Read Kilivila SAM 140 Bible Online

SAM 140 - Kilivila bible

SAM 140

¹Mwa Guyau! Kukwatumovaigu metoya matausina tomitugaga. Kukolaigu metoya matausina togigasisi.

²Matausina tuta komwaidona ikikeiwalasi paila mitugaga, tuta komwaidona deli wala si kominimani.

³Mayesi makawala keiyuna naiyayana, e si biga[291] makawala lou tigininila.

⁴Mwa Guyau! Kutabodaigu metoya osi peula tomitugaga. Kukolaigu metoya togigasisi, matausina eikikeiwalasi paila ulo kapusi.

⁵Matausina ninasi walakaiwa ileiyasi sikula paila yeigu, e isailisi agu buluva ogu keda paila biyosaigusi, e ogu keda ileiyasi tuvaila agu sikula paila mwada bawai.

⁶Aluki Guyau kawagu, “Yoku wala ulo Yaubada.” Mwa Guyau! Kulagi ulo nigada paila pilasi.

⁷Mwa! Guyau ulo Yaubada, yoku agu taboda topeula. Yoku bogwa lokukolaigu olopola kabilia.

⁸Mwa Guyau! Gala bukusaiki tomitugaga avaka magisi. Gala bukutagwala bipeulasi metoya avaka eikikeiwalasi.

⁹Gala bukutagwala agu tilaula bitomgwagasi. Avaka eikapokaigusi kukwaimilivau baisa matausina.

¹⁰Ibodi pwanosi saina yuviyavi bidebwalisi ouwosi matausina. Ibodi bukulavi matausina bilosi olumoulela mlopu[292] e gala avai tuta bisunapulasi.

¹¹Ibodi matausina totabinona bimamasi. E ibodi si mitugaga biyosi togigasisi e bikatumtuwoli matausina.

¹²Mwa Guyau! Anikoli yoku kupii matausina tonamakava, e kusaiki matausina gumalawa avaka bibodi si kaisisu.

¹³Tomitukwaibwaila mokwita wala biyakawolaimsi. Matausina bisisuaisi deli yoku.