Read Kilivila SAM 18 Bible Online

SAM 18 - Kilivila bible

SAM 18

¹[43] Mwa Guyau! Saina ayebwailim! Yoku wala agu tokwala.

²Guyau matauna ulo vayoula. Matauna agu kwali kwaipeula. Ulo Yaubada matauna ulo kabokwala, e kidamwa basisu deli matauna, gala wala basilagi. Matauna itabodaigu makawala vayoula. Matauna ikolaigu e gala goli basilagi.

³Adou baisa Guyau, e matauna ikolaigu metoya agu tilaula. Kala yakaula Guyau!

⁴Kabokaliga bogwa eivaulaigusi eivapataigusi, e kaisaila katumata ikikawoulasi e ikubolaigusi.

⁵Kabokaliga bogwa eivaulaigusi, e laka eileiya agu sikula.

⁶Ogu tuta mwau adou baisa Guyau. Adou baisa ulo Yaubada paila pilasi. Matauna ola Bwala Kwebumaboma[44] ilagi kaigagu e inakaigali ulo dou paila pilasi.

⁷E oluvi valu watanawa immotatina deli iigayega. Tumilesi koya makwaisina iigayegasi deli immolikusi, paila Yaubada bogwa eigibuluwa.

⁸Mseu iyoulapula metoya okabulula, e kovasupa deli pwanosi kwelululu iyoulapulasi metoya owodola.

⁹Matauna ikopwali gawata e ibusi ima deli lowalowa piladudubila okwaibakwaila.

¹⁰Isila otapwala natana bubuli isim pinupanela,[45] e saina nanakwa leima. E yagila ivigaki pinupanela leimakaiagu.

¹¹Ivakanunuvi titoulela metoya odudubila, e lowalowa saina pilapupoupou ikasewoki sopi ikubolaisi matauna,

¹²Kuna kwekulokula deli mayela kova iviloubusisi metoya kavikavila makwaina ikukugwai matauna, e iloupwali lowalowa mapilasina piladudubila.

¹³E Guyau ibutupilapala metoya ogawata, e kaigala matauna Towalakaiwa Sainela[46] iyoulapula.

¹⁴Ilavi la kaiyala ikaligigai kala tilaula. Ibokavili matausina metoya olumalamela kavikavila.

¹⁵Mwa Guyau! Tuta makwaina lokukwamitilaki kam tilaula, e lokuweyabolu baisa matausina deli m gibuluwa, e tukutaku omilaveta eimidakopwa deli valu watanawa tumalela[47] ikatukuluvi.

¹⁶Guyau ikalakova metoya walakaiwa e ilitakaigu. Ibiaigu ayoulapula metoya otulubwabwau.

¹⁷Matauna ikolaigu metoya agu tilaula saina topapeula, e deli goli metoya matausina komwaidosi ivigakaigusi tokukolosi. Paila matausina eipeulasi eikalisauwaigusi.

¹⁸Ogu tuta mwau imaisi mwada biwaigusi mitaga Guyau wala itabodaigu.

¹⁹Matauna ipilasaigu metoya okabosilagi. Ikolaigu paila yeigu ayomwasali matauna.

²⁰Guyau immapwaigu paila auvagi duwosisia. Imitukwaiyaigu paila yeigu tobwaila wala.

²¹Bogwa lakabikuwoli la Karaiwaga Guyau, e gala wala atotubuloki ulo Yaubada.

²²Bogwa lakabikaula makwaisina la karaiwaga komwaidona, e gala wala akoulovi la karaiwaga.

²³Matauna bogwa inikoli gala avaka agu pakula, e yeigu gala atugwalaigu baisa uvagila sula.

²⁴E mapaila immapwaigu uula auvagi avaka duwosisia, paila inikoli yeigu tobwaila wala.

²⁵Mwa Guyau! Yoku kukimidagi availa availa matausina ikimidagaimsi, e kuuvagi saina bwaina sainela baisa matausina si bubunela bwainawokuva wala.

