Read Kilivila SAM 16 Bible Online

SAM 16 - Kilivila bible

SAM 16

¹Mwa Guyau! Bukukolaigu. Adubumaim wala kidamwa gala basilagi.

²Aluki Guyau kawagu, “Yoku ulo Guyau,[39] e komwaidona vavagi bwaina avaka avaka laiyosi leimaisi metoya baisa yoku.”

³Guyau la tomota tokimadagi, matausina saina bwainigaga. O kidamwa basikaili matausina. Baisa bivigaki ulo mwasawa sainela.

⁴Availa availa matausina isakaulasi bilokaiasi yaubada ituwoli ituwoli, e matausina goli ibudobodasi bidubadu vavagi mwau. Yeigu gala batoulala deli matausina tutala bigabwaisi si lula, e gala batapwaroru baisa si yaubada minasina.

⁵Mwa Guyau! Nanogu kammwaleta wala yoku, e yoku kusisakaigu vavagi komwaidona avaka bibodaigu. Adubumaim wala kidamwa bukuyamataigu lagaila e tuta gala biwokuva.

⁶Bobwailila makwaisina avaka lokusakaigu saina kabokatubau. Saina bwaina goli vavagi makwaisina.

⁷Aiyakawoli Guyau paila iuvakadaigu, e wa bogi nanogu kala mimilakatila iyoluluwaiyaigu.

⁸Tuta komwaidona alumkoli Guyau isikailigu. Matauna isividulaigu, e gala gagabila avaka bimotitanaigu.

⁹Mauula anokagutoki e imwamwasila nanogu, e agu lumkola bwaina sainela, gala avaka gagabila biyogagaigu.

¹⁰Paila yoku kukolaigu metoya kaliga kala peula. Yoku goli gala bukutugwalaigu, yeigu tombwailim goli, kidamwaga bala mapilana Tuma.[40]

¹¹Bogwa bukuvitulokaigu keda makadana kedala momova. Yoku kusikailigu mauula nanogu imwamwasila sainela, e mapaila alumkoli mwasawa, mwasawa gala biwokuva, bikanigaga.