Read Kilivila SAM 27 Bible Online

SAM 27 - Kilivila bible

SAM 27

¹Guyau matauna ulo kaitapa[71] deli agu tokwatumova. Yeigu gala wala bakukoli availa. Guyau bikolaigu e gala basilagi, mapaila gala wala avai tuta bakokola.

²Kidamwa tomitugaga iyosaigusi mwada bikatumataigusi, isilibeibeusi e ikapusisi.

³Kaina goli tokwabilia budumwaidona bitoulaigusi, e gala wala bakokola. Kainaga tilaula biyosaigusi, mitaga badubumi wala Yaubada.

⁴Bogwa lanigada baisa Guyau mwada kwaitala wala vavagi bisakaigu, e kwaitinidesi wala vavagi magigu. Magigu basisu Guyau ola bwala[72] ogu tuta komwaidona, e baisa batulaula paila la bobwailila deli banigadi bivakadaigu.

⁵Paila matauna bikatupwanaigu kidamwa avai tuta baboda mwau. Bikolaigu ola Bwala Kwebumaboma, e bisailigu bakwala odabala dukutotu kwaiveka.

⁶E mapaila yeigu batomgwaga odubasi agu tilaula eitoulaigusi. Bagova deli mwasawa e bagabu lula ola Bwala Kwebumaboma. Bausiwosi e bayakawoli Guyau.

⁷Mwa, Guyau! Bukulagaigu tutala adidouwaim. Bukunokapisaigu e bukumapu ulo dou.

⁸Tuta matutona lokukwaibiga, “Kumaisi bukutapwarorusi baisa yeigu,” e yeigu lavitakaula, kawagu, “Guyau, bogwa bawa.

⁹Taga bukukwatupwanaim metoya baisa yeigu!” Taga kugibuluwaigu, e gala bukuyabaigu, yeigu m towotetila. Yoku bogwa lokupilasaigu. Mwa! Yaubada agu tokwatumova, taga kusilavaigu e taga kuligaimwaigu.

¹⁰Kaina tamagu inagu biligaimwaigusi mitaga yoku Guyau bukuvaulaigu goli.

¹¹E Guyau, bukuvitulokaigu avaka nanom mwada bavagi, e kuvakadaigu ambaisa gala baboda silagi, paila uula bidubadu agu tilaula isisuaisi.

¹²Taga bukuligaiwaigu baisa agu tilaula paila iwaigusi osi sasopa deli si vitukokola.

¹³Anikoli kidamwa igau wala basisu tomomova e bagisi Guyau la bobwailila.

¹⁴Kudubumaisi Guyau. Kupapeulasi wala, taga kusaimwaisi pikwaku. E kudubumaisi Guyau.