[287] avaka kala bawa yam makwaisina babani.

¹⁷Mwa Yaubada! M nanamsa saina kwevakaigaga,[288] e makwaisina saina bidugaga goli.

¹⁸Kidamwa bakalau makwaisina, bogwa bikalisau kanakenuva kala bawa. E ka, tutalaga bamamata,[289] yoku wala mayeigu.

¹⁹Mwa Guyau! Saina magigu bukukwatumati tomitugaga. Saina magigu togigasisi bisilavaigusi.

²⁰Ibigigagaimsi e ipakaimsi, e ilivalaisi vavagi gaga paila yoku.

²¹E Guyau, mina kukologu wala matausina ikikoulovaimsi, e akaluwou matausina availa availa bogwa eipakaimsi.

²²Ulo kowolova paila matausina mina kukologu gala wala isim kala kalitutila, e matausina ladoki agu tilaula goli.

²³Mwa Guyau! Bukugisimlilaigu tomwaidogu e bukunikoli nanogu. Bukuwakolaigu e bukubani ulo nanamsa.

²⁴Bukunevikoli kaina bukubani avai vavagi gaga olumoulegu, e bukuvakadaigu bala keda makadana kadakanigaga[290] babani momova.