Read Kilivila SAM 21 Bible Online

SAM 21 - Kilivila bible

SAM 21

¹Mwa Guyau! Ma guyausi imwamwasila nanola, uula wala bogwa lokukwatupewoli matauna. Imwasawa uula wala kuvigaki matauna itomgwaga.

²E bogwa lokusaiki matauna avaka magila. Bogwa lokumapu la kapuloki.

³Bogwa lokumakaia matauna deli kala mitakwai kwevakaveka, e lokusaili kala kulupaipi goula opwanetala.

⁴Matauna einigadaim paila momova, e yoku bogwa lokusaiki. Lokusaiki momova kwaiwonaku deli kwekanigaga.

⁵Kala katububula saina isiligaga, uula wala m pilasi, e bogwala kuvigaki matauna eigiyouveka deli tomota si kabosailiu.

⁶M mitakwai baisa matauna gala wala biwokuva, e lokusikaili matauna mauula wala imwasawa.

⁷Da guyausi idubumi Guyau Topeuligaga. E matauna bisibwabwaila wala, paila uula Guyau la mitakwai.

⁸Da guyausi bikatupipi komwaidosi kala tilaula, e bikatupipi komwaidosi availa availa idokaisi matauna tokukolosi.

⁹E avai tuta biviloubusi, bivigaki makawala kovasupa bivakadoum matausina. Da Guyausi bikatudoum matausina metoya ola gibuluwa, e kova igau bivakamkulovi matausina.

¹⁰Gala taitala dalesi bikesa, paila guyau matauna bikatumtuwoli wala komwaidosi matausina.

¹¹Bogwa ikeiwalaisi matauna paila bikatumataisi, mitaga gala wala bipeulasi.

¹²Matauna bikaligigai matausina okaiyala, e bivigaki bitovilasi bisakaulasi.

¹³Mwa Guyau! Kayakawolaimsi, paila m peula saina vakaigaga. Bakausiwosisi deli bakayakawolaimsi yoku Topeuligaga.