²⁶Yoku tomigileu baisa matausina availa availa tomigileu, mitaga kam gigisa gibu wala baisa matausina tomitugaga.

²⁷Kukwatumovi matausina availa availa ninasi watanawa, Mitaga kuvabu availa availa matausina ninasi walakaiwa.

²⁸O Guyau, lokusakaigu lumalama.[48] Yoku m lumalama ititapi ulo dudubila.

²⁹Yoku kusakaigu peula paila bawaiya agu tilaula, deli kusakaigu peuligaga paila bakodidaimi agu tilaula kasi taboda.

³⁰Matauwena Yaubada! O isa bwainigaga avaka avaka eiuvagi! Ibodi bitadubumaisi la biga! Matauna makawala kavitala vayoula paila matausina availa availa inevisi kabokwala baisa matauna.

³¹Guyau matauna kalamwaleta wala Yaubada. Yaubada wala kalamwaleta kada tabodasi.

³²Matauna wala Yaubada ivigakaigu lapapeula. Matauna iiyamati ulo keda e gala basilagi.

³³Matauna ivigakaigu baloula oraibwaga makawala ugiwagi, e makawala ikolaigu wa koya makwaisina.

³⁴Matauna ivakadaigu kidikedala kabilia, mapaila baisa ibodaigu bakabi kaiyala.

³⁵Mwa Guyau! Kutabodaigu e deli kukolaigu. M yamata ivigakaigu bogwa latodabala, deli m peuligaga ikolaigu tuta komwaidona.

³⁶Yoku gala kutagwala availa bikatupipaigu, e mauula gala avai tuta akapusi.

³⁷Avakuli wala agu tilaula e bayosi matausina, e gala wala basim tatoula wala bamtuli matausina.

³⁸Awaiya matausina ikapusisi, e gala ibodi bitokaiasi. Ikanukwenusi wala omatagu, paila bogwa lakalisau matausina.

³⁹Yoku bogwa kukwatupewolaigu okabilia, e latomgwaga odubasi agu tilaula.

⁴⁰Kuvigaki agu tilaula bisakaulasi metoya baisa yeigu, e amtuli matausina availa availa eivigakaigusi tokukolosi.

⁴¹Idousi paila pilasi, mitaga gala wala availa bikoli matausina. Idousi baisa Guyau mitaga gala wala itama.

⁴²Akomtumtu matausina e ivigaki makawala tubumyou avaka yagila biyuvisau bilau. Avapupoi matausina makawala pwadidiweta olopola keda.

⁴³Yoku kukolaigu metoya baisa tomota matausina tokosomapu,[49] deli kuvigakaigu batokwaraiwaga odubasi boda ituwoli ituwoli. Tomota matausina gala anikoli baisa tuta bogwa lavigaki agu viloumgwa.

⁴⁴Togilagala ikululusi omatagu. Avai tuta bilagaigusi, matausina bikabikaulasi.

⁴⁵Bikitumouwaisi si tuvaluwa, e deli si tatuva bisunapulasi metoya okasi kali kwepapeula.

⁴⁶Guyau matauna Tomomova goli! Kala yakaula matauna agu taboda! Kala kavisi matauna Yaubada Tovakaigaga, matauna ikolaigu.

⁴⁷Ivigakaigu atomgwaga odubasi agu tilaula, e ivabu boda ituwoli ituwoli osikowagu

⁴⁸deli ikolaigu metoya ogu tounakaiyala. Mwa Guyau! Yoku lokuvigakaigu latomgwaga odubasi agu tilaula, deli kutabodaigu metoya matausina togigasisi.

⁴⁹E baisa uula aiyakawolaim oluwalaisi boda ituwoli ituwoli. Ausiwosi kam yakaula.

⁵⁰Yaubada ivigaki la guyau matauna bitomgwaga mokwita, e iyomitali la mitakwai baisa matauna availa bogwa einagi. Iyomitali la mitakwai kwekanigaga baisa yeigu Debida deli goli dalegu.