Read Kilivila SAM 37 Bible Online

SAM 37 - Kilivila bible

SAM 37

¹Gala bukuninayuwa tutala kuninamsi tomitugaga. Gala wala bukupogi matausina availa availa ivagaisi vavagi gaga.

²Makateki bitamwausi makawala mnumonu kalasia eikalimati, kaina bikaligasi makawala kai yekwesila eimwailela.

³Kudubumi Guyau, e deli kumitukwaibwaila. Bukusisu om valu[94] e gala wala bukusilagi.

⁴Bukubani uulotoula m mwasawa baisa Guyau, e matauna bisakaim avaka nanom.

⁵Bukutugwalaim baisa Guyau. Kudubumi wala matauna, e matauna bipilasaim.

⁶Matauna bivigaki m mitukwaibwaila makawala kalasia iyuwoula, deli kam kwaraiwaga kala duwosisia bititapi makawala kalasia tutala bitouwota.

⁷Bukupeuloki e kutulotula bukugisi avaka Guyau bivagi, e gala goli bukunokubukubu paila matausina isim si guguwa bidubadu, kaina paila matausina availa availa bogwa ipeulasi osi mitugaga.

⁸Gala bukutagwala kidamwa ninayuwa kaina gibuluwa mwada bikau nanom. Vavagi mwau wala biviloubusi metoya makwaisina.

⁹Matausina availa availa idubumaisi Guyau, matausina goli bisigagasi mapilana valu. Mitaga makateki tomota bibokavilaisi tomitugaga.

¹⁰Igau goli makateki tomitugaga bitamwausi. Kaina bukunevi mitaga gala wala bukubani matausina.

¹¹Matausina ninasi watanawa bisigagasi mapilana valu. Bogwa bibanaisi bidubadu si guguwa, e deli bivakotasi osi valu.

¹²Tomitugaga inainevi ammakawala biyogagi tomitukwaibwaila, e ikapwinipwini matala baisa matauna.

¹³Mitaga Guyau iyosokani tomitugaga, paila inikoli bogwa makateki bidoumsi.

¹⁴Tomitugaga ibiigilaisi si puluta e iikwaisi si kaiyala mwada bikatumataisi tonamakava deli togumalawa, deli bikatumtuwolaisi tomitukwaibwaila.

¹⁵Mitaga kasi tilaula tomitugaga bitovilasi bikatumataisi metoya si puluta titoulesi e bikomtumtaisi makaisina kaiyala.

¹⁶Kaina tobwaila la guguwa pikekita wala, mitaga kala bwaina saina bikalisau si guguwa tomitugaga komwaidosi.

¹⁷Paila Guyau bikau si peula tomitugaga e bikoli matausina tobubwaila.

¹⁸Guyau iuvauli matausina availa availa ikabikuwolaisi matauna, mapaila matausina bisigagasi goli mapilana valu.

¹⁹Gala bibodaisi mmayuyu wa tuta mwau. Bogwa bibanaisi avaka bibodi matausina otutala molusaula.

²⁰Mitaga tomitugaga bikaligasi. Guyau kala tilaula bitamwausi makawala kai lalela, e bitamwausi makawala mseu.

²¹Tomitugaga isim kala wasi e gala avai tuta biuwoli makwaina. Mitaga tomitukwaibwaila tuta komwaidona tokatalova wala.

²²Matausina availa availa Guyau imitukwaii bogwa bisigagasi mapilana valu. Mitaga matausina availa availa Guyau ibuloti, tomota biyabaisi wala matausina.

²³Guyau iuvakadaida bitala avai keda ibodi bitaloula, e kidamwa tayomwasali nanola, bogwa bikolaida wala.

²⁴Kidamwa takapusi, gala goli takanuvagasi, paila Guyau bitomiliwolaida.

²⁵Bogwa latomoya, e ulo tuta bogwa ikalisau, mitaga gala avai tuta agisi mwada Guyau eisilavi avai tobwaila, e gala goli agisi litula bininigadasi paila kaula.

²⁶Tuta komwaidona tobwaila matauna ililalasi deli itagwala availa biwasi baisa matauna, e litula goli matausina bobwailila metoya baisa Yaubada.

²⁷Kutovilasi bukupakaisi mitugaga e bukumitukwaibwailasi, e tubumia bogwa bisigagasi baisa osi valu.

²⁸Paila Guyau iyebwaili karaiwaga duwosisia, e gala wala bisilavi la tomota matausina mina kimadagi. Matauna goli kasi tokwala tuta gala biwokuva, mitaga tomota bibokavilaisi tomitugaga tubusia.

²⁹Tomitukwaibwaila bisigagasi mapilana valu, e bisivagasisi baisa goli.

³⁰Matauna tobwaila saina tobigabwaila, e tuta komwaidona matauna tokibobuta goli.

³¹Ikabikuwoli la Karaiwaga la Yaubada onanola, e gala avai tuta bikoulovi.

³²Tomitugaga iiyausi tomitukwaibwaila, e inainevi ammakawala bikatumati.

³³Mitaga Guyau gala wala bitugwali matauna tomitukwaibwaila baisa kala tilaula, e otutala yakala, gala bitagwala bikamogaisi matauna.

³⁴Bukupikwakwaisi Guyau, e bukukwabikuwolaisi la karaiwaga makwaisina. Matauna bogwa bisakaimi mi valu, e makawala goli bivigaki kami taimamila. E igau bukugisaisi ammakawala bibokavili tomitugaga.

³⁵Omitibogwa yeigu anikoli taitala tomitugaga, saina giyougaga matauna. Matauna saina towonaku odubasi tomota, makawala goli kweisilela Lebanoni odabala kai komwaidona.[95]

³⁶Mitaga kwaitala tuta laliloula makadana, taga bogwa eitamwau. Anainevi matauna mitaga gala wala gagabila babani.

³⁷Kuvitusaisi tobwaila, e kumitakavataisi tomitukwaibwaila. Paila matauna tomanum isim dalela.

³⁸Mitaga tomitugaga idoumlabasi wala, e dalesi gala isim pesisi.

³⁹Guyau ikatumovi tomitukwaibwaila, e ikoli matausina wa tuta mwau.

⁴⁰Ipilasi e ikoli matausina. Ikatumovi matausina metoya baisa tomitugaga, paila bogwa eilokaiasi matauna paila bikwalasi.