Read Kilivila SAM 22 Bible Online

SAM 22 - Kilivila bible

SAM 22

¹Ulo Yaubada, ulo Yaubada,[52] avaka dimlela lokusilavaigu? Deli kala kaikai nanogu ladou paila pilasi, mitaga gala wala abani avaka.

²Wa yam adidouwaim yoku ulo Yaubada, mitaga gala wala kuvitakaula. Wa bogi adoudou, mitaga gala wala abani vaiwasi.

³Mitaga yoku om takaikaia idokaimsi Tobumaboma, e yoku goli mina Isireli iyakawolaimsi.

⁴Tubumaiasi eidubumaimsi. Eidubumaimsi, e yoku kukoli matausina.

⁵Eidousi baisa yoku, e kukoli matausina. Matausina eidubumaimsi, e gala wala avaka biyomwau ninasi.

⁶Mitaga yeigu gala tuvaila bukudokaigusi taitala tau. Yeigu mwatemwata wala, e komwaidosi ikaluwouwaigusi ikavilivilaigusi wala!

⁷Availa availa igigisaigusi iyosokanaigusi. Ikanumonumsasi mayesi, deli dubasi ikatugougeunasi.

⁸Kawasi, “Mm! Ka, lokukwakana baisa Guyau. Avakaga uula gala bikolaim?[53] Kidamwa Guyau bogwa idokaim tombwailila yoku, Avakaga uula gala bipilasaim? Weei!”

⁹Ogu tuta kaloubusi, yoku goli kuyomovaigu, e ogu tuta pwapwawa yoku goli lokuyamataigu.

¹⁰Igau ogu yam kaloubusi e lagaila, lakakana wala baisa yoku. e yoku goli ulo Yaubada tuta komwaidona.

¹¹Taga kusikaduwonaku metoya baisa yeigu, paila makateki baboda mwau, e gala availa isisu paila bipilasaigu.

¹²Tilaula bidubadu ititoulaigusi, makawala bulumakau[54] nammwala bitoulaisi avaka mwada bivapupoiyaisi. Ititoulaigusi makawala mina Basani si bulumakau nammwala, minasina saina nagigasisi goli.

¹³Wodosi ikapogegasi makawala udosi laiyoni, e iguguvavilasi mwada bigadaigusi.

¹⁴Ulo peula bogwa leiwokuva, makawala takatusou sopi bila opwaipwaia, e nani bitamwau. Tutuwanegu komwaidona ikasakalasi, e ikiuta nanogu sainela.

¹⁵Ipakalaki kaiyogu agu daka goli, e mayegu ikapituki tubokawagu, e kudoki bogwa lakaliga e kusilavaigu wala.

¹⁶Budotala tomitugaga itoulaigusi, e makawala yuwotala kaukwa ivevasi imakaiagusi e igigadaisi yamagu deli kaikegu.

¹⁷Tutuwanegu komwaidona isisilasi wala. Agu tilaula itobu mitasi igigisaigusi.

¹⁸Ikowobobutasi paila agu kwama, e isigalaisi miyasina oluwalaisi.

¹⁹E Guyau, taga kusikaduwonaku metoya baisa yeigu. Nani goli bukumakaiagu kukolaigu.

²⁰Bukukolaigu kidamwa gala basilagi metoya opuluta. Kukolaigu metoya minasina kaukwa nagigasisi.

²¹Bukukolaigu metoya minasina laiyoni. Bogwa goli bukukolaigu metoya minasina bulumakau nammwala nagigasisi.

²²Bogwa baluki ulo tomota avaka lokuvagi, e bayakawolaim osi tuta sigugula.[55]

²³Kawagu, “Tauwau, yokomi Guyau la towotetila - ka, kuyakawolaisi matauna. Yokomi Yekobe dalela, kutemmalaisi matauna, e yokomi mina Isireli, kutapwarorusi baisa matauna.

²⁴Matauna gala wala bigigisaki tonamakava, kaina bilumwelavi kasi mmayuyu. Avai tuta idousi baisa matauna paila pilasi, gala wala bitotubuloki matausina. Bogwa bimapu si nigada e bipilasi wala.”

²⁵Osigugula kwaiveka bayakawolaim paila avaka lokuvagi. Omitasi totapwaroru matausina balula avaka bogwa lakatotila.

²⁶Tonamakava bikamsi bikomatasi metoya lula makwaina.[56] Availa availa bimakaiasi Guyau biyakawolaisi matauna. Ibodi biyubwailasi si guguwa bidubadu, e gala wala biwokuva.

²⁷Komwaidona boda ituwoli ituwoli biluluwaisi Guyau. Tomota metoyasi ambaisa ambaisa ovalu watanawa bitovilasi baisa matauna. Tomota komwaidosi avai migila avai migila bitapwarorusi baisa matauna.

²⁸Paila Guyau Yaubada matauna Guyau, e iguguyoi boda ituwoli ituwoli.

²⁹Tokamnomwana komwaidosi bikavaginasi baisa matauna. Komwaidosi mina watanawa bogwa bikavaginasi baisa omatala matauna.

³⁰Tubwa matubosina igau bikaloubusisi biwotitalaisi matauna. Tomota bililivalasi paila Guyau baisa matubona oluvi.

³¹Tomota igau gala bikaloubusisi, matausina bogwa bilagaisi ammakawala Guyau eikoli la tomota.