Read Kilivila SAM 145 Bible Online

SAM 145 - Kilivila bible

SAM 145

¹Ulo Yaubada ulo Guyau yoku, bakamitulaim yoku saina Tovakaigaga, e banokagutoki baisa yoku, tuta tuta gala biwokuva.

²Yam kwaitala kwaitala banokagutoki baisa yoku, e bayakawolaim tuta tuta gala biwokuva.

³Guyau matauna Toveka, e ibodi bitayakawoli sainela. Saina Towalakaiwa matauna, gala goli bitakaibiga.

⁴Tomota biyakawolaisi vavagi makwaisina avaka yoku lokuvagi, e tubwa matubona bilivalaisi baisa matubona tubwa igau bima. Bogwa bikamitulaisi vavagi topilaveka avaka yoku lokuvagi.

⁵Bilivalasi paila kam kwatububula deli m giyouveka, e yeigu baiyenona paila m vavagi makwaisina kabokatubau.

⁶Tomota bilivalaisi vavagi topilaveka avaka yoku lokuvagi, e yeigu bakamitulaim yoku Tovakaigaga.

⁷Bilivalasi paila komwaidona m bobwailila, deli biusiwosisi paila m ninabwaila.

⁸Guyau matauna toyebwaili e tonokapisi. Tomanum matauna, iyobali kala leiya e saina tomitakwai.

⁹Imitukwaibwaili tomota komwaidosi, e inokapisi vavagi komwaidona avaka avaka eibubuli.

¹⁰Mwa Guyau! Tommomova komwaidosi biyakawolaimsi, e komwaidosi m tomota binokagutokisi baisa yoku.

¹¹Bilivalasi paila m giyouveka isim kala katububula, deli bikamitulaisi m peuligaga,

¹²kidamwa tomota komwaidosi binikolaisi vavagi topilaveka avaka lokuvagi deli m kwabokwaraiwaga kala katububula saina ivivivila.

¹³M guyau gala biwokuva, bikanigaga goli, e yoku bukuguyau tuta gala wala biwokuva. Guyau iuvagi komwaidona avaka eikatotila, e avaka avaka iuvagi, komwaidona goli bwaina.

¹⁴Ipilasi matausina eibodasi mwau, e matausina eikapusisi itokowoi.

¹⁵Komwaidona tommomova imitakavataimsi deli si vinagai, e avai tuta magisi bikamsi, yoku kusaiki kʹasi.

¹⁶Kusaiki avaka bibodi, e komwaidosi bikamsi bikomatasi.

¹⁷Guyau tomitukwaibwaila e komwaidona avaka avaka iuvagi mitukwaibwaila wala, e ola vavagi komwaidona iyomitali la nokapisi.

¹⁸Availa availa idousi baisa matauna, isikaili otalisi matausina, availa availa idoudousi baisa matauna deli ninasi kala duwosisia.

¹⁹Isisaiki komwaidona avaka magisi baisa matausina availa availa itemmalaisi matauna. Ililagi si dou, e ikatumovi wala matausina.

²⁰Ikoli komwaidosi availa availa iyebwailisi matauna, mitaga bogwa bikatumtuwoli tomitugaga.

²¹Tuta komwaidona bayakawoli Guyau. Ibodi komwaidosi tommomova biyakawolaisi matauna Tobumaboma tuta gala wala biwokuva.