Read Kilivila SAM 144 Bible Online

SAM 144 - Kilivila bible

SAM 144

¹Kala yakaula Guyau, matauna agu tokwala! Matauna ivakadaigu paila kabilia, e ikatubiasaigu paila bakabilia.

²Matauna agu tokwala deli agu taboda, ulo kabosipepuni deli agu tokwatumova, e metoya baisa matauna adubumi paila babwaina. Matauna ivabu boda ituwoli ituwoli osikowagu.

³Mwa Guyau! Avakaga tomota, kidamwa bibodi bukuvitoki tolosisi? E ammakawala mina watanawa, tuta komwaidona lokunakaigali matausina?

⁴Matausina makawala wala myala yagila, e si yam eiukuwokuva makawala kaikonigula eiukuwokuva.

⁵Mwa Guyau! Kukisi labuma e kubusiga kuma ovalu watanawa. Kukwabikoni koya makwaisina e bikasauwaisi mseu.

⁶Kuwitali kavikavila bima e kubutugigai kam tilaula. Kulavi m kwaiyala e kuvigaki matausina bisakaulasi.

⁷E metoya walakaiwa kukwalakova e kubiaigu kumaiyaigu metoya otilibwabwau[297] e kukolaigu. Ibodi bukukwatumovaigu metoya oyumasi togilagala,

⁸matausina gala avai tuta bilivalasi avaka kamokwita, deli goli bisisasopasi otutala yakala.

⁹Mwa Yaubada! Yeigu bawosi pilatala wosi pilavau baisa yoku. Bawawai ulo gita deli wosigu baisa yoku.

¹⁰Yoku kusaiki gweguya si tomgwaga, deli kukoli m touwata Debida.

¹¹Mwa! Kukwatumovaigu metoya agu tilaula tovakatutuki. Kukolaigu metoya oyumasi togilagala, matausina gala avai tuta bilivalasi avaka kamokwita, e deli goli bisisasopasi otutala yakala.

¹²Ibodi litumaiasi tauwau osi tuta tubovau bitubwasi, makawala kai makaisina isusinasi kaipapeula. Ibodi litumaiasi vivila kasi naminabwaita, makawala kokolela ligisa isim kala katububula.

¹³Ibodi ma bwaimasi bivakasau metoya bagula kala kabinai. Ibodi ma sipisi oma kwabilasi bivilulaisi litusia lakatuluwovila.

¹⁴Ibodi ma bulutuvalusi biviluluvausi saina bidugaga, e gala biyopoisi kaina bisolovaisi litusia. Ibodi vilumgaga gala bisisu olopola ma valusi.

¹⁵Bimwasawasi avai boda avai boda kidamwa mokwita wala bikaloubusisi makawala baisa matausina. Tomota matausina eivigakaisi Yaubada si Guyau, ibodi bimwasawasi goli.