Read Kilivila SAM 31 Bible Online

SAM 31 - Kilivila bible

SAM 31

¹Mwa Guyau! Lamakaiam paila bukukolaigu. Gala avai tuta bukutagwala bikalisauwaigusi. Yoku Yaubada saina tomitukwaibwaila. Anigadaim kukwatumovaigu!

²Kulagaigu, e kukwatumovaigu tuta baisa! Bukuvigakaim agu tokwala e bukukolaigu, deli bukuvigakaim agu taboda yoku e bukukwatumovaigu.

³Yoku agu tokwala deli agu taboda. Kuvakadaigu deli kukugwaiyaigu makawala m biga katotila.

⁴Kuyamataigu metoya wa sikula makaina eileiyasi paila yeigu, e kukolaigu metoya okabosilagi.

⁵Atugwalaigu baisa yoku kidamwa bukuyamataigu.[81] Yoku Guyau bukukwatumovaigu. Yoku Yaubada saina tokimadagi.

⁶Yoku kukoulovi availa availa matausina itapwarorusi baisa minasina yaubada sasopa. Mitaga yeigu adubumaim wala.

⁷Yeigu goli bamwasawa deli bakaimwana paila uula m mitakwai. Yoku kugisi kagu mmayuyu e kunikoli agu mwau.

⁸Yoku gala kutagwala agu tilaula bikatupipaigusi. E yoku bogwa kutanekwaigu e bala wala ambaisa magigu.

⁹Mwa Guyau! Kunokapisaigu, paila uula yeigu bogwa laboda mwau. Matagu bogwa eisomata saina auvalam, e yeigu mokwitatoula wala bogwa eimitaki wowogu

¹⁰Yeigu bogwa leisomitakaigu wala ninamwau, e valam wala iutupwi ulo momova. Bogwa wala lamama metoya komwaidona agu mwau, e ivigaki goli tutuwanegu isisilasi wala iwokuva.

¹¹Komwaidosi wala agu tilaula ikaluwouwaigusi, e isiligaga goli segwaia ikaluwouwaigusi makawala. Matausina availa availa inikolaigusi bogwa wala eikukolaigusi. Avai tuta bigisaigusi wa keda bisakaulasi wala.

¹²Komwaidosi wala bogwa eilumwelavaigusi, makawala idokaigusi bogwa lakaliga. Yeigu makawala kwaitala vavagi bogwa talavi.

¹³Alilagi bidubadu tilaula ikikasilamsi. Ikikeiwalaigusi paila bikatumataigusi, e kokola itavinaigu itapataigu.

¹⁴Mwa Guyau! Yoku wala adubumaim. Yoku wala ulo Yaubada.

¹⁵Yeigu tuta komwaidona kuiyamataigu. Kukolaigu metoya agu tilaula, e metoya baisa matausina ilamidadaigusi.

¹⁶Kugisaigu yeigu m towotetila deli m ninabwaila, e kukwatumovaigu metoya om mitakwai.

¹⁷Mwa Guyau! Adou baisa yoku. Gala bukutagwala yeigu bammosila. Kuvigaki tomitugaga bimmosilasi, e bivasilamsi bilosi Tuma.[82]

¹⁸Kukwatupatu udosi matausina tosisasopa. Komwaidosi matausina ninasi walakaiwa deli matausina ikaiveka ninasi, matausina ikikaluwouwaisi tomitukwaibwaila.

¹⁹Isa bwainigaga makwaisina vavagi bwaina yoku kukwatubiasi paila matausina availa availa ititemmalaimsi. Komwaidosi wala inikolaimsi yoku saina bwaina, e inikolaisi ammakawala lokukoli matausina availa availa idubumaimsi.

²⁰Kukwatupwani matausina ikwalasi baisa yoku, e gala bisilagisi metoya tomota matausina ikikeiwalaisi. Kukwatupwani matausina okabokwala bwaina mwada kasi tilaula gala bikavilakaisi matausina.

²¹Kala yakaula Guyau! Avai tuta tilaula eivaulaigusi e iwaigusi, Guyau saina bwainigaga eimitukwaiyaigu.

²²Yeigu agu kokola adoki wala bogwa eibokavilaigu metoya omatala. Mitaga avai tuta ladou baisa matauna paila pilasi, matauna ilagi ulo dou.

²³Komwaidomi yokomi la tomota tokimadagi, kuyebwailisi Guyau. Guyau matauna ikoli tokimadagi matausina, mitaga imipuki matausina ninasi walakaiwa, makawala avaka bibudoki kasi mipuki.

²⁴Komwaidomi yokomi availa availa kupikwakusi baisa Guyau, bukutotusi peula, e bukutuvaluwasi